မိူဝ်ႈၼႆႉဝၼ်းတီႈ 25/12/2022 ယၢမ်းၵၢင်ၼႂ်ၸဝ်ႉ 3 မူင်း သိုၵ်းမၢၼ်ႈၶဝ်ႈတီႉၺွပ်း ၵူဝ်ႇၵျေႃႇၸေႇယ ၽူႈထတ်းလိၵ်ႈ ဢႄႇတီႇတိူဝ်ႇ ႁွင်ႈၵၢၼ်ၶၢဝ်ႇ ၵမ်ႇပေႃးၸ တၢႆး တီႈဝဵင်းတႃႈၵုင်ႈ။
ၵူဝ်ႇၵျေႃႇၸေႇယ ၼႆႉဝၢႆးလင်သိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်း ၊ မၼ်းၸၢႆးလႆႈပၢႆႈသွၼ်ႉတူဝ်ဝႆႉတီႈၼိုင်ႈယဝ်ႉတီႈၼိုင်ႈ။ မိူဝ်ႈၼႆႉယၢမ်းၵၢင်ၼႂ်သိုၵ်းမၢၼ်ႈၵႂႃႇတီႉၺွပ်းလႆႈမၼ်းတီႈႁိူၼ်းလင်ၼိုင်ႈ ၼႂ်းၸႄႈဝဵင်းၵျဵဝ်ႉပိၼ်ႇၵွၵ်ႉ တိူင်းပႃႇၵိူဝ်။
“သိုၵ်းမၢၼ်ႈပလိၵ်ႈမၢၼ်ႈ တင်းၼမ် ပႃးတင်းၵွင်ႈၵၢင်ႇသေ မႃးတီႉမၼ်းတီႈႁိူၼ်း တီႈၵျဵဝ်ႉပိၼ်ႇၵွၵ်ႉ။ ယၢမ်းလဵဝ် တူဝ်မၼ်းၵေႃႈ သိုၵ်းမၢၼ်ႈတီႉဝႆႉမီးတီႈ ၵျဵဝ်ႉပိၼ်ႇၵွၵ်ႉၵူၺ်း။ ဢမ်ႇပႆႇပၼ်ၵူၼ်းႁိူၼ်း ႁူပ်ႉထူပ်း။ လီမႆႈၸႂ် ၵူဝ်သိုၵ်းမၢၼ်ႈ ပေႃႉထုပ်ႉႁႅင်း ၵူဝ်ပူၼ်ႉတိၼ်ပူၼ်ႉမိုဝ်းၵႂႃႇၵူၺ်းၶႃႈၼေႈ ” – ၵူၼ်းႁိူၼ်းမၼ်းၵေႃႉၼိုင်ႈလၢတ်ႈၼင်ႇၼႆ။
ၵူဝ်ႇၵျေႃႇၸေႇယ ၼႆႉ တႄႇႁပ်ႉပဵၼ်ၼႃႈတီႈပုၼ်ႈၽွၼ်း ၽူႈထတ်းထွင်လိၵ်ႈ ဢႄႇတီႇတိူဝ်ႇ တီႈႁွင်ႈၵၢၼ်ၶၢဝ်ႇ ၵမ်ႇပေႃးၸ တၢႆး (ဢၼ်ပၵ်းလုမ်း ဝဵင်းလူင်တူၼ်ႈတီး မိူင်းတႆး) မိူဝ်ႈပီ 2017။ ဝၢႆးလင်သိုၵ်းမၢၼ်ႈယိုတ်းမိူင်းမႃး တႅမ်ႈၶၢဝ်ႇလွင်ႈၵူၼ်းမိူင်းၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ၊ တႅမ်ႈၶၢဝ်ႇလွင်ႈသိုၵ်းမၢၼ်ႈ ပေႃႉထုပ်ႉတီႉၺွပ်းၵူၼ်းမိူင်း လႄႈ ၺႃးသိုၵ်းမၢၼ်ႈ ပိုၼ်ၽၢဝ်ႇတီႉၺွပ်း ဢဝ်လိူင်ႈလူၺ်ႈ မၢႆမီႈမတ်ႉတႃ 505 ၵ ၊ ဢိၵ်ႇပႃးတင်း တၢင်းၽိတ်းလၢႆလၢႆဢၼ်ဝႆႉ။ ထိုင်မႃး 2021 လိူၼ်မၢတ်ႉၶျ် မၼ်းၸၢႆးပၢႆႈလွတ်ႈဝႆႉသေ သိုၵ်းမၢၼ်ႈတီႉၺွပ်းဢဝ်မေးၼၢင်းမၼ်းလႄႈ ၽူႈသိုဝ်ႇၶၢဝ်ႇတီႈႁွင်ႈၵၢၼ်ၶၢဝ်ႇ ၵမ်ႇပေႃးၸ တၢႆး 4 ၵေႃႉသေၵုမ်းၶင်ၶွၵ်ႈလႆႈပီပၢႆ။ ပီ 2022 လိူၼ်ဢွၵ်ႊထူဝ်ႊပိူဝ်ႊပူၼ်ႉမႃးၼႆႉ ၸင်ႇပူၼ်ႉတူတ်ႈတၢမ်ႇသေလွတ်ႈဢွၵ်ႇၶွၵ်ႈမႃး။
ၸူဝ်ႈသိုၵ်းမၢၼ်ႈယိုတ်းမိူင်းမႃးၼႆႉ သင်ႇပိၵ်ႉႁွင်ႈၵၢၼ်ၶၢဝ်ႇယႂ်ႇလူင်ဢၼ်ဢွၵ်ႇတၢင်းလိၵ်ႈမၢၼ်ႈ 4 ဢၼ်။ လိူဝ်ၼၼ်ႉ ပိုၼ်ၽၢဝ်ႇဢဝ်လိူင်ႈဝႆႉထႅင်ႈလၢႆလၢႆႁွင်ႈၵၢၼ်။ သိုၵ်းမၢၼ်ႈတီႉၺွပ်း ၽူႈသိုဝ်ႇၶၢဝ်ႇ 100 ပၢႆ ။ ယၢမ်းလဵဝ် မီးဝႆႉၼႂ်းၶွၵ်ႈ 40 ပၢႆ။ ၸုမ်းပၵ်းတႃသုၼ်ႇလႆႈၵူၼ်း လုမ်ႈၾႃႉလၢတ်ႈဝႃႈ မိူင်းမၢၼ်ႈၵေႃႈပဵၼ်မိူင်းဢၼ်တီႈၺွပ်းၽူႈသိုဝ်ႇၶၢဝ်ႇၼမ်သုတ်းမိူင်းၼိုင်ႈၼႂ်းလုမ်ႈၾႃႉ။ မိူင်းဢၼ်တီႉၺွပ်းၽူႈသိုဝ်ႇၶၢဝ်ႇၼႆႉပဵၼ်မိူင်းဢၼ် လွင်ႈႁုၼ်ႈမုၼ်းမႂ်ႇသုင် တူၵ်းလႃႈတူၵ်းလိုၼ်းသုတ်းၼႂ်းလုမ်ႈၾႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ