ပၢင်တၢၼ်ႈၶႆႈ ၵၢၼ်ႁဵၼ်း ပဵၼ်တၢင်းဢွၵ်ႇ ဢၼ်မီးၽူႈလူင်ႉလႅၼ်ႇလိၵ်ႈလၢႆးပၢႆပေႇ လၢႆၸဝ်ႈလၢႆၵေႃႉ တေမႃးတၢၼ်ႈၶႆႈၼၼ်ႉ တေၸတ်းႁၢင်လိူၼ်ၼႆႉ ႁွင်ႉမွၵ်ႇၽူႈသူၼ်ၸႂ်ၶဝ်ႈႁူမ်ႈထွမ်ႇငိၼ်း။

ဝၼ်းတီႈ 26/04/2018 တေမႃးၼႆႉ ၽူႈယႂ်ႇၵူၼ်းလူင်လႄႈ ၸုမ်းပွင်ၵၢၼ် ထုင်ႉပၢင်ႇလႅင်းသႂ် တေၸတ်းႁဵတ်း ပၢင်တၢၼ်ၶႆႈ “ ၵၢၼ်ႁဵၼ်း ပဵၼ်တၢင်းဢွၵ်ႇ ” The Forum ‘‘ Education Termed Only Way Out’’ တီႈထၢတ်ႈလႃႇၽႃႉသိတ်ႉထိ လွႆမုင်ႈမိူင်း၊ ထုင်ႉပၢင်ႇလႅင်းသႂ်၊ ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း။ ။

ၼႂ်းပၢင်ၼႆႉ တေမီးၽူႈလူင်ႉလႅၼ်ႇလိၵ်ႈလၢႆးပၢႆပေႇမိူၼ်ၼင်ႇ ၸဝ်ႈၶူးပႃႇမွၵ်ႉၶ Dr.ၼေႃႇၶမ်းလႃႉ ထမ်မသႃမိ    ဝဵင်းမိူင်းပဵင်း ၊ ၶူးပႃႇမွၵ်ႉၶ ၸၢႆးၶမ်းမိူင်း ဝဵင်းတူၼ်ႈတီး၊ ၶူးပႃႇမွၵ်ႉၶ Dr. ၸၢႆးၼေႃႇၶိူဝ်း ဝဵင်းတႃႈလိူဝ်ႇ၊ ၶူးႁိုၼ်းၵႃယၢင်း ဝဵင်းတႃႈၵုင်ႈ၊ ၶူးၼၢင်းဝႃႇၼု ဝဵင်းတူၼ်ႈတီး ၸိူဝ်းၼႆႉ ။

ၶူးပႃႇမွၵ်ႉၶ Dr. ၸၢႆးၼေႃႇၶိူဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵၢၼ်ႁဵၼ်းႁူႉပၢႆးပၺ်ၺႃၼႆႉ လမ်ႇလွင်ႈတႄႉ ပေႃးပၺ်ၺႃႁဝ်းၼမ် ၶိုၼ်ႈယႂ်ႇ ၸၼ်ႉၵူၼ်းႁဝ်းၵေႃႈတေသုင် ၼႂ်းဝၼ်းမိူဝ်ႈၼႆႉ ပေႃးႁဝ်းပူၵ်းပွင်ပၼ်ပၺ်ၺႃ လုၵ်ႈလၢၼ်ႁဝ်းၼမ်ၼမ် မိူဝ်းၼႃႈၸိူဝ်ႉၶိူဝ်းႁဝ်းၵေႃႈ တေၶိုၼ်ႈယႂ်ႇ ၵွပ်ႈၼၼ်လႄႈ ႁႂ်ႈပီႈၼွင်ႉတႆး ၵူႈၵေႃႉ သႂ်ႇၸႂ်ဝႆႉၼၵ်းၼိူဝ်ပၢႆးပၺ်ၺႃသေၵမ်း ၼင်ႇႁိုဝ် ၸိူဝ်ႉၶိူဝ်း ၊ ဝၢၼ်ႈမိူင်းႁဝ်းမိူဝ်းၼႃႈတေၶိုၼ်ႈယႂ်ႇၼၼ်ႉ ” ဝႃႈၼႆ။

လိူဝ်သေၸတ်းႁဵတ်းပၢင်တၢၼ်ႈၶႆႈယဝ်ႉ ၸတ်းႁဵတ်းပႃးပွႆးယၢတ်ႇၼမ်ႉ ႁူင်းထမ်းလူင်လႅင်းသႂ်ႁိူင်း၊ ၽြႃးလူင်၊ ၼၵႃးလူင် (8) တူဝ်၊ တၢင်းယၢင်၊ ႁွင်ႈၼမ်ႉ ႁွင်ႈၽၢႆႈ၊ ၵျွင်းသွမ်းလူင်သွင်ၸၼ်ႉ၊ ပွႆးသၢင်ႇလွင်းလႄႈ တၢင်ႇထီး  ၵွင်းမူး ၸိူဝ်းၼႆႉ။