ယၢမ်းလဵဝ် ၼႂ်းၸႄႈဝဵင်းလၢႆးၶႃႈ ၵႃႇလမူ ၶဝ်ႈထႅင်ႈလႄႈ မူလူမ်ႉတၢႆ မီးမႃးလၢႆလၢႆၶွၵ်ႈယဝ်ႉ ယွၼ်ႉတၢင်းပဵၼ် ၾိင်ႈၾႃႉရႃႇသီႇ လႅၵ်ႈလၢႆႈ ဝႃႈၼႆ။

တႄႇဢဝ် လိူၼ်သႅပ်ႊထႅမ်ႊပိူဝ်ႊၼႆႉမႃး ၵႃႇလမူ ၶဝ်ႈဝဵင်းလၢႆးၶႃႈ  မၢင်ၵေႃႉ  သုမ်းမူတင်းၶွၵ်ႈ  ၼႂ်းသွင်သၢမ်ဝၼ်းၼႆႉသမ်ႉ ဝူဝ်းၵေႃႈတၢႆမႃးယဝ်ႉ။

ၵူၼ်းဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၵႃႇလမူၼႆႉ တႄႇပဵၼ်မႃး ၼႂ်းလိူၼ်သႅပ်ႊထႅမ်ႊပိူဝ်ႊၼႆႉၵူၺ်း။ မူၼႆႉ တၢႆမႃး ထႅင်ႈၼမ်ယဝ်ႉ။ ၶႂ်ႈဝႃႈတၢႆၵူႈဝၼ်း တၢႆတင်းၶွၵ်ႈၸိူင်ႉၼႆ။ မၢင်ၸဝ်ႈ မူတၢႆ 8 တူဝ်၊ မၢင်ၸဝ်ႈ တၢႆ 12 တူဝ်၊ မၢင်ၸဝ်ႈတၢႆ 27 တူဝ် ၸိူဝ်းၼႆႉ ၵေႃႈမီး။ ၸဝ်ႈမူတႄႉ ဢွၼ်ၵၼ်သုမ်းၼမ် ယွၼ်ႉၵႃႈၶဝ်ႈ ၵႃႈႁမ်း ၸိူဝ်းၼႆႉ ၶၼ်ၵႃႈႁႅင်း” – ဝႃႈၼႆ။

လိူဝ်သေ ၵႃႇလမူယဝ်ႉ ဝူဝ်းၵေႃႈ လူမ်ႉတၢႆၸွမ်းထႅင်ႈ ၼႂ်းၶၢဝ်းတၢင်းသွင်သၢမ်ဝၼ်းၼႆႉ ဝူဝ်းတၢႆမႃး မီးလၢႆတူဝ်ယဝ်ႉ ဝႃႈၼႆ။

“တေႃႈလဵဝ် မူၼႆႉ တၢႆၼမ် ၵူၺ်းၵႃႈ ပဵၼ်တီႈပွၵ်ႉလႂ် ဝၢၼ်ႈလႂ် လၢႆလၢႆတႄႉ ပႆႇလႆႈႁူႉသဵၼ်ႈမၢႆမၼ်း တႅတ်ႈတေႃး။ ဝူဝ်းၵေႃႈ လူႉတၢႆ ပဵၼ်မႃးၼမ်မိူၼ်ၵၼ်။ ၼႂ်းသွင်သၢမ်ဝၼ်းၼႆႉ တၢႆမႃးလၢႆတူဝ်ယဝ်ႉ။ ၵႃႇလၼႆႉ မၼ်းပဵၼ်ယွၼ်ႉၾိင်ႈၾႃႉလႅၵ်ႈလၢႆႈ ၶၢဝ်းၾူၼ် တေၶဝ်ႈၶၢဝ်းၵတ်း။ မဵဝ်းမၼ်းယဝ်ႉ ပေႃးဝႃႈ ၾိင်ႈၾႃႉလႅၵ်ႈလၢႆႈ ၵႆႇ၊ မူ၊ ဝူဝ်း ၸိူဝ်းၼႆႉ ၵႆႉတၢႆၼႃႇ။ ၵႃႇလမူၼႆႉ တႄႇ ပဵၼ်မႃး လိူၼ်ထူၼ်ႈ 9 ၸမ်သဵင်ႈ။ ဝူဝ်းသမ်ႉ တိုၵ်ႉတႄႇပဵၼ်မႃး ၶၢဝ်းတၢင်းသွင်သၢမ်ဝၼ်းၼႆႉ”-  ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈၶၢဝ်းမႆႈ တေၶဝ်ႈၶၢဝ်းၾူၼ်းၼၼ်ႉၵေႃႈ တီႈဝဵင်းလၢႆးၶႃႈၼႆႉ မူလူမ်ႉတၢႆ ပဵၼ်ၶွၵ်ႈ ။ မိူဝ်ႈၽွင်းၼၼ်ႉ မူ ၼႆႉ လႆႈတေႃႉပႅတ်ႈ ၸွမ်းၵွင်ယုၵ်းယၢၵ်း ။ ဢၼ်ပႅတ်ႈတူၵ်းၼမ်ႉတဵင်းၵေႃႈမီးတင်းၼမ်။

ယၢမ်းလဵဝ် ၵူၼ်း လၢႆးၶႃႈ  ဢွၼ်ၵၼ်ငိူင်ႉဝႄႈၼိူဝ်ႉမူ။ ၵၢၼ်လူႇတၢၼ်း  ၶႅၵ်ႇလီပၢင်ၸႃႉ ၵေႃႈလဵင်ႉလူႇ ၼိူဝ်ႉပႃ ၼိူဝ်ႉၵႆႇ ၸိူဝ်းၼႆႉလွၼ်ႉလွၼ်ႉ။    တေႃႈလဵဝ် ၼိူဝ်ႉမူ 1 ၸွႆႉ 13,000 ပျႃးလႄႈ ၼိူဝ်ႉဝူဝ်း 1 ၸွႆႉ 16,000 ပျႃး ၵူၼ်းပိုၼ်ႉ တီႈ လၢတ်ႈ။

မိူဝ်ႈႁူဝ်ပီ 2020 ၼၼ်ႉ ၵႃႇလမူႇ ၶဝ်ႈဝဵင်းလၢႆးၶႃႈ မႃးယဝ်ႉ ၵမ်ႈၼိုင်ႈ ၼႂ်းလိူၼ်ၵျႅၼ်ႊၼိဝ်ႊရီႊ။ ထိုင်မႃးထႅင်ႈႁွပ်ႈတီႈ သွင် သမ်ႉ မိူဝ်ႈလိူၼ်ဢေႃႊၵတ်ႊသ် 2020 ။ ၼၼ်ႉၵေႃႈ မူလူမ်ႉတၢႆမႃး ၼပ်ႉႁူဝ်ပၢၵ်ႇတူဝ် ၼႆယဝ်ႉ။