မိူဝ်ႈၼႆႉ ဝၼ်းတီႈ 23/3/2023 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်း မၢၼ်ႈ ၶႃႈႁႅမ်ၵူၼ်းမိူင်းတၢႆ ဢမ်ႇယွမ်း 30 ၵေႃႉ ၽွင်းပိုတ်ႇၼႃႈသိုၵ်း ၸူးၸုမ်းၵႅတ်ႇၶႄၵူၼ်းမိူင်း PDF ၼႂ်းၸႄႈဝဵင်းပၢင်လွင်းလႄႈ ၾၢႆၶုၼ် ၸိုင်ႈတႆးပွတ်းၸၢၼ်း ၼႂ်းၶၢဝ်းတၢင်းၸမ် 3 လိူၼ်မႃးၼႆႉ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “တႃႇငဝ်းလၢႆးဝၢၼ်ႈမိူင်း တေၵတ်းယဵၼ် ၵူၼ်းမိူင်းလႆႈယူႇသႃႇ ႁၢမ်းၽေးၶဵၼ်ၼၼ်ႉ ယင်းပႆႇႁၼ်သၢႆငၢႆမၼ်း ၸူဝ်ႈသိုၵ်းမၢၼ်ႈ တိုၵ်ႉၸႂ်ႉလၢႆးႁုၵ်းႁၢႆႉ ဢဝ်ၵွင်ႈၵၢင်ႇ ၵႄႈၶႆပၼ်ႁႃၵၢၼ် မိူင်း ဢၼ်ပဵၼ်ယူႇယၢမ်းလဵဝ်။ ပေႃးမီးၵၢင်ၸႂ် ၶႂ်ႈႁႂ်ႈဝၢၼ်ႈမိူင်းၵတ်းယဵၼ်ၶိုၼ်ႈယႂ်ႇမႂ်ႇသုင် မိူၼ်မိူင်းပိူၼ်ႈ။ ဢၼ်ၵူၼ်းမိူင်း ႁဝ်းလႆႈၵႂႃႇႁႃ ႁဵတ်းၵၢၼ်ပိုင်ႈဢိင်ပိူၼ်ႈယူႇၼၼ်ႉ သိုၵ်းမၢၼ်ႈတၵ်းလႆႈ ထွၼ်တူဝ်ဢွၵ်ႇ ၼႂ်း ၶၵ်ႉၵၢၼ်မိူင်းသေ ႁွင်ႉမွၵ်ႇၵူႈ ၾၢႆႇၾၢႆႇမႄးၶွတ်ႇၽွတ်ႈ ပိူင်ငဝ်ႈပိုင်းမိူင်း Constitution ႁႂ်ႈပဵၼ်လွၵ်းလၢႆးပိူင်မိူင်း Federal ၵူႈၸၢဝ်းၶိူဝ်း မီးလွင်ႈထၢင်ႇ ႁၢင်ႈ ဢုပ်ႉပိူင်ႇၽွင်းငမ်း လူၺ်ႈလၢႆးပိူင် Democracy ဢၼ်ၸိုၼ်ႈၸၢင်ႇ ၼၼ်ႉၵွၼ်ႇ ဝၢၼ်ႈမိူင်း ၸင်ႇတေလႆႈ ၸၢင်ႈၵတ်း ယဵၼ်တႄႉတႄႉ”- ဝႃႈၼႆ။
သိုၵ်းမၢၼ်ႈ ဢၼ်ပိုတ်ႇၼႃႈသိုၵ်း ၸူးၸုမ်းၵႅတ်ႇၶႄၵူၼ်းမိူင်း PDF ၼႂ်းၸႄႈဝဵင်းပၢင်လွင်းလႄႈ ၾၢႆၶုၼ် ၼႂ်းၸိုင်ႈတႆး ပွတ်းၸၢၼ်းၼႆႉ တင်ႈတႄႇႁူဝ်ပီ 2023 ၼႆႉမႃးသေ ၶႃႈႁႅမ်ၵူၼ်းမိူင်းတၢႆ ဢမ်ႇယွမ်း 30 ၵေႃႉ။ ၼႂ်းၼၼ်ႉ ၸႂ်ႉလၢႆးႁုၵ်ႉ ႁၢႆႉ ၶႃႈႁႅမ်ၵူၼ်းမိူင်းတၢႆ ပဵၼ်မူႇပဵၼ်ၵွင် ၼႂ်းဝၢၼ်ႈၼမ်ႉၼဵင်ႈ မိူဝ်ႈဝၼ်းတီႈ 11/3/2023 ၼၼ်ႉသမ်ႉ 21 ၵေႃႉ။ လိူဝ်ၼၼ်ႉ တႃႇ ၵူၼ်းမိူင်း 8 ၵေႃႉသမ်ႉ သိုၵ်းမၢၼ်ႈ ဢဝ်မၢၵ်ႇလူင် ယိုဝ်းသႂ်ႇၼႂ်းပိုၼ်ႉတီႈ ၵူၼ်းမိူင်းယူႇသဝ်း ၸိူဝ်း ၼၼ်ႉ။
ၼႂ်းၵူၼ်းမိူင်း ဢၼ်လႆႈလူႉတၢႆ ယွၼ်ႉသိုၵ်းမၢၼ်ႈ ၶႃႈႁႅမ်တၢႆ ၼႂ်းၶၢဝ်းတၢင်းၸမ် 3 လိူၼ် ႁူဝ်ၵူၼ်း 34 ၵေႃႉၼႆႉ သင်ၶၸဝ်ႈ 3 တူၼ်၊ ၽူႈၸၢႆး 26 ၵေႃႉ၊ ၽူႈယိင်း 5 ၵေႃႉ ၸွမ်းၼင်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လႆႈၵဵပ်းသဵၼ်ႈမၢႆဝႆႉၼင်ႇၼႆ။
သိုၵ်းမၢၼ်ႈ ဢၼ်ၶႃႈႁႅမ်ၵူၼ်းဝၢၼ်ႈပဵၼ်မူႇပဵၼ်ၵွင်သေ ၽဝ်ႁိူၼ်း 150 လင် ၼႂ်းဝၢၼ်ႈၼမ်ႉၼဵင်ႈၼၼ်ႉ ပဵၼ်တပ်ႉ ဢၼ် ယူႇ ပႃႈတႂ်ႈတပ်ႉၸုမ်းလူင် (တပ်ႉမ) 66 လႄႈတပ်ႉၶမယ 518 ဢၼ်ယူႇတႂ်ႈ ငဝ်ႈငုၼ်းၵုမ်းၵမ် ၽႅၼ်ၵၢၼ်ယၼ်ႇသိုၵ်း ၸၵၶ 2 လႄႈ တႂ်ႈတိူင်းသိုၵ်းဝၼ်းဢွၵ်ႇ ၸိူဝ်းၼႆႉ။
မိူဝ်ႈလဵဝ် ပၢင်တိုၵ်းသိုၵ်းမၢၼ်ႈ ဢၼ်မီးတင်းဢူၺ်းလီမၼ်း ၸုမ်းပျီႇတုၸိတ်ႉပဢူဝ်း PNO လႄႈ ၸုမ်း PDF ၼႆႉ တိုၵ်ႉ သိုပ်ႇပဵၼ်ပၢင်တိုၵ်း ၸွမ်းလႅၼ်လိၼ်တႆး-ယၢင်းလႅင် ၸႄႈဝဵင်းပၢင်လွင်းလႄႈၾၢႆၶုၼ်ဝႆႉယူႇ ၵဝ်ႉငဝ်ႈသုၼ်ႇလႆႈၵူၼ်း ဢွၵ်ႇၽိုၼ်တၢမ်းငဝ်း လၢႆးဝႆႉၼင်ႇၼႆ။
ၼႂ်းၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵူၼ်းမိူင်းတူၵ်းၵိၼ်းမႃးၵူႈၸိူဝ်းၵူႈလွင်ႈ ဢမ်ႇဝႃႈ လွင်ႈယူႇ တၼ်းသဝ်း၊ ၵၢၼ်ႁႃၵိၼ်လဵင်ႉတွင်ႉ၊ ၵပ်ႉၵိၼ်းၶိုၼ်ႈမႃး။ လွင်ႈ ၵၢၼ်ၵပ်းသိုပ်ႇၵပ်းသၢၼ် ယၢပ်ႇၽိုတ်ႇႁၢဝ်ႈႁႅင်း ၵူၼ်းမိူင်း ဢမ်ႇလႆႈႁပ်ႉႁူႉၶေႃႈမုလ်းၶၢဝ်ႇသၢၼ် ၶိုတ်းတၼ်း၊ မီးလွင်ႈတတ်း လႅင်းၼႅတ်ႇ ပဵၼ်တီႈပဵၼ်ဢွင်ႈ။ ၽူႈလၵ်ႉၵူၼ်းၸူၼ်လိူင်ႇ မႃး။ လွင်ႈၵႂႃႇမႃး ဢွၵ်ႇတႃႈဢွၵ်ႇတၢင်းၵေႃႈ ယၢပ်ႇၽိုတ်ႇ ဢမ်ႇမီး လွင်ႈ ထၢင်ႇႁၢင်ႈ။ ပေႃးပဵၼ် ၼႂ်းပိုၼ်ႉတီႈ ဢၼ်ပဵၼ်ပၢင် တိုၵ်းသိုၵ်းသိူဝ်ၶႅၼ်းယၢပ်ႇတႄႉတႄႉ ၸၢႆးႁေႃသႅင် လၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ