လုၵ်ႈဢွၼ်ႇ ပၢႆႈၽေးသိုၵ်း တီႈဝဵင်းႁူဝ်ပူင်း 30 ပၢႆ ယၢပ်ႇၽိုတ်ႇဝႆႉ ၶိူင်ႈၵမ်ႉၵႅမ် ၼႂ်းၵၢၼ်သွၼ်ႁဵၼ်းလႄႈ မုင်ႈမွင်း ႁႂ်ႈမီးၸဝ်ႈတႃႇၼ တီႈၸမ်/ ၵႆ ယိုၼ်ႈမိုဝ်းၶဝ်ႈၸွႆႈထႅမ်။
ၼႂ်းၶၢဝ်းတၢင်းပီပၢႆမႃးၼႆႉ ဢွင်ႈတီႈပၢင်သဝ်းၵူၼ်းပၢႆႈၽေးသိုၵ်း တီႈဝၢၼ်ႈပၢင်လူင် ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်း ၸၢၼ်းၼၼ်ႉ ပိုတ်ႇႁူင်းႁဵၼ်း ပူင်သွၼ်ပၼ် လုၵ်ႈဢွၼ်ႇပၢႆႈၽေးသိုၵ်း မႃးႁင်းၶေႃၼႆသေတႃႉ ယွၼ်ႉၶိူင်ႈၵမ်ႉထႅမ် တႃႇၸႂ်ႉၼႂ်းႁူင်းႁဵၼ်း ဢမ်ႇတဵမ်ထူၼ်ႈလႄႈ ယၢမ်းလဵဝ် လုၵ်ႈဢွၼ်ႇ 30 ပၢႆ လႆႈၶၢတ်ႇၵၢၼ် ႁဵၼ်းဝႆႉ ဝႃႈၼႆ။
ၵူၼ်းပၢႆႈၽေးသိုၵ်း တီႈဝဵင်းႁူဝ်ပူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁူင်းႁဵၼ်း ဢွင်ႈတီႈပၢင်သဝ်းၵူၼ်းပၢႆႈၽေးႁဝ်းၶႃႈၼႆႉ ပိုတ်ႇ မႃးႁင်းၵူၺ်း မီးၶၢဝ်းတၢင်းပီပၢႆယဝ်ႉ ၵူၺ်းၵႃႈ တႃႇလုၵ်ႈဢွၼ်ႇႁဝ်းသမ်ႉ ၵမ်တႅမ်ႈ၊ ပပ်ႉလိၵ်ႈ ၸိူဝ်းၼႆႉ ဢမ်ႇၵုမ်ႇထူၼ်ႈၵၼ်။ ဢွင်ႈတီႈသွၼ် ႁဵၼ်းတႄႉ သင်ၶၸဝ်ႈၶဝ် ၸွႆႈဝႆႉလႄႈ မီးတီႈမၼ်းဝႆႉယူႇ”- ဝႃႈၼႆ။
ယၢမ်းလဵဝ် လုၵ်ႈဢွၼ်ႇပၢႆႈၽေးသိုၵ်း 30 ပၢႆၼႆႉ ၶၢတ်ႇၵၢၼ်ႁဵၼ်းဝႆႉ ယွၼ်ႉၶိူင်ႈၵမ်ႉထႅမ် ၼႂ်းၵၢၼ်သွၼ်ႁဵၼ်းၶၢတ်ႇလႄႈ ပႆႇမီးၸုမ်းလႂ် ၶဝ်ႈ မႃးၸွႆႈထႅမ်၊ တေၸႂ်ယႂ်ႇ ၵူၼ်းပၢႆႈၽေး ၵမ်ႉထႅမ်ပၼ်ၶိုၼ်းၵေႃႈ ဢမ်ႇပဵၼ်လႆႈ။ တႃႇတေ ၵိၼ်ၵႂႃႇၵူႈဝၼ်းၵူၺ်း ပေႃးထူပ်းယၢပ်ႇၽိုတ်ႇ ၵိၼ်း ၸႂ်ယဝ်ႉ ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။
“ပီႈၼွင်ႉၸိူဝ်းပၢႆႈမႃးသွၼ်ႈ တီႈၼႆႈၼႆႉ တႃႇတေမီးၼႃႈၵၢၼ်ႁဵတ်းသေ လႆႈငိုၼ်းမႃးၼႆႉၵေႃႈ ဢမ်ႇမီးၵၢၼ်ပဵၼ်လၵ်း ႁဵတ်းၵူႈဝၼ်းလႄႈ ယႃႇ ဝႃႈ တေၸွႆႈပၼ် ၼႂ်းၵၢၼ်ႁဵၼ်းလုၵ်ႈဢွၼ်ႇလႃႈ၊ တႃႇတေၵိၼ်ၵႂႃႇ ဝၼ်းလႂ်ဝၼ်းၼၼ်ႉၵူၺ်း ပေႃးယၢပ်ႇယဝ်ႉ။ ၽၵ်းတႃႇၵိၼ်ယႅမ်ႉၵေႃႈ လႆႈ ၽုၵ်ႇၵိၼ် ဢဝ်ႁင်းၵူၺ်းမူတ်းမူတ်းၶႃႈဢေႃႈၼႆႉ တႃႇတေသိုဝ်ႉၵိၼ်တႄႉ ယိုင်ႈၶႅၼ်းယၢပ်ႇယဝ်ႉ”- ။
လုၵ်ႈဢွၼ်ႇပၢႆႈၽေးသိုၵ်း ဢၼ်ၶၢတ်ႇၵၢၼ်ႁဵၼ်းဝႆႉၼႆႉ တေပဵၼ်လုၵ်ႈဢွၼ်ႇသႅၼ်းဢႃယု 4-5 ၶူပ်ႇ ၸိူဝ်းၼႆႉ။ ယၢမ်းလဵဝ် ႁူဝ်ၵူၼ်းပၢႆႈၽေး သိုၵ်း ဢၼ်ပၢႆႈမႃးသွၼ်ႈဝႆႉ တီႈဝဵင်းႁူဝ်ပူင်းၼႆႉ တေမီး 500 ပၢႆ ၵမ်ႈၼမ် တေႁဵတ်းၵၢၼ် ႁႃ ၵိၼ်လဵင်ႉတွင်ႉ သူၼ်ႁႆႈၼႃး ဝႃႈၼႆ။
ၵူၼ်းပၢႆႈၽေးသိုၵ်း တီႈဝၢၼ်ႈပၢင်လူင် ဝဵင်းႁူဝ်ပူင်းၼႆႉ ပဵၼ်ၵူၼ်းမိူင်း တၢင်းၸႄႈဝဵင်းၵျွၵ်ႉမႄး ပၢႆႈမႃးသွၼ်ႈယူႇသဝ်း မိူဝ်ႈပီ 2021 ယွၼ်ႉ ၸုမ်းဢူၺ်းလီပွတ်းႁွင်ႇ TNLA , SSPP တင်း RCSS ပိုတ်းယိုဝ်းၵၼ်မႃး ႁၢဝ်ႈႁႅင်း။ ၵူၼ်းမိူင်း ဢၼ်လႆႈပၢႆႈၽေးသိုၵ်းမႃးသမ်ႉ တေ ပဵၼ်ၵူၼ်းဝၢၼ်ႈ ၼႂ်းဢိူင်ႇပၢင်ႁူႈ၊ ဢိူင်ႇတေႃႉသၢင်ႇ၊ ဢိူင်ႇႁူးသူၼ်၊ ဢိူင်ႇၶိုမ်းလႄႈ ဢိူင်ႇပုင်းလူင် ၸိူဝ်းၼႆႉ။
