ႁႅင်းၵၢၼ်ၵူၼ်းမိူင်းႁူမ်ႈတုမ် ၸိူဝ်းႁဵတ်းၵၢၼ်တီႈၵဵင်းမႂ်ႇ ၺႃးၸဝ်ႈၼႃႈတီႈထႆးတီႉၺွပ်း ဢမ်ႇယွမ်း 10 ၵေႃႉ။
မိူဝ်ႈဝၼ်းတီႈ 6/7/2023 ၼႆႉ ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း ၸိုင်ႈထႆး လူင်းပိုၼ်ႉတီႈ ၵူတ်ႇထတ်း ၼႂ်းဝဵင်း ၼွၵ်ႈဝဵင်း တီႉၺွပ်းလႆႈ ႁႅင်းၵၢၼ်ၵူၼ်းမိူင်းႁူမ်ႈတုမ် ဢၼ်ႁဵတ်းၵၢၼ်ဝႆႉတီႈႁၢၼ်ႉတၢင်းၵိၼ်ၶႄႇႁၢၼ်ႉၼိုင်ႈ တီႈပွၵ်ႉ ၸၢင်ႉၽိူၵ်ႇ ၸႄႈဝဵင်းၵဵင်းမႂ်ႇ ။
ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း ၵဵင်းမႂ်ႇပိုၼ်ၽၢဝ်ႇဢွၵ်ႇဝႆႉဝႃႈ – “ ၸဝ်ႈၼႃႈတီႈ လူင်းပိုၼ်ႉတီႈ ၵူတ်ႇထတ်းသေ တီႉၺွပ်းလႆႈ ၵူၼ်းမိူင်းႁူမ်ႈတုမ်ၵေႃႉၼိုင်ႈ ႁပ်ႉၸၼ်ႉၵၢၼ်ဢၼ် လူင်ပွင်ၸိုင်ႈႁႄႉႁၢမ်ႈဝႆႉၼၼ်ႉသေဢမ်ႇၵႃး သမ်ႉႁူၺ်းႁွင်ႉဢဝ် ၵူၼ်းဢမ်ႇမီးဝတ်းဝႂ် ၶဝ်ႈႁဵတ်းၵၢၼ်ဝႆႉထႅင်ႈ 10 ၵေႃႉ။တင်းသဵင်ႈ ၸင်ႇတီႉၺွပ်းလႆႈ 10 ၵေႃႉပၢႆ ပဵၼ်ၵူၼ်းမိူင်းႁူမ်ႈတုမ်မၢၼ်ႈ မိူဝ်ႈလဵဝ် တိုၵ်ႉၵူတ်ႇထတ်းထဵတ်ႈထၢမ်ၽူႈၵဵဝ်ႇၶွင်ႈလွင်ႈၼႆႉတင်းသဵင်ႈ” – ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် 10 ၵေႃႉ ဢၼ်ၺႃးတီႉၺွပ်းၼႆႉ ပဵၼ်ႁႅင်းၵၢၼ်ၸိူဝ်းၶဝ်ႈမိူင်းထႆး လူၺ်ႈဢမ်ႇၸႂ်ႈတၢင်းၵၢၼ်သေႁဵတ်း ၵၢၼ်ဝႆႉ တီႈႁၢၼ်ႉတၢင်းၵိၼ်ၶႄႇၼႆႉ မီးၶၢဝ်းတၢင်း 1 ပီ ယဝ်ႉ။ ၼိုင်ႈၵေႃႉလႂ် လႆႈငိုၼ်း ၼိုင်ႈလိူၼ် ပႅတ်ႇႁဵင်(8000) ဝၢတ်ႇ။ ဢမ်ႇမီးဝတ်းဝႂ်ႁဵတ်းၵၢၼ်သေၵေႃႉ မိူဝ်ႈလဵဝ် ၺႃးၸဝ်ႈၼႃႈတီႈထႆး ၵူတ်ႇထတ်းၵုမ်းၶင်တူဝ် ဝႆႉတီႈၵဵင်းမႂ်ႇၼႆယဝ်ႉ။
ႁႅင်းၵၢၼ်ဢၼ်ယူႇတီႈၵဵင်းမႂ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁႅင်းၵၢၼ်ယၢၼ်မိူင်းၼႆႉ ဢၼ်လႆႈထုၵ်ႇလီႁဵတ်း ဢၼ်လႂ် ဢမ်ႇထုၵ်ႇလီႁဵတ်းၼႆ ၶဝ်မီးမၢႆမီႈဢွၵ်ႇဝႆႉ ပေႃးၸၼ်ႉၵၢၼ်သုင်သုင် မိူၼ်ၼင်ႇ ႁူဝ်ၼႃႈပိူၼ်ႈႁႃႉ ၽူႈၸတ်း ၵၢၼ်ႁႃႉၼႆ ႁပ်ႉဢမ်ႇလႆႈ ။ ယဝ်ႉၵေႃႈ ပေႃးႁဵတ်းၵၢၼ်ၼႆ တေလႆႈမီး ဝတ်းဝႂ်တဵမ်ထူၼ်ႈ ပေႃးဢမ်ႇၼၼ် ၸၢင်ႈၺႃး တီႉၺွပ်း ” – ဝႃႈၼႆ။
ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းလၢႆလၢႆၸိုင်ႈမိူင်း ၶဝ်ႁဵတ်းၵၢၼ်ၼႂ်းမိူင်းထႆး ၼမ်မႃးၵူႈမိုဝ်ႉၵူႈဝၼ်း မိူၼ်ၼင်ႇ ၵူၼ်းမိူင်းႁူမ်ႈတုမ်ၼႆၵေႃႈ ၵမ်ႈၽွင်ႈၶဝ်ႈလူၺ်ႈတၢင်းၵၢၼ် ၵမ်ႈၽွင်ႈ ၶဝ်ႈလူၺ်ႈဢမ်ႇၸႂ်ႈတၢင်းၵၢၼ်သေ ၸိူဝ်းၺႃး ၸဝ်ႈၼႃႈတီႈထႆး တီႉၺွပ်းၶႂ်ႈမီးၵူႈလိူၼ် ၵမ်ႈၽွင်ႈၵေႃႈ ပလိၵ်ႈထႆး သူင်ႇတူဝ်ထိုင် လႅၼ်လိၼ်ၶိုၼ်းၵေႃႈမီး။
