ၵူၼ်းဢွၵ်ႇတႃႈပႆတၢင်း လၢင်းၶိူဝ်း – ႁူဝ်မိူင်း လႆႈပၼ်ၵႃႈၸရိတ်ႈတၢင်းၼမ် မၢင်ၸိူဝ်းလႆႈပၼ် ၼပ်ႉႁူဝ်သႅၼ်ပျႃး ႁဵတ်းႁႂ်ႈ ၵူၼ်းမိူင်းထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း။
ၶၢဝ်းတၢင်း လၢင်းၶိူဝ်း – ႁူဝ်မိူင်း ၵမ်းသိုဝ်ႈၼႆႉ ပေႃးပဵၼ်ၵူၼ်းပိုၼ်ႉတီႈလၢင်းၶိူဝ်း လႆႈပၼ်ၵႃႈၵႃး 1 ၵေႃႉ 6 မိုၼ်ႇထိုင် 7 မိုၼ်ႇပျႃး၊ ပေႃးပဵၼ်ၽူႈႁၢပ်ႇၵၢၼ်လူင်ပွင်ၸိုင်ႈသမ်ႉ 1 ၵေႃႉ 3 မိုၼ်ႇပျႃး။ ၸိူဝ်းပဵၼ်ၶႅၵ်ႇ (ဢမ်ႇၸႂ်ႈၵူၼ်းပိုၼ်ႉတီႈ) သမ်ႉ လႆႈပၼ် 1 ၵေႃႉ 3 သႅၼ်ပျႃး ၼႆယဝ်ႉ။
ၵူၼ်းပိုၼ်ႉတီႈ ၸႄႈတွၼ်ႈလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၼႆႉ ပဵၼ်မႃးႁိုင်ယဝ်ႉ မၼ်းပဵၼ်ၼႆ ယွၼ်ႉ ၸုမ်းပျီႇ တူႉၸိတ်ႉ S3 တူဝ်ၼႆႉ ၶဝ်ၵဵပ်းၼမ်ႁႅင်းၼႃႇ။ တႄႇဢဝ် လၢင်းၶိူဝ်း – ႁူဝ်မိူင်း – လၢၼ်ႇၼႃးမူၼ်းၼႆႉ တင်းမူတ်းမီးလၢၼ်ႇၶဝ် 8 တီႈ ဢၼ်ၵဵပ်းငိုၼ်းၼႆႉ။ ၼိုင်ႈလၢၼ်ႇလႂ် ၶဝ်ၵဵပ်းၵူၼ်းမႃးၼႂ်းၵႃး ၼပ်ႉႁူဝ်လွႆႉဝၢတ်ႇ(ငိုၼ်းထႆး) ၵွပ်ႈၼႆလႄႈ ၸဝ်ႈၵႃးၼႆႉ မၼ်းလႆႈပၼ်တင်းငိုၼ်းထႆး ယဝ်ႉၵေႃႈ လႆႈပၼ်ၼမ်လႄႈ ၸင်ႇလႆႈၵဵပ်းၵူၼ်းဢွၵ်ႇတၢင်းၼမ်။ တီႈတႄႉ ၸဝ်ႈလႅင်းၵႃးၶဝ် တႄႉ ဢမ်ႇလႆႈၵိၼ်သင်ၵႃႈႁိုဝ် ၵုမ်ႇလႆႈပၼ်တီႈလၢၼ်ႇၸုမ်းသိုၵ်းၵူၺ်း”- ဝႃႈၼႆ။
ဝဵင်းႁူဝ်မိူင်းၼႆႉ ယူႇၼႂ်းၸႄႈတွၼ်ႈလၢင်းၶိူဝ်းဝႆႉ ပေႃးဢဝ်သဵၼ်ႈတၢင်း လၢင်းၶိူဝ်း – ႁူဝ်မိူင်း ဝႃႈၼႆၸိုင် တေယၢၼ်ၵႆ ၵၼ် 129 ၵီႊလူဝ်ႊ၊ ပေႃးဢဝ် လၢင်းၶိူဝ်းထိုင် လၢၼ်ႇၼႃးမူၼ်း လႅၼ်လိၼ်တႆး – ထႆးသမ်ႉ တေမီး 150 ၵီႊလူဝ်ႊ ၼႆယဝ်ႉ။
“ပေႃးႁဝ်းၶႃႈမႃးသွၼ်ႇတူၺ်း ဢၼ်ၸဝ်ႈၵႃးၶဝ် လႆႈပၼ်တီႈ S3 တူဝ်ၼမ်ၼႆႉ တႄႇဢွၵ်ႇလၢင်းၶိူဝ်း 1 တီႈ၊ ဝၢၼ်ႈ ၼႃးၵူင်း 1 တီႈ ၊ တႃႈသူပ်းတဵင်း 1 တီႈ၊ ၾင်ႇၶူင်းၾၢႆႇဢွၵ်ႇၶူင်း 1 တီႈ၊ ၶူဝ်မႄႈၸေႉ 1 တီႈ၊ တၢင်းၶဝ်ႈဝဵင်းႁူဝ်မိူင်း 1 တီႈ၊ ၼႂ်းၵၢင်ဝဵင်း ႁူဝ်မိူင်း 1 တီႈလႄႈ တီႈလၢၼ်ႇၼႃႈမူၼ်း 1 တီႈ တင်းမူတ်း တေမီး 8 တီႈၼႆႉ။ ၼႂ်းၼၼ်ႉ တႄႇဢဝ် ၾၢႆႇတႃႈ သူပ်းတဵင်း ထိုင်လၢၼ်ႇၼႃးမူၼ်းၼႆႉ ၶဝ်တေဢဝ်ငိုၼ်းထႆးမူတ်းမူတ်း။ လိူဝ်ၼၼ်ႉ ၵႃႈႁိူဝ်းၶၢမ်ႈတႃႈသူပ်းတဵင်းသမ်ႉ လႆႈပၼ် ထႅင်ႈႁင်းၶေႃ။ ၵွပ်ႈၼႆလႄႈ ပဵၼ်ငိုၼ်းၶဝ်ႈ ၼႂ်းၸုမ်း S3 တူဝ်မူတ်း။ သၢႆၼၼ်ႉ သိုၵ်းမၢၼ်ႈ ဢမ်ႇၵဵပ်း တင်ႈၸႂ်ပွႆႇပၼ် S3 တူဝ် ႁဵတ်းၵိၼ်ၵမ်းသိုဝ်ႉယဝ်ႉ”- ၵူၼ်းပိုၼ်ႉတီႈ ၸႄႈတွၼ်ႈလၢင်းၶိူဝ်း သိုပ်ႇလၢတ်ႈ ၼႄ ၼင်ႇၼႆ။
ထႅင်ႈလွင်ႈၼိုင်ႈ ဢၼ်ၵူၼ်းမိူင်း ပိုၼ်ႉတီႈၵႂႃႇမႃး သဵၼ်ႈတၢင်းၼႆႉ ယၢပ်ႇၽိုတ်ႇသမ်ႉ လွင်ႈၸဝ်ႈႁိူဝ်း ႁပ်ႉသူင်ႇတေႃႉ ၶၢမ်ႈ တီႈတႃႈသူပ်းတဵင်းၼႆႉသမ်ႉ ပဵၼ်ၸုမ်း S3 တူဝ်ဝႆႉ သင်ဝႃႈ ဢမ်ႇၸႂ်ႈၶၢဝ်းယၢမ်းမၼ်းၼႆ ပႆႇၶၢမ်ႈႁပ်ႉတေႃႉသူင်ႇပၼ်။ ယွၼ်ႉပဵၼ် ၽွင်းၸဝ်ႈႁိူဝ်းလိုဝ်ႈၵၢၼ် ၽွင်း 12:00 မူင်းၵၢင်ဝၼ်း ထိုင် 2:30 မူင်း ဝၢႆးဝၼ်း ၼႆယဝ်ႉ။
ၵူၼ်းပိုၼ်ႉတီႈ ႁူဝ်မိူင်း လၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၼမ် ၶဝ်တေဝူၼ်ႉဝႃႈ ၵူၼ်းမိူင်းဢၼ်လုၵ်ႉတၢင်းလၢင်းၶိူဝ်းမႃးၼႆႉ ၶဝ်တေၶဝ်ႈမိူင်းထႆးၵူၺ်း လိူဝ်သေၼၼ်ႉ ၶဝ်တေဢမ်ႇၵႂႃႇတၢင်းလႂ်ၼႆသေ ၵွပ်ႈၼႆလႄႈ ၶဝ်ၸင်ႇၵဵပ်းငိုၼ်း ၼမ် ဢၼ်ႁဝ်း ထၢင်ႇတႄႉ။ လႅင်းၵႃး ဢၼ်လႅၼ်ႈလၢင်းၶိူဝ်း – ႁူဝ်မိူင်းၼႆႉ တေလႆႈပဵၼ် လႅင်းၵႃး S3 တူဝ်ၵူၺ်း။ တၢင်ႇလႅင်းၵႃး ႁဵတ်းပႆႇ လႆႈ”- ဝႃႈၼႆ။
ၵူၼ်းပိုၼ်ႉတီႈ ဢွၼ်ၵၼ်ၼပ်ႉသွၼ်ႇၵၼ်ဝႃႈ လွင်ႈၵႃႈၵႃး လၢင်းၶိူဝ်း – ႁူဝ်မိူင်းၼႆႉ ယွၼ်ႉၵဵပ်းၼမ်ႁႅင်းၼႃႇလႄႈ ပေႃးတၢၼ်ႇ လုၵ်ႉလၢင်းၶိူဝ်းၵႂႃႇတႃႈၵုင်ႈ ၵႂႃႇမႃးလႆႈသွင်လွပ်ႈလူးၵွၼ်ႇ။ ယဝ်ႉၵေႃႈ တႃႇၶဝ်ႈပဵၼ်လႅင်းၵႃႈ ၼႂ်း S3 တူဝ် လၢင်းၶိူဝ်း – ႁူဝ် မိူင်းၼႆႉ တေလႆႈပၼ် 6 မိုၼ်ႇဝၢတ်ႇ (တူၵ်းငိုၼ်းမၢၼ်ႈ ဢမ်ႇယွမ်း 50 သႅၼ်ပျႃး) ဝႃႈၼႆ။
ၼွၵ်ႈလိူဝ်ၼၼ်ႉ တီႈၶူဝ်တႃႈသၢင်း မိူင်းတူၼ် – မိူင်းပၼ်ႇ ၵၢႆႇၸူးၵၼ်ၼၼ်ႉၵေႃႈ ၼႂ်းၵၢင်လိူၼ်ၵျုၼ်ႊၼႆႉၵူၺ်း သိုၵ်းမၢၼ်ႈ ဢၼ်ပႂ်ႉတီႈၶူဝ်ၼၼ်ႉ ႁႄႉရူတ်ႉၵႃးၵႂႃႇမႃးသေ ယွၼ်ႉငိုၼ်းၼမ်ႁႅင်း ၼပ်ႉႁူဝ်သႅၼ်ပျႃး ႁဵတ်းႁႂ်ႈၸဝ်ႈၵႃးၵႂႃႇမႃး ထူပ်းတၢင်းယၢပ်ႇၽိုတ်ႇ။
