ဝၼ်းတီႈ 17 ပူၼ်ႉမႃး ၾူၼ်လူင်တူၵ်း လူမ်းလႅင်ႉၽတ်ႉပဝ်ႇလႄႈ တီႈယူႇတၼ်းသဝ်း ပၢင်သဝ်းၵူၼ်းပၢႆႈၽေးသိုၵ်းတီႈမိူင်းမွၵ်ႇ လူႉၵွႆလိူဝ်ႁႅင်း လူဝ်ႇတၢင်းၸွႆႈထႅမ်။
“သုမ်ႉတီႈယူႇၵူၼ်းပၢႆႈၽေးသိုၵ်း တႃႇ 70 ဢၼ်ၼႆႉ လူႉၵွႆၵႂႃႇမွၵ်ႈ 20 လင်။ ၵူၼ်းပၢႆႈၽေးသိုၵ်းၵေႃႈယၢမ်းလဵဝ်လႆႈၵႂႃႇသွၼ်ႈယူႇတီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆးၼၼ်ႉဢေႃႈ။ တႃႇၶိုၼ်းမုင်း ၶိုၼ်းသင်မၼ်းတႄႉ လူဝ်ႇတၢင်းၸွႆႈထႅမ်တႄႉတႄႉၶႃႈဢေႃႈ ” ၵူၼ်းၼုမ်ႇမိူင်းမွၵ်ႇ ဢၼ်ၸွႆႈထႅမ် ၵူၼ်းပၢႆႈၽေးသိုၵ်းၼၼ်ႉလၢတ်ႈ ၽူႈတွႆႇႁွၵ်ႈၼင်ႇၼႆ။
ၵူၼ်းပၢႆႈၽေးသိုၵ်းၸိူဝ်းၼႆႉပဵၼ် ပီႈၼွင်ႉတႆး ဢၼ်ပၢႆႈၽေးပၢင်တိုၵ်းၼႂ်းၵႄႈ သိုၵ်းမၢၼ်ႈလႄႈ သိုၵ်း KIA PDF ပိုတ်းယိုဝ်းၵၼ်မိူဝ်ႈပီၵၢႆ 2021 ။ ယၢမ်းလဵဝ်ပၢင်တိုၵ်းယဵၼ်ဝႆႉယူႇသေတႃႉ တီႈဝၢၼ်ႈတီႈသူၼ် မီးၸုမ်းယိပ်းၵွင်ႈၵၢင်ႇမႃးယူႇသဝ်းဝႆႉလႄႈ ပႆႇၸၢင်ႈပွၵ်ႈၶိုၼ်းႁိူၼ်းယေး။
သင်ဝႃႈမီးပီႈၼွင်ႉတီႈၸမ်/ၵႆ ၶႂ်ႈႁူမ်ႈၸွႆႈထႅမ်ၸိုင်ႈ ၵပ်းသိုပ်ႇတိတ်းတေႃႇလႆႈတီႈ ၸုမ်းၸွႆႈထႅမ်ၵူၼ်းပၢႆႈၽေးသိုၵ်း မိူင်းမွၵ်ႇ မၢႆၾူၼ်း 097-694-17800 – ၵမ်းသိုဝ်ႈ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ