လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) ၸႄႈဝဵင်းမိူင်းၵိုင် ပႃႇတီႇႁူဝ်သိူဝ် SNLD တၢင်ႇထိုင် ၼႂ်းပၢင်ၵုမ်သၽႃးဝႃႈ ဝၼ်းၸိူဝ်ႉၸၢတ်ႈၸိုင်ႈတႆး ဝၼ်းတီႈ 7 လိူၼ်ၾႅပ်ႊၿိဝ်ႊရီႊ ႁႂ်ႈပဵၼ်ဝၼ်းဢိုတ်း လုမ်း ၼႂ်းမိူင်းတႆး။
ၵဵဝ်ႇၵပ်းၶေႃႈတၢင်ႇ လုင်းၸၢႆးလူင်ၼႆႉသေ ဝၼ်းတီႈ 30/03/2018 ပၢင်ၵုမ်သၽႃးမိူင်းတႆး ၸတ်းႁဵတ်းပၢင်တွတ်ႈ ၶႅပ်းၵၢင်ၸႂ်။ ၵူၺ်းၵႃႈ လႆႈသုမ်းၵၢၼ်ႉၵႂႃႇ ၶႅပ်းၵၢင်ၸႂ်ၼိုင်ႈၶႅပ်းလႄႈ ၶေႃႈတၢင်ႇထိုင် ထုၵ်ႇပၢၵ်ႈပႅတ်ႈ။
လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ (2) ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ၽွင်းတႅၼ်းၽူႈတွတ်ႈၶႅပ်းၵၢင်ၸႂ် မီး 117 ၵေႃႉ ဢၼ်ႁၼ်လီၵမ်ႉထႅမ် တွတ်ႈၶႅပ်းသဵင်ပၼ်သမ်ႉ တင်းမူတ်း 58 ၶႅပ်း၊ ဢၼ်သၢၼ် ၶတ်းသမ်ႉ 59 ၶႅပ်း တေလႆႈဝႃႈ တူၵ်းသုမ်း 1 ၶႅပ်း” ဝႃႈၼႆ။
ပႃႇတီႇဢၼ်ၵမ်ႉထႅမ်သမ်ႉ မိူၼ်ၼင်ႇ ပႃႇတီႇတႆး၊ ပႃႇတီႇတဢၢင်း၊ ပႃႇတီႇၵူဝ်းၵၢင်ႉ၊ ပႃႇတီႇတၼုလႄႈ ပႃႇတီႇသၢင်ႇ သီႈၵမ်ႈၽွင်ႈ။ ဢၼ်သၢၼ်ၶတ်းတႄႉ ၵမ်ႈၼမ် ပဵၼ်ၽူႈတႅၼ်းတပ်ႉသိုၵ်းမၢၼ်ႈ။
လုင်းၸၢႆးလူင် သိုပ်ႇလၢတ်ႈဝႃႈ “ပေႃးသွၼ်ႇတူၺ်း ၼႂ်းသၽႃးမိူင်းတႆးႁဝ်းၼႆၸိုင် တူဝ်တႅၼ်းတပ်ႉသိုၵ်းမၢၼ်ႈ ပေႃးမီး 25 ပိူဝ်ႊသႅၼ်ႊယဝ်ႉ။ ပေႃးႁူမ်ႈပႃး ပႃႇတီႇသၢင်ႇသီႈၶဝ်ထႅင်ႈသေ ၶဝ်ပေႃးပေႉပႃႇတီႇၸၢဝ်းၶိူဝ်းယဝ်ႉ” ဝႃႈၼႆ။
ဝၼ်းတီႈ 29/03/2018 မိူဝ်ႈဝႃးၼၼ်ႉ ယူႇတီႈလုင်းၸၢႆးလူင် လႆႈတၢင်ႇထိုင် ၼႂ်းပၢင်ၵုမ်သၽႃးမိူင်းတႆးၵႂႃႇ ႁႂ်ႈမၵ်း မၼ်ႈဝၼ်းၸိူဝ်ႉၸၢတ်ႈၸိုင်ႈတႆး ပဵၼ်ဝၼ်းဢိုတ်းလုမ်းပဵၼ်တၢင်းၵၢၼ်။ ထိုင်မႃး ဝၼ်းမိူဝ်ႈၼႆႉ ၸင်ႇတေမႃး ဢုပ်ႇ ဢူဝ်းၵၼ်သေ တႅပ်းတတ်းတွတ်ႈၶႅပ်းၵၢင်ၸႂ် ၵႂႃႇ ဝႃႈၼႆ။
ၵဵဝ်ႇၵပ်းလွင်ႈလႆႈသုမ်းၵၢၼ်ႉၵႂႃႇ ဢမ်ႇမၵ်းမၼ်ႈ ဝၼ်းဢိုတ်းလုမ်းပဵၼ်တၢင်းၵၢၼ် ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ဝၼ်းတီႈ 7 လိူၼ်ၾႅပ်ႊၿိဝ်ႊရီႊၸိုင် ယူႇတီႈလုမ်းသၽႃးမိူင်းတႆး လႆႈတႅမ်ႈၽိုၼ်မၢႆတွင်းဝႆႉၵူၺ်း ဝႃႈၼႆ။
