ပၢင်တေႃႇလွင်း တီႈဝဵင်းပၢင်လူင် ၸတ်းႁဵတ်းမႃးၶၢဝ်းတၢင်း 10 ဝၼ်းပၢႆ သူင်ႇသဵင်လင်ယၢမ်းၵၢင်ၶမ်ႈၵၢင်ၶိုၼ်း ၵူၼ်းမိူင်းဢမ်ႇၸၢင်ႈလပ်းၸၢင်ႈၼွၼ်း တုၵ်းယွၼ်းႁႂ်ႈၸဵဝ်းၵိုတ်းပိၵ်ႉပၢင်တေႃႇလွင်းဝႃႈၼႆ။
ပၢင်တေႃႇလွင်းၼႆႉ ပိုတ်ႇဝႆႉတီႈ ၽြႃးလေးသူး ၾၢႆႇတူၵ်းၵျွင်းဝၢၼ်ႈဢႅၼ်ႇ ၼႂ်းဝဵင်းပၢင်လူင် ၸႄႈဝဵင်းလွႆလႅမ်။ တႄႇပိုတ်ႇမႃးၸဵမ်မိူဝ်ႈဝၼ်းတီႈ 31/01/2023 ။ ပိုတ်ႇယၢမ်းၵၢင်ဝၼ်းလႄႈတင်းၵၢင်ၶိုၼ်း။ မီးပႃးပၢင်မူၼ်ႈသိူဝ်းပၢၼ်မႂ်ႇထႅင်ႈလႄႈ ႁဵတ်းႁႂ်ႈသဵင် ၽဵင်းၵႂၢမ်း ဢိၵ်ႇသဵင်ႁုၼ်ႉမေႃးလင်ႁႅင်း ဢႃးလႃး ၵူၼ်းမိူင်းဢမ်ႇၸၢင်ႈလပ်းဢမ်ႇၼွၼ်း ထူပ်းတၢင်းယၢပ်ႇၽိုတ်ႇႁႅင်း တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ။
ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ သဵင် တွႆႇတိုင်ႈ သဵင်ၽဵင်းၵႂၢမ်း ႁွင်ႉၵႂၢမ်းမၢၼ်ႈၵႂၢမ်းတႆး မေႃးလင်ၵူႈၶမ်ႈၶိုၼ်း။ ပေႃးပဵၼ်ၵူၼ်း ဢမ်ႇယူႇလီတႄႉ တေၸႂ်ၸႃႉသေ တေဢမ်ႇၸၢင်ႈၼွၼ်းၸၢင်ႈလပ်းသေဢိတ်းယဝ်ႉၶႃႈ ။ တေႃႈၼင်ႇ ႁဝ်းၶႃႈ ယူႇၵႆတၢၼ်ႇၼႆႉ ယင်းလႆႈငိၼ်းသဵင်လင်ႁႅင်းၸိူင်ႉၼႆ။ ၵူၼ်းၸိူဝ်းယူႇၸမ်ပၢင်တေႃႇလွင်းၼၼ်ႉ ၶဝ်တေႁဵတ်းႁိုဝ်ၼွၼ်းလပ်းၵၼ်”- ဝႃႈၼႆ။
ၾၢႆႇၼိုင်ႈ ၸူဝ်ႈပၢင်တေႃႇလွင်းမီးမႃးၵူႈဝၼ်းၼႆႉ ၽူႈလၵ်ႉၵူၼ်းၸူၼ်ၵေႃႈၶိုၼ်းလိူင်ႇၼမ်မႃးၵူႈမိုဝ်ႉၵူႈဝၼ်း။
ၵွပ်ႈၼႆလႄႈ ယူႇတီႈ ၵူၼ်းပိုၼ်ႉတီႈ တုၵ်းယွၼ်း ႁႂ်ႈၵိုတ်းယင်ႉ ပၢင်တေႃႇလွင်းၼႆႉ ၶၼ်ၶၼ်ၽႂ်းၽႂ်း သေၵမ်းဝႃႈၼႆ။
ၵူၼ်းပိုၼ်ႉတီႈ ဝဵင်းပၢင်လူင် ၼၢင်းယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းၶႃႈတႄႉ မုင်ႈမွင်း ႁႂ်ႈပိူၼ်ႈၵိုတ်းၼႃႇယဝ်ႉ။ ပေႃးမီးပၢင်တေႃႇလွင်းၵေႃႈ ၽူႈလၵ်ႉၵူၼ်း ၸူၼ်ၼႆႉ လိူင်ႇၼမ်။ လွင်ႈၵူၼ်းမိူင်းယၢပ်ႇၽိုတ်ႇၸွမ်းၼႆႉ ၸဝ်ႈတႅင်ႇပၢင်လွင်း ဢမ်ႇသူၼ်ၸႂ်သင်။ ၵူၼ်းမိူင်းၵေႃႈ ဢမ်ႇၸၢင်ႈ ၵႂႃႇတိူင်ႇလၢတ်ႈတီႈလႂ်။ ပေႃးၵႂႃႇတိူင်ႇလၢတ်ႈၼႆၵေႃႈ ၶဝ်သမ်ႉ ပေႃးပဵၼ်သၢႆလဵဝ်ၵၼ် မူတ်းယဝ်ႉ ” – ဝႃႈၼႆ။
ပၢင်တေႃႇလွင်း ဢၼ်မႃးပိုတ်ႇတီႈၾၢႆႇတူၵ်းၵျွင်းဝၢၼ်ႈဢႅၼ်ႇၼႆႉ ၸဝ်ႈတႅင်ႇလူင်မၼ်း ပဵၼ်ၸဝ်ႈတႅင်ႇၵေႃႉၵဝ်ႇ ဢၼ်ယၢမ်ႈ ၵႂႃႇပိုတ် တီႈဝၢၼ်ႈၼွင်ႁူး ဝဵင်းလွႆလႅမ်ၼၼ်ႉ။ တီႈၼၼ်ႈတႄႉ လႆႈပိၵ်ႉဢိုတ်းမႃးယဝ်ႉသေ ၶိုၼ်းၶၢႆႉမႃးပိုတ်ႇတီႈႁိူၼ်းမၼ်း တၢင်းၾၢႆႇတူၵ်းၵျွင်းဝၢၼ်ႈဢႅၼ်ႇ ဝဵင်းပၢင်လူင်ၼႆႉ ဝႃႈၼႆ။
ၵူၼ်းပိုၼ်ႉတီႈဝႃႈ ၸဝ်ႈမိုဝ်းၸဝ်ႈတႅင်ႇ ဢၼ်ႁဵတ်းပၢင်တေႃႇလွင်း ယူႇၼႂ်းထုင်ႉၼႆႉ ပဵၼ်ၵူၼ်းၸမ်ၸႂ်ၵၼ်တင်းတပ်ႉသိုၵ်း မၢၼ်ႈ။ ၵဵဝ်ႇၵပ်း လွင်ႈပၢင်တေႃႇလွင်းၼႆႉ ၽူႈတွႆႇႁွၵ်ႈၶတ်းၸႂ်ႁႃတၢင်းတႃႇၵပ်းသိုပ်ႇယူႇၵေႃႈ ၵပ်းသိုပ်ႇပႆႇလႆႈ။
ဝၢႆးသိုၵ်းမၢၼ်ႈ ယိုတ်းမိူင်းမႃး 2 ပီပၢႆၼႆႉ တင်ႈၸႂ် ပွႆႇပၢင်တေႃႇလွင်း ၼႂ်းမိူင်းတႆးလိူင်ႇၽႄႈၼမ် ႁဵတ်းႁႂ်ႈၵူၼ်းမိူင်း/ ၵူၼ်းၼုမ်ႇ ၼႂ်းပိုၼ်ႉတီႈ ဢွၼ်ၵၼ်ဢၵျၢင်ႉတၢင်းယၢမ်ႈလူႉ၊ ၽူႈလၵ်ႉၸၵ်ႉၶုတ်ႈ၊ ယႃႈမဝ်းၵမ် လိူင်ႇၼမ်မႃးလိူဝ်ႇၵဝ်ႇ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ