မၢၵ်ႇလူင်တူၵ်းသႂ်ႇပၢင်သဝ်းၵူၼ်းပၢႆႈၽေး မိူင်းယၢင်းလႅင်

မၢၵ်ႇၵွင်ႈလူင် တူၵ်းသႂ်ႇ ဢွင်ႈတီႈၵူၼ်းပၢႆးၽေး တီႈဝဵင်း တီႊမူဝ်ႊသူဝ်ႉ( တီႈမွၵ်ႇသိူဝ်) ၵူၼ်းပၢႆႈၽေး ယၢပ်ႇၵိၼ်းလွင်ႈ တီႈယူႇတၼ်းသဝ်းလႄႈၶဝ်ႈၼမ်ႉတၢင်းၵိၼ်။

မိူဝ်ႈဝၼ်းတီႈ 10/6/2023 ၼၼ်ႉ ၾၢႆႇသိုၵ်းမၢၼ်ႈ ယိုဝ်းၵွင်ႈလူင်သႂ်ႇ ပၢင်သဝ်းၵူၼ်းပၢႆႈၽေးသိုၵ်း ဢၼ်မီးတၢင်းတူၵ်း ဝဵင်းတီႈမွၵ်ႇသိူဝ် (တီႊမူဝ်ႊသူဝ်ႉ) ၸႄႈမိူင်းယၢင်းလႅင်ၼၼ်ႉလႄႈ တီႈယူႇတၼ်းသဝ်း ၵူၼ်းပၢႆႈၽေးလူႉၵွႆၼမ်  လူဝ်ႇလွင်ႈၵမ်ႉၸွႆႈ ၶဝ်ႈၼမ်ႉတၢင်းၵိၼ်  ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈၸဵပ်းမၢတ်ႇတႄႉ ဢမ်ႇမီးၽႂ် ။ ၵူၺ်းၵႃႈ ဢွင်ႈတီႈယူႇတီႈသဝ်းတႄႉ ၺႃးမၢၵ်ႇလူင်တူၵ်းသႂ်ႇလႄႈ လူႉၵွႆဢေႃႈ ။ ဢွင်ႈတီႈၼႆႉ မၢၵ်ႇၵမ်းၵမ်းတူၵ်းသႂ်ႇၶႃႈယဝ်ႉ ။ တေဝႃႈ ၸုမ်းၸွႆႈတူင်ႇဝူင်းၵူၼ်းၶဝ်ၼႆၵေႃႈ ႁိုဝ်တေႁတ်းၶဝ်ႈထိုင်လႆႈ။ ဢမ်ႇလႆႈႁပ်ႉ လွင်ႈၵမ်ႉထႅမ်မႃး ၶၢဝ်းတၢင်း 2 လိူၼ်ယဝ်ႉဢေႃႈ။မိူဝ်ႈလဵဝ် ၶဝ်ႈၵိၼ်ၵေႃႈ ၶဝ်လူဝ်ႇဢေႃႈၼၼ်ႉ” – ဝႃႈၼႆ။

ၵူၼ်းပၢႆႈၽေးသိုၵ်းၸိူဝ်းယူႇသဝ်းၸွမ်းဢွင်ႈတီႈၼႆႉ ပေႃးငိၼ်းသဵင်ပၢင်တိုၵ်း ပၢႆႈသွၼ်ႈဝႆႉၸူဝ်ႈၶၢဝ်းသေ  ယွၼ်ႉဢမ်ႇမီးဢွင်ႈတီႈမႂ်ႇ တႃႇတေဝႄႈထႅင်ႈလႄႈ ၵႃႈလႆႈ ပွၵ်ႈယူႇသဝ်းၶိုၼ်းတီႈၵဝ်ႇ ၼႆယဝ်ႉ။

ၵူၼ်းပၢႆႈၽေးၸိူဝ်းၼႆႉ ပေႃးၼပ်ႉတူၺ်းလင်ႁိူၼ်းၸိုင် မီး 39 လင် ႁူဝ်ၼပ်ႉၵူၼ်းမီး 170 ပၢႆ ယွၼ်ႉၸုမ်းၸွႆႈတူင်ႇၵူၼ်းဢမ်ႇထိုင်မႃး 2 လိူၼ်ပၢႆယဝ်ႉလႄႈ မိူဝ်ႈလဵဝ် လူဝ်ႇလွင်ႈၵမ်ႉထႅမ် ယႃႈယႃလႄႈ ၶဝ်ႈၼမ်ႉတၢင်းၵိၼ်။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ လင်ႁိူၼ်းၵူၼ်းမိူင်း ယွၼ်ႉပၢင်တိုၵ်းသေ ၾႆးမႆႈလူႉၵွႆႈ 6 မိုၼ်ႇလင်ပၢႆ ၊ ၵူၼ်းၸိူဝ်းလႆႈ ပွႆႇပႅတ်ႈႁိူၼ်းယေးသေ ပၢႆႈသွၼ်ႈတီႈလွတ်ႈၽေး ႁူဝ်ၵူၼ်းမီးယူႇ 1.8 လၢၼ်ႉ ၼႆ ၸုမ်း  ကုလသမဂ္ဂ လူသားချင်းစာနာမှု ဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA)  ဢွၵ်ႇဝႆႉၼင်ႇၼႆ။