ၵူၼ်းမိူင်း/ ၸဝ်ႈၵႃး ၸိူဝ်းဢွၵ်ႇတႃႈပႆတၢင်း ၼႂ်းၵႄႈၼမ်ႉၸၢင် – လွႆလႅမ် ၵႆႉၺႃးၸူၼ်ၼမ် ႁဵတ်းႁႂ်ႈၵူၼ်းမိူင်းၵႂႃႇမႃး ဢမ်ႇမီး လွင်ႈႁူမ်ႇလူမ်ႈသင် ယူႇတီႈ ပလိၵ်ႈ/ သိုၵ်းမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်း ၵႂၢတ်ႇလၢင်ႉ ႁဵတ်းသင်ပၼ် ၼႆယဝ်ႉ။

ဝၼ်းတီႈ 26/4/2023 ယၢမ်းၵၢင်ၶိုၼ်းလိုၵ်း 11 မူင်းပၢႆ ၸဝ်ႈၵႃးလူင် 12 လေႃႉ လမ်းၼိုင်ႈ ထုၵ်ႇၵူၼ်းႁၢႆႉ ၸူၼ်တီႈႁိမ်း ဝၢၼ်ႈပၢင်ႇၶွၵ်ႈဝူဝ်း ၼိူဝ်သဵၼ်ႈတၢင်းလူင် လွႆလႅမ် – ၼမ်ႉၸၢင် ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ထုၵ်ႇ ၸူၼ်လႆႈ ၵႂႃႇငိုၼ်း 2 သႅၼ်ပျႃး ၼႆယဝ်ႉ။

ၵူၼ်းပိုၼ်ႉတီႈ ဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ၸဝ်ႈၵႃး 12 လေႃႉ ထုၵ်ႇၺႃးၸူၼ် ယၢမ်းၵၢင် ၶိုၼ်း လိုၵ်း 11 မူင်းပၢႆၼႆႉ။ ထုၵ်ႇၺႃးၸူၼ် တီႈႁိမ်းဝၢၼ်ႈပၢင်ႇၶွၵ်ႈဝူဝ်း တေလူင်းၵုင်းထႅင်ႈ 2 ၵူတ်ႉၼၼ်ႉ။ ၸဝ်ႈၵႃး 12 လေႃႉ ထုၵ်ႇၵူၼ်းႁၢႆႉ ဢဝ်မိတ်ႈငႃသေ ၸူၼ်လႆႈၵႂႃႇငိုၼ်း 2 သႅၼ်ပျႃး ၵတ်းၵႃႈ ဢမ်ႇတၢႆၵွၼ်ႇၶႃႈဢေႃႈ။ ဢွင်ႈတီႈၼၼ်ႈ ၸူၼ်ႁၢႆႉ ႁႅင်းၼႃႇ ၸဝ်ႈၵႃးလူင် 12 လေႃႉ 10 လေႃႉ ၸိူဝ်းၼႆႉ ၵႆႉၺႃးၼႃႇၶႃႈ”- ဝႃႈၼႆ။

ဢွင်ႈတီႈႁိမ်းၼၼ်ႉ ၸဝ်ႈၵႃး/ ၵူၼ်းမိူင်း ၸိူဝ်းဢွၵ်ႇတႃႈပၢႆတၢင်း ၵႆႉၺႃးၸူၼ်ၼမ် ဢိင်ၼိူဝ် လွင်ႈၼႆႉ ယူႇတီႈ ၵူၼ်းဝၢၼ်ႈ ႁူမ်ႈၵၼ်သေ တီႉၺွပ်းၵူၼ်းႁၢႆႉ ဢၢပ်ႈပၼ်ၼႂ်းမိုဝ်းပလိၵ်ႈလၢႆပွၵ်ႈယဝ်ႉ ၵူၺ်းၵႃႈ ဢမ်ႇ ဢဝ်လိူင်ႈလၢဝ်း ပၼ်တူတ်ႈတၢမ်ႇၼၵ်းၼႃသင် ဝႃႈၼႆ။

“ၵူၼ်းဝၢၼ်ႈႁူမ်ႈၵၼ် တီႉၺွပ်းၵူၼ်းႁၢႆႉၼၼ်ႉ မွၵ်ႈ 6 ၵေႃႉၼႆႉယဝ်ႉ ။ တီႉယဝ်ႉ ဢဝ်ၵႂႃႇဢၢပ်ႈပၼ် ၼႂ်းမိုဝ်းပလိၵ်ႈ ၵေႃႈ ၶဝ်ဢမ်ႇႁဵတ်းသင်ပၼ်။ ၵမ်ႉၵူၺ်း ၶဝ်ပေႃးပွႆႇတူဝ်ပၼ်ၶိုၼ်းယဝ်ႉ။ ၵူၼ်းႁၢႆႉၼၼ်ႉ ၶဝ်လိုၼ်ႈယဝ်ႉ ။ လွင်ႈတီႉသေပွႆႇ ၸိူဝ်းၼႆႉ ပေႃး ပိူၼ်ႈၵိုတ်းၵႃးၼႆ ၶဝ်ဢဝ်မိတ်ႈငႃသေ ၸူၼ်ပိူၼ်ႈ ၸိူင်ႉၼၼ်တိၵ်းတိၵ်း။ ပူၼ်ႉမႃး လၢႆဝၼ်းၼႆႉ ယၢမ်းၵၢင်ၶမ်ႈ 9 မူင်းပၢႆ ၵႃး ႁဝ်းၶႃႈ ထုၵ်ႇၵူၼ်းႁၢႆႉ ဢဝ်မၢၵ်ႇၵၢင်ႇၵွၼ်ႁိုဝ် ဢမ်ႇႁူႉ ပိုတ်းသႂ်ႇမၢၼ်ႇၵႃးႁဝ်းတႅၵ်ႇ ။ ၸၢၵ်ႇမၢၼ်ႇၼၼ်ႉ သဵၼ်သႂ်ႇမၢၵ်ႇတႃ ၵူၼ်း ၼႂ်းၵႃးသေ လႆႈမႃးသူင်ႇ ႁွင်ႈယႃ (ဆေးခန်း) တင်းၶိုၼ်းၶႃႈဢေႃႈ။ ၵတ်းၵႃႈ ဢမ်ႇတိူဝ်ႉႁူၺ်ႇတႃၵွၼ်ႇၶႃႈဢေႃႈ။ ပေႃးဢမ်ႇၸႂ်ႈတႄႉ တႃမွတ်ႇယဝ်ႉၶႃႈ ”- ၵူၼ်းဝဵင်းလွႆလႅမ် သိုပ်ႇလၢတ်ႈၼႄၼင်ႇၼႆ။

လွင်ႈၼႆႉ ပလိၵ်ႈ/ သိုၵ်းမၢၼ်ႈ ၸိူဝ်းၼၼ်ႉ ဢမ်ႇသႂ်ႇၸႂ် တူၺ်းထိုင်ပၼ်လွင်ႈႁူမ်ႇလူမ်ႈ ၵူၼ်းမိူင်း မိူၼ်တင်ႈ ၸႂ် ပွႆႇႁႂ်ႈၵူၼ်းႁၢႆႉလိူင်ႇၼမ်ၵူၺ်းဝႃႈၼႆ။

ဢွင်ႈတီႈၺႃးၸူၼ်ၼၼ်ႉ ၵူႈပွၵ်ႈ ပဵၼ်တီႈၸူၼ်လိူင်ႇႁၢႆႉ တီႈၼိုင်ႈ။ ၸင်ႇႁႃႁၢႆၵႂႃႇမွၵ်ႈၶၢဝ်းတၢင်း 7-8 ပီ ၽွင်းလူင်ပွင်ၸိုင်ႈၵူၼ်းမိူင်းလိူၵ်ႈတင်ႈၼႆႉၵူၺ်း။ ၸူဝ်ႈသိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း 2 ပီၼႆႉ ၸူၼ်ၶိုၼ်းလိူင်ႇၼမ်မႃး။ ၼမ်ႉၸၢင် – လွႆလႅမ်ၼႆႉ တေယၢၼ်ၵႆၵၼ်မွၵ်ႈ 20 လၵ်းပၢႆ ၵူၺ်း။