ၵူၼ်းၼုမ်ႇတႆး ႁူမ်ႈတင်း TSU ( ၸုမ်းၽွမ်ႉႁူမ်ႈလုၵ်ႈႁဵၼ်းတႆး) တေႁူမ်ႈၵၼ်ၸတ်းပၢင်သွၼ် ၽိူမ်ႉၼမ်ႉၵတ်ႉၵူၼ်းၼုမ်ႇ ၼိူဝ်ဢွၼ်ႊလၢႆႊ။
ပၢင်သွၼ်ၼႆႉ တေတႄႇဝၼ်းတီႈ 26/4/2023 တေႃႇထိုင်ဝၼ်းတီႈ 30/6/2023 ၶၢဝ်းတၢင်း 10 ဝူင်ႈ တီႈၼိူဝ်ဢွၼ်ႊလၢႆႊ သုမ်ႊ(Zoom) ၶၢဝ်းယၢမ်း ၵၢင်ၶမ်ႈ 7 မူင်း ထိုင် 8 မူင်းၶိုင်ႈ တေႁပ်ႉလုၵ်ႈႁဵၼ်းတႃႇ 25 ၵေႃႉ(ဢႃယု 15 ထိုင် 25 ပီ) ၼႆယဝ်ႉ။
ၽူႈတူင်ႉၼိုင်ၼႂ်းပၢင်သွၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၶႂ်ႈႁႂ်ႈၵူၼ်းၼုမ်ႇႁဝ်း မေႃၸႂ်ႉတိုဝ်း ၼႅင်ႈသၢၼ် ဢိၼ်ႇတႃႇၼႅတ်ႉ ႁႂ်ႈမီးလွင်ႈႁူမ်ႇလူမ်ႈတူဝ်ၵဝ်ႇ။ထႅင်ႈလွင်ႈၼိုင်ႈၵေႃႈ ႁႂ်ႈၵူၼ်းၼုမ်ႇႁူႉပွင်ႇလွင်ႈၵၢၼ်မိူင်း ၶိုတ်းတၼ်း သေဢမ်ႇၵႃး ဢမ်ႇၶႂ်ႈႁႂ်ႈ ၵူၼ်းၼုမ်ႇႁဝ်းတႅၵ်ႈယၢႆႈၵၼ် ၶႂ်ႈႁႂ်ႈၽွမ်ႉႁူမ်ႈၵၼ်ၼႆဢေႃႈ” – ဝႃႈၼႆ။
ၼႂ်းပၢင်သွၼ်ၼႆႉ တေမီးလၢႆလၢႆသႅၼ်း ဢၼ်တေပူင်သွၼ်ပိုၼ်ၽႄႈပၼ် မိူၼ်ၼင်ႇ သုၼ်ႇလႆႈသုၼ်ႇပဵၼ်ၵူၼ်း ၊ သိင်ႇဝႅၼ်ႉလွမ်ႉ ၊ ၼမ်ႉၵတ်ႉတူၼ်တူဝ် ၊ ပိုၼ်ႉႁူႉပၢႆးဢၢႆႊထီႊ IT ၊ ပိုၼ်ႉႁူႉၵၢၼ်မိူင်း ၊ Gender & Sex education ၸဵမ်ၸိူဝ်းၼႆႉသေ တေမီး 6 သႅၼ်း။
တႄႇပိုၼ်ၽၢဝ်ႇ ႁပ်ႉလုၵ်ႈႁဵၼ်းတႃႇယိုၼ်ႈဝႂ် Application Form မိူဝ်ႈဝၼ်းတီႈ 10/4/2023 သေ တေႁပ်ႉထိုင် ဝၼ်းတီႈ 21/4/2023။ တေတွင်ႈထၢမ် ဢိၼ်ႊတႃႊပိဝ်ႊလုၵ်ႈႁဵၼ်းၼႂ်းဝၼ်းတီႈ 22-23/4/2023။
ၽူႈတူင်ႉၼိုင်ၼႂ်းပၢင်သွၼ်ၵေႃႉၼိုင်ႈသိုပ်ႇလၢတ်ႈဝႃႈ- “ ဢၼ်ႁဝ်းၶႃႈ ႁပ်ႉလုၵ်ႈႁဵၼ်း ဢႃယု 15 တေႃႇထိုင် 25 ဢၼ်ဝႃႈၼၼ်ႉၵေႃႈ ၵွပ်ႈဝႃႈ ဢၼ်ႁဝ်းတေပိုၼ်ၽႄႈပၼ်ၼႆႉ မၼ်းတေပဵၼ်ၸၼ်ႉပိုၼ်ႉထၢၼ်မၼ်း ငဝ်ႈမၼ်း တႄႉတႄႉလႄႈ ယိူင်းၸူးဢႃယုမွၵ်ႈၼၼ်ႉဢေႃႈ။ ယဝ်ႉၵေႃႈ ႁပ်ႉ 25 ၵေႃႉ ဢၼ်ဝႃႈၼၼ်ႉၵေႃႈ ၶႂ်ႈႁႂ်ႈတူၺ်းထိုင် လႆႈၵူႈၵေႃႉႁဵတ်းၼႆဢေႃႈ” – ဝႃႈၼႆ။
ၵူၼ်းၼုမ်ႇတႆး ႁူမ်ႈတင်း TSU ( ၸုမ်းၽွမ်ႉႁူမ်ႈလုၵ်ႈႁဵၼ်းတႆး) ႁူမ်ႈၵၼ်ၸတ်းပၢင်သွၼ်မႃး ၵူႈသႅၼ်းသႅၼ်း ဢမ်ႇယွမ်း 4 ပွၵ်ႈ။ မိူၼ်ၼင်ႇ ၾၢႆႇပၢႆးပၺ်ႇၺႃႇလႄႈသင် ၾၢႆႇလွင်ႈပိုၼ်ႉႁူႉၵႅမ်တူဝ်ၸိူဝ်းၼႆႉ လႄႈသင် လဵပ်ႈႁဵၼ်းၵၢၼ်မိူင်းလႄႈသင် တႄႇၵႂႃႇၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ