ႁူင်းႁဵၼ်းၵူၼ်းၼုမ်ႇတႆး SYI ယၢင်းပူး ၸႄႈဝဵင်းၵဵင်းတုင် ၸတ်းႁဵတ်းပၢင်တၢၼ်ႈၶႆႈ ပၼ်တၢင်းႁူႉ ပဵၼ်ပွၵ်ႈၵမ်းႁႅၵ်ႈ မီးလုၵ်ႈႁဵၼ်း ၶဝ်ႈႁူမ်ႈလဵပ်ႈႁဵၼ်းတင်းၼမ်လၢႆ။

ဝၼ်းတီႈ 21/04/2018 ယၢမ်းၵၢင်ဝၼ်း 12:30 မူင်း ထိုင် 4:30 မူင်း ဝၢႆးဝၼ်း ႁူင်းႁဵၼ်းၽၢႆႇပူၵ်းပွင်ၵူၼ်းၼုမ်ႇ ၸိုင်ႈတႆး (School For Youth Improvement =SYI) ၸတ်းႁဵတ်းပၢင်တၢၼ်ႈၶႆႈ ပၼ်ပိုၼ်ႉႁူႉ ၵဵဝ်ႇၵပ်းၵၢၼ် ႁဵၼ်းလႄႈ ထႅမ်ႁႅင်းၸႂ် တီႈဝတ်ႉယၢင်းပူး ဢိူင်ႇလွႆလူင် ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ ဝႃႈၼႆ။

ၸဝ်ႈၶူးသုၶ ၽူႈဢွၼ်ႁူဝ်လႄႈ ၶပ်းၶိုင်တႃႇပဵၼ်မႃး ပၢင်တၢၼ်ႈၶႆႈ လၢတ်ႈတီႈၽူႈတွႆႇႁွၵ်ႈဝႃႈ “ ဢိင်ၼိူဝ်ပၢင်ၵၢပ်ႈ သွမ်းဝၼ်းၵိူတ်ႇႁဝ်းၸဝ်ႈသေ ၼင်ႇႁိုဝ် တေပဵၼ်ပၺ်ၺႃပႃႇရမီႇဢၼ်ၼိုင်ႈၼႆလႄႈ ၸင်ႇလႆႈၸတ်းပႃးပၢင်တၢၼ်ႈ ၶႆႈ ၾၢႆႇၼိုင်ႈၵေႃႈ ႁဝ်းၸဝ်ႈယၢမ်ႈပဵၼ်လုၵ်ႈႁဵၼ်းတီႈႁူင်းႁဵၼ်းၼႆႉမႃး” ဝႃႈၼႆ။

ၼႂ်းပၢင်တၢၼ်ႈၶႆႈၼၼ်ႉ မီးၽူႈလူင်ႉလႅၼ်ႇ/ ၽူႈမီးပိုၼ်ႉႁူႉ မႃးဢုပ်ႇၶႆႈၼႄ မိူၼ်ၼင်ႇ ၸဝ်ႈၶူးဢၵ်ႉၵသေၼ လႅင်းတႆး M.A (London) ဢုပ်ႇၶႆႈၼႄ လူၺ်ႈႁူဝ်ၶေႃႈ မုင်ႈတူၺ်းလၢႆဢၼ် ႁႂ်ႈႁၼ်ၵူႈၾၢႆႇ၊ ၼၢင်းသီလႃး B.A (Philo) ဢုပ်ႇ ၶႆႈၼႄ လူၺ်ႈႁူဝ်ၶေႃႈ ပိုၼ်ႉထၢၼ် လွင်ႈပိုၼ်းၵၢၼ်ပၢႆးမိူင်း မိူင်းတႆး လႄႈ ၸၢႆးႁၵ်ႉမိူင်း လုမ်းမူႇလၼိထိ(မႅပ်ႇ) ဝဵင်းၵဵင်းမႆႇ သပ်းလႅင်းၼႄ လူၺ်ႈႁူဝ်ၶေႃႈ ႁႅင်းၵၢၼ်ယၢၼ်မိူင်းလႄႈ ပၢႆးပၺ်ၺႃ ၸိူဝ်းၼႆႉ ဝႃႈၼႆ။

ႁူင်းႁဵၼ်း SYI မီးလုၵ်ႈႁဵၼ်းၼႂ်းမိူင်းတႆးၵူႈတီႈတီႈ မိူၼ်ၼင်ႇ ပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ ၸိူဝ်းၼႆႉ မႃးႁဵၼ်းလိၵ်ႈဢိင်းၵလဵတ်ႈ ဝႃႈၼႆ။

မၢင်ၸိူဝ်းယဝ်ႉ ၸၼ်ႉၸွမ်သေ ၶိုၼ်းမႃးႁၢင်ႈႁႅၼ်းဢင်းၵိတ်း တႃႇၶိုၼ်းႁဵတ်းၵၢၼ် ဢမ်ႇၼၼ်တႃႇၵႂႃႇၼွၵ်ႈမိူင်း၊ မၢင် ၸိူဝ်းယဝ်ႉ ၸၼ်ႉသိပ်းတေသိုပ်ႇၶိုၼ်ႈၸၼ်ႉၸွမ်ၼႂ်းမိူင်း ၼွၵ်ႈမိူင်းလႄႈ ၶိုၼ်းမႃးႁၢင်ႈႁႅၼ်းၾၢႆႇဢင်းၵိတ်း၊ မၢင် ၸိူဝ်းၵေႃႈ မႃးၾိုၵ်းပိုၼ်ႉထၢၼ် မီးလၢႆလၢႆသႅၼ်း။ ႁၼ်ဝႃႈ တီႈၼႆႈမၼ်းမီးသႅၼ်းႁုၼ်ႈမႂ်ႇ တႃႇၼေႃႇတႅၼ်း ၶိူဝ်းႁဝ်း တင်းၼမ်တင်းလၢႆ ၼင်ႇႁိုဝ် ၶဝ်တေမီးႁႅင်းၸႂ် မီးၵႂၢမ်းမၼ်ႈၸႂ် ၸင်ႇလႆႈမွၵ်ႇထိုင် ၽူႈမီးတူဝ်ထူပ်း ၼႂ်းၵၢၼ်ႁဵၼ်း လႄႈ ၼႂ်းၼႃႈၵၢၼ် ၼႂ်းမိူင်းၼွၵ်ႈမိူင်းမႃးဢုပ်ႇၶႆႈပၼ်တၢင်းႁူႉထႅမ်ႁႅင်းၸႂ်” ဝႃႈၼႆ။

ႁူင်းႁဵၼ်း SYI ယၢင်းပူးၼႆႉ မီးၾၢႆႇၸဵင်ႇႁွင်ႇဝၼ်းတူၵ်း ဝဵင်းၵဵင်းတုင်။ ယၢၼ်ၵႆဝဵင်းၵဵင်းတုင် မွၵ်ႈ 3 လၵ်း ။ ယိူင်း ဢၢၼ်းတႃႇယုၵ်ႉမုၼ်းပၢႆးပၺ်ၺႃၵူၼ်းၼုမ်ႇမိူင်းတႆးၼႆသေ တႄႇပိုတ်ႇသွၼ်ပၼ်လိၵ်ႈဢိင်းၵလဵတ်ႈ မိူဝ်ႈပီ 2000 ။ ၼိုင်ႈပီ မီးလုၵ်ႈႁဵၼ်း ဢမ်ႇယွမ်း 50 ၵေႃႉ ဝႃႈၼႆ။