မိူဝ်ႈဝၼ်းတီႈ 8/5/2023 ယၢမ်းၵၢင်ၶိုၼ်း 1 မူင်းၼၼ်ႉ ၸူၼ်ၶိုၼ်ႈ ႁိူၼ်းၵူၼ်းမိူင်းလင်ၼိုင်ႈ ၼႂ်းပွၵ်ႉ 7 ၸႄႈဝဵင်း ၵူတ်ႉၶၢႆ  ၸူၼ်ဢဝ်ငိုၼ်းတွင်းလႄႈ ၶိူင်ႈၶူဝ်းၸႂ်ႉသွႆႈၼႂ်းႁိူၼ်းယေးၵႂႃႇတင်းၼမ်။

ၵူၼ်းၸမ်ၸႂ်ၸဝ်ႈႁိူၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မီးၵူၼ်းၸၢႆးၸုမ်းၼိုင်ႈ ပူၵ်ႉၼႃႈပူၵ်ႉတႃႁေ ၶိုၼ်ႈႁိူၼ်းၶဝ်ယဝ်ႉၵေႃႈ ဢဝ်မိတ်ႈဢဝ်ၽႃႉငႃႁေ ၸႂ်ႉဢဝ် ၶူဝ်းၼႂ်းႁိူၼ်းၼႂ်းယေးဢွၵ်ႇၼႄၼႆဢေႃႈ။ ယဝ်ႉၵေႃႈ ပေႃႉထုပ်ႉပၼ် ၵူၼ်းဢၼ်ၶဝ် ၸၢင်ႈမႃးႁေႃႈၵႃးၼၼ်ႉ ၵွင်းလင်မၼ်းမၢတ်ႇၸဵပ်းဝႆႉဢေႃႈ။ ၸူၼ်ၶဝ်လႆႈၵႂႃႇ ငိုၼ်း 7 သႅၼ် ၊ ၾူၼ်း 2 လုၵ်ႈ ၊ ၵႃး 1 လမ်း ၊ သၢမ်လေႃႉ 1 လမ်း ၊ ရူတ်ႉၶိူင်ႈ 2 လမ်း ၸိူဝ်းၼႆႉဢေႃႈ ” – ဝႃႈၼႆ။

ႁိူၼ်းဢၼ်ၺႃးၸူၼ်ၼႆႉ ပဵၼ်ႁိူၼ်းၸဝ်ႈၶွင်ႁူင်းငၢၼ်းလဵင်ႉၵႆႇသေ မိူဝ်ႈၸူၼ်ၶဝ်ႈႁိူၼ်းၼၼ်ႉ ၵူၼ်းႁဵတ်းၵၢၼ်လႄႈၸဝ်ႈႁိူၼ်းတိုၵ်ႉယူႇၽွမ်ႉၼႃႈၽွမ်ႉတႃၵၼ်ဝႆႉဝႃႈၼႆ။ ၵဵဝ်ႇၵပ်းလွင်ႈၼႆႉသေ ၾၢႆႇၸဝ်ႈႁိူၼ်းၵႂႃႇတိူင်ႇလၢတ်ႈ ၽူႈမီးပုၼ်ႈၽွၼ်းဝႆႉယဝ်ႉသေတႃႉ ပႆႇႁၼ်လူင်းမိုဝ်းႁဵတ်းသင်ပၼ်ၼႆယဝ်ႉ။

ၵူၼ်းၸမ်ၸႂ်ၸဝ်ႈႁိူၼ်းၵေႃႉၼိုင်ႈသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၸူၼ်ၸိူဝ်းၼႆႉ ၶိုၼ်ႈၼိူဝ်ႁိူၼ်း 3 ၵေႃႉ။ တီႈၵိူၼ်ႇတူၼၼ်ႉသမ်ႉ ပႂ်ႉဝႆႉၵေႃႉၼိုင်ႈ ယဝ်ႉၵေႃႈ ၼိူဝ်ၵႃးၶဝ်ၼၼ်ႉၵေႃႈ မီးၵူၼ်းပႂ်ႉဝႆႉဢေႃႈ ။လွင်ႈၸိူဝ်းၼႆႉၵေႃႈ ၸဝ်ႈႁိူၼ်းၵႂႃႇတိူင်ႇလၢတ်ႈဝႆႉ တီႈၽူႈမီးပုၼ်ႈၽွၼ်းၶဝ်ဝႆႉယဝ်ႉၼင်ႇၵဝ်ႇ ၶဝ်ဝႃႈ တေၸွႆႈႁဵတ်းသၢင်ႈပၼ်ယူႇဝႃႈၼႆ ၵူၺ်းၼႃႇ ပႆႇႁၼ်တူင်ႉၼိုင်ႈႁဵတ်းသၢင်ႈသင်ပၼ်ၶႃႈ” – ဝႃႈၼႆ။

ၼႂ်းၸႄႈဝဵင်းၵူတ်ႉၶၢႆၼႆႉ ၵူၼ်းၵႃႉၶၢႆယႃႈမဝ်းၵမ်ၵေႃႈၼမ်လိူင်ႇ ၵူၼ်းသူႇသမ်းၵိၼ်ယႃႈၵေႃႈၼမ်မႃးၸွမ်း လွင်ႈၽူႈလၵ်ႉၵူၼ်းၸူၼ်ၶဝ်ႈထိုင်ၼႂ်းႁိူၼ်းၼႂ်းယေးၵေႃႈ မီးမႃးၶိူဝ်းယႂ်းလႄႈ ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။

ဢိင်ၼိူဝ်လွင်ႈၼႆႉသေ ၵူၼ်းမိူင်းၼႂ်းၸႄႈဝဵင်းၵူတ်ႉၶၢႆ လၢတ်ႈဝႃႈ – “ လွင်ႈလၵ်ႉလွင်ႈၸူၼ်ၵေႃႈ ၼမ်မႃးလႄႈ ၶႂ်ႈႁႂ်ႈ ၽူႈၵဵဝ်ႇၶွင်ႈ ၽူႈမီးပုၼ်ႈၽွၼ်းၶဝ်တင်းသဵင်ႈ ၸွႆႈၸတ်းပၼ်ႁႃၸိူဝ်းၼႆႉယွမ်းလူင်းသေ ႁႂ်ႈတီႉၺွပ်းပၼ်တၢင်းၽိတ်း ၽူႈၵေႃႇၵၢၼ်ႁၢႆႉၸိူဝ်းၼႆႉသေၵမ်း” – ဝႃႈၼႆ။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၵၢၼ်ဝၢၼ်ႈၵၢၼ်မိူင်းၵေႃႈ ဢမ်ႇၼိမ်သဝ်းလႄႈ ၽူႈလၵ်ႉၸၵ်ႉၶုတ်ႈၵေႃႈလိူင်ႇၼမ် မၢင်ၸႄႈဝဵင်း ၵူၼ်းမိူင်းၺႃးၸုမ်းဢမ်ႇႁူႉၾၢႆႇ တီႉၺွပ်းပဵၼ်တူဝ်ယိူဝ်ႇသေ ၵူၼ်းမိူင်း သဵင်ႈငိုၼ်းၼပ်ႉႁူဝ်ပၢၵ်ႇၸိူဝ်းၼႆႉၵေႃႈယၢမ်ႈမီးမႃး။