ၵႃးၵူၼ်းဝၢၼ်ႈ လမ်းၼိုင်ႈ ပဵၼ်ၽေးၵိုင်ႉၵၢင်ႉသေပိၼ်ႈ မီးၵူၼ်းမၢတ်ႇၸဵပ်း 7 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ၵေႃႉၼိုင်ႈ မၢတ်ႇၸဵပ်းႁႅင်း လႆႈသူင်ႇယူတ်းယႃတူဝ် တီႇၼေႇပျီႇတေႃႇ။
ပူၼ်ႉမႃး မိူဝ်ႈဝၼ်းတီႈ 26/2/2022 ယၢမ်းၵၢင်ၶမ်ႈ မွၵ်ႈ 8 မူင်း ၵႃးပိၼ်ႈလမ်းၼိုင်ႈ တီႈႁိမ်းဝၢၼ်ႈၵွင်းႁၵ်ႉ ဢိူင်ႇၼႃးမၢၵ်ႇၶေႃ ၼႂ်းၵႄႈသီႇပေႃႉ – ၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇသေ ၵူၼ်းမႃးၸွမ်းၼႂ်းၵႃး လႆႈမၢတ်ႇၸဵပ်းၸွမ်း 7 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 12 ၶူပ်ႇ ၵေႃႉၼိုင်ႈ မၢတ်ႇၸဵပ်းႁႅင်းသေ လႆႈသူင်ႇယူတ်းယႃ တီႈၼေႇပျီႇတေႃႇ။
ၸုမ်းၸွႆႈထႅမ် ပရႁိ ဝဵင်းၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လုၵ်ႈဢွၼ်ႇတႄႉ လႆႈသူင်ႇၵႂႃႇယူတ်းယႃတီႈၼေႇပျီႇတေႃႇယဝ်ႉ။ ယွၼ်ႉဝႃႈ မၢတ်ႇၸဵပ်းႁႅင်း တိူဝ်ႉၺႃးတီႈၵွၵ်းႁူဝ် ယဝ်ႉၵေႃႈ ၼင်ႁူဝ် တီႈၼႃႈၾၵ်ႇ ၸိူဝ်းၼႆႉၵေႃႈလွၵ်ႈၼမ်ဝႆႉ”- ဝႃႈၼႆ။
ၵူၼ်းၵႃးဝၢၼ်ႈ ဢၼ်မႃးပိၼ်ႈၼၼ်ႉ ပဵၼ်ၵႃးၵူၼ်းဝၢၼ်ႈၵွင်းႁုင်း ၊ ၵူၼ်းဝၢၼ်ႈဢၼ်မၢတ်ႇၸဵပ်းဢိတ်းဢွတ်းတႄႉ လႆႈသူင်ႇ ယူတ်းယႃဝႆႉတီႈႁူင်းယႃၼမ်ႉလၼ်ႈ။
မိူၼ်ၼႆၼင်ႇၵဝ်ႇ မိူဝ်ႈဝႃး ဝၼ်းတီႈ 27/2/2022 ယၢမ်းဝၢႆးဝၼ်း မွၵ်ႈ 2 မူင်းၶိုင်ႈ ၵႃးတၢင်ႇၽိုၼ်း လမ်းၼိုင်ႈပိၼ်ႈ တီႈႁိမ်းဝၢၼ်ႈပၢင်ၸလွပ်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႂ်းၼၼ်ႉ ၸဝ်ႈၵႃး လႆႈလူႉတၢႆထင်တီႈ ၵူၼ်းၸွမ်းၵႃး 3 ၵေႃႉ လႆႈမၢတ်ႇၸဵပ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ