ၸဝ်ႈသၢင်ႇဢွၼ်ႇ တီႈဝဵင်းၼမ့်ၶမ်း ပဵၼ်တၢင်းပဵၼ်မိုဝ်းၵႂ်ႈ လူဝ်ႇတၢင်းၸွႆႈထႅမ် တႃႇယူတ်းယႃ။
ၸဝ်ႈသၢင်ႇဢွၼ်ႇၼႆ့ ၸိုဝ်ႈႁွင်ႉၸဝ်ႈၵေႇသရ ဢႃယု 12 ၶူပ်ႇ ၸိုဝ်ႈပေႃႈ ဢူးၼႅင်ႇဢွင်ႇတဵင်း ၸိုဝ်ႈမႄႈ ပႃႈဢူင်းမေႇ ယူႇဝၢၼ်ႈသၵ်း(မန်စပ်) ၸႄႈဝဵင်းၼမ့်ၶမ်း ၸိုင်ႈတႆးပွတ်းႁွင်ႇ။
ၸဝ်ႈၸၢင်းသီႁၼၼ်ႇတ ဝတ့်မၢၼ်ႈတူင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ၸႂ်ႈဢေႃႈပဵၼ်ၸဝ်ႈသၢင်ႇဢွၼ်ႇ တီႈၵျွင်းႁဝ်းၼႆ့ယဝ့် ။ ၶိုၼ်ႈၵျွင်းထိုင်တၢၼ်းသွင်ယဝ့်ဢေႃႈၼၼ့်။ ပေႃႈမႄႈၶဝ်ဝႃႈတႄ့ ယူႇၸွမ်းဝၢၼ်ႈ ၼွၵ်ႈၼႃးပၢင်ႇဢွၼ်ႇၵူၺ်းလႄႈ ဢမ်ႇႁူႉတေလႆႈယူတ်းယႃ။ ထိုင်မိူဝ်ႈလဵဝ်ၵေႃႈ ယင်းပႆႇႁူႉဝႃႈ ပဵၼ်ယွၼ့်သင်တေ့တေ့။ ၸဝ်ႈသၢင်ဢွၼ်ႇၵေႃႈ ၶၢင်းဝႃႈ မိုဝ်းၼၵ်းမိုဝ်းၶိုၼ်ႈၼႆသေ မိုဝ်းၵေႃႈယႂ်ႇမႃးတိၵ်းတိၵ်း။ ၵေႃႉယႂ်ႇမႃးၵေႃႈသမ့်မေႃဢၢႆပိူၼ်ႈမႃးၼၼ့်ၼႃႇ ပေႃးႁိုင်မႃး ၵူဝ်တိူဝ့်ပႃးပၢႆးၸႂ်ထႅင်ႈၼၼ့်ယဝ့် ၸင်ႇၶႂ်ႈႁႂ်ႈယူတ်းယႃပၼ်တူၺ်း”- ဝႃႈၼႆ။
မိူဝ်ႈလဵဝ် ယူႇတီႈ ၸုမ်းၾၢႆႇသင်ႇၶႃႇၸဝ်ႈတဢၢင်းသေ ၶိုင်တေသူင်ႇတူဝ်ၸဝ်ႈသၢင်ႇဢွၼ်ႇ ၵႂႃႇၼႄ ႁူင်းယႃလူင် တိူင်းၸႄႈၵႅင်း ၵူၺ်းၵႃႈပႆႇမီးၸဝ်ႈတႃႇၼတႃႇၸွႆႈထႅမ်ၵႃႈယူတ်းယႃ။
ၸဝ်ႈၸၢင်းသီႁၼၼ်ႇတ ဝတ့်မၢၼ်ႈတူင်ႈ လၢတ်ႈၼႄထႅင်ႈဝႃႈ-“တၢင်းပဵၼ်ၸိူင့်ၼႆႁဝ်းၵေႃႈ ပႆႇယၢမ်ႈႁၼ် တေလႆႈၵိၼ်ယႃသမ်းယႃႁႃ့ တေလႆႈၽႃႇတတ်းႁႃ့ ပႆႇႁူႉ။ ပႂ်ႉတူၺ်းမေႃယႃၶဝ်လၢတ်ႈၵွၼ်ႇ တႃႇတေယူတ်းယႃၼႆ့ ပဵၼ်ႁိုဝ်ၵေႃႈ ၸၢင်ႈၶၢဝ်းယၢဝ်းယူႇ ၵွပ်ႈၼၼ် တႃႇယူႇသဝ်း တႃႇၵိၼ်ယႅမ့်ၼႆ့ တေၵိၼ်းၸႂ်ဢေႃႈ။ ယွၼ့်ၼၼ် ယွၼ်းလူႇၶၢမ်ႇ တီႈတၵႃႇၶဝ်ၽွင်ႈ ”- ဝႃႈၼႆ။
ဢၼ်ပဵၼ်မိုဝ်းၵႂ်ႈၼႆႉ ပဵၼ်ၵိူတ်ႇပႃးၸွမ်းမႃးလႄႈ ထုၵ်ႇလီၵႂႃႇၵူတ်ႇထတ်းတူၺ်းၵွၼ်ႇၸွင်ႇတေႁူႉလွင်ႈတၢင်းမၼ်းလႄႈတေၸၢင်ႈယူတ်းယႃလႆႈ ၾၢႆႇမေႃယႃ ဝဵင်းၼမ်ႉၶမ်းၵေႃႈလၢတ်ႈၼင်ႇၼႆ။
မေႃယႃယိင်း ဢႃယု 40 ၵေႃ့ၼိုင်ႈလၢတ်ႈဝႃႈ-“ တၢင်းပဵၼ်ၸိူင့်ၼႆတႄ့ ဢမ်ႇသူႈမီး ပေႃးမီးၵေႃႈ မိူၼ်ၼင်ႇ လုၵ်ႈဢွၼ်ႇၶဝ် ဢဝ်ၼင်ယိုတ်ႈ သုပ်းၶေႃႈမိုဝ်းဝႆ့ ပေႃးႁိုင်မႃး ၸၢင်ႈႁဵတ်းႁႂ်ႈ လိူတ်ႈဢမ်ႇလေႃႈလီသေ ၽႃႇမိုဝ်းၸၢင်ႈၵႂ်ႈ ၸိူင့်ၼႆ့ၵူၺ်းဢေႃႈ။ ၼၼ့်တႄ့ ပေႃးၵႆ့တႃးယႃ ၵိၼ်ယႃ ၵေႃႈ မေႃႈဝႅပ်ႈမႃးယူႇ ၼႆ့သမ့် ပဵၼ်ၸဵမ်မိူဝ်ႈၵိူတ်ႇမႃးၼႆၵေႃႈဝႃႈ လူဝ်ႇလႆႈၽႃႇတတ်းၵူၺ်းၶႃႈယူဝ်ႉ ။ ပဵၼ်ႁိုဝ်ၵေႃႈတၵ်းလႆႈၵႂႃႇၵူတ်ႇထတ်းတူၺ်းယူႇၶႃႈ” – ဝႃႈၼႆ။
တွၼ်ႈတႃႇၸဝ်ႈသၢင်ႇဢွၼ်ႇ သင်ဝႃႈၽူႈမီးၼမ့်ၸႂ် ၶႂ်ႈယိုၼ်ႈငိုၼ်းၵမ့်ထႅမ်တႃႇယူတ်းယႃၸိုင် ၵပ်းသိုပ်ႇတွင်ႈထၢမ်လႆႈတီႈ ၸဝ်ႈသီႁၼၼ်ႇတ ဝတ့်မၢၼ်ႈတူင်ႈ မၢႆၾူၼ်း 09-420 199 111 လႆႈၵမ်းသိုဝ်ႈ။
 ၸႄႈဝဵင်းၼမ့်ၶမ်း ၸိုင်ႈတႆးပွတ်းႁွင်ႇ။){kind=link}