ပၢင်ႁူမ်ၸူမ်း ယွင်ႈၵုင်ႇယေႃးမုၼ် ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ (မိူင်းသူႈ) ၽူႈတေႁပ်ႉၸုမ်ႈၶူး မေႃ လူင် Ph.D တီႈမိူင်းၵွၵ်ႇ ၸိုင်ႈထႆး တေၼႂ်းၵၢင်လိူၼ်ၼႆႉ။
ပေႃးထိုင်မႃး ဝၼ်းတီႈ 16/10/2022 ၸိုင် ယူႇတီႈ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈတႆး တေဢွၼ်ၸတ်း ႁဵတ်းပၢင်ႁူမ်ၸူမ်း ယွင်ႈၵုင်ႇ ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ (မိူင်းသူႈ) (ထမ်ႇမႃႇၸရိယ တႆး/ မၢၼ်ႈ၊ M.A, Ph.D ၊ ၶူးသွၼ်ၵထိၵလႄႈ ၽူႈၵုမ်းၵၢၼ် ပၢႆးပၺ်ႇၺႃႇ ၸၼ်ႉၸွမ်ပုတ်ႉထ မိူင်းတႆး) ၽူႈတေႁပ်ႉၸုမ်ႈၶူးမေႃလူင် Ph.D တီႈၸၼ်ႉၸွမ် မႁိတုလ်း။ ပၢင်ႁူမ်ၸူမ်းယွင်ႈၵုင်ႇၼႆႉ တေၸတ်းႁဵတ်းတီႈဝတ်ႉမႂ်ႇတႆး သႃထုပရႃႇတဵတ်ႇ ၵိဝ်ႇ 44/1 ယၢၼ်းၼႃးဝႃး မိူင်းၵွၵ်ႇ ၸိုင်ႈတႆး ၼႆယဝ်ႉ။
ၸဝ်ႈၶူးသူရိယ ႁူဝ်ပဝ်ႈ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ၸုပ်ႈ 18 လၢတ်ႈတီႈၽူႈတွႆႇႁွၵ်ႈဝႃႈ -“ၼႂ်းတႆး ႁဝ်းၼႆႉ တႃႇတေလႆႈမႃး ၸုမ်ႈၶူး Ph.D ၼႆႉ မၼ်းပဵၼ်ဢၼ်ယၢပ်ႇတႄႉတႄႉ သင်ဝႃႈမီးမႃးၽူႈၵတ်ႉၶႅၼ်ႇ လႆႈႁပ်ႉၸုမ်းၼႆႉၸိုင် ႁဝ်းထုၵ်ႇလီမေႃ ယုၵ်ႉယွင်ႈဢဝ်ၵုင်ႇမုၼ်ၵၼ်။ ပေႃးႁဝ်းတူၺ်းတၢင်ႇၶိူဝ်းၼႆ ပိူၼ်ႈႁဵၼ်းယဝ်ႉၵေႃႈလီ၊ လႅၵ်ႈလၢႆႈၸၼ်ႉၵၢၼ် ၵေႃႈလီ ပိူၼ်ႈမေႃယုၵ်ႉယွင်ႈၵၼ် ႁဝ်းၵေႃႈ ပေႃးမေႃႁူမ်ၸူမ်းၸွမ်း၊ မေႃယုၵ်ႉယွင်ႈၼႆ ပွင်ႇဝႃႈ ႁဵတ်းႁႂ်ႈႁဝ်းၶိုၼ်ႈယႂ်ႇထႅင်ႈ၊ ယိူင်းဢၢၼ်းၸိူင်ႉၼႆသေ ၸဝ်ႈၶူးတူၼ်လႂ်ၵေႃႈယဝ်ႉ ပေႃးယဝ်ႉၸၼ်ႉ Ph.D, M.A, B.A ၼႆ ၸင်ႇယွင်ႈၵုင်ႇယေႃးမုၼ်ၵၼ်”- ဝႃႈၼႆ။
ပေႃးထိုင်မႃး ဝၼ်းတီႈ 14/10/2022 ၸိုင် ယူႇတီႈၸၼ်ႉၸွမ် မႁိတုလ်း တေမီးပၢင်ယိုၼ်ႈမွပ်ႈပၼ်ၸုမ်ႈၶူး ၼႂ်းၼၼ်ႉ ၶဝ်ႈ ပႃးဝႆႉ သင်ႇၶတႆး ၸဝ်ႈၶူး Dr. ႁိူင်းသႅင် ပၺ်ႇၺႃႇၽေႃးၵႃႇ ၽိပႃႇလ ၽူႈလႆႈႁပ်ႉၸုမ်ႈၶူးမေႃလူင် Ph.D ။
ၶပ်ႉမၢႆပၢင်ႁူမ်ၸူမ်းယွင်ႈၵုင်ႇသမ်ႉ ၼႂ်းဝၼ်းတီႈ 15/10/2022 ဝၼ်းသဝ် တေၸတ်းႁဵတ်းတီႈၸၼ်ႉၸွမ် မႁိတုလ်း သႃလႃးယႃး မိူင်းၵွၵ်ႇ။ ပေႃးထိုင်မႃး ဝၼ်းတီႈ 16 ဝၼ်းဢႃးတိတ်ႉသမ်ႉ တေၸတ်းႁဵတ်းတီႈဝတ်ႉမႂ်ႇတႆး မိူင်းၵွၵ်ႇ ၼႆယဝ်ႉ။
ၸွမ်းၼင်ႇ သဵၼ်ႈမၢႆ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး လႆႈၵဵပ်းသဵၼ်ႈမၢႆဝႆႉ တေႃႇထိုင် 12/7/2022 ၼႆႉ Ph.D 7 တူၼ်၊ M.A 45 တူၼ်၊ B.A လိုဝ်ႈဝႆႉ 35 ၊ B.A ပီ (4) 45 တူၼ်၊ B.A ပီ (3) 4 တူၼ်၊ B.A ပီ (2) 4 တူၼ် ၊ B.A ပီ (1) 38 တူၼ် ႁူမ်ႈၵၼ် တင်းမူတ်း 178 တူၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ