သိုၵ်း SSPP တင်း သိုၵ်း RCSS တိုၵ်းၵၼ် တေႃးၵၼ် ထိုင်မႃးႁိမ်းသၢပ်ႇဝဵင်းမိူင်းၵိုင်၊ ပၢင်တိုၵ်းၵိူတ်ႇၶိုၼ်ႈႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇသၢၼ်ႈ၊ ယူႇၼႂ်းတူဝ်ဝဵင်းမိူင်းၵိုင်ၵေႃႈ ယင်းယိၼ်းသဵင်ႈၵွင်ႈတႅၵ်ႇယူႇ ၶိူဝ်းယႂ်း။
မိူဝ်ႈဝႃး ဝၼ်းတီႈ 27/1/2022 ယၢမ်းၵၢင်ၶမ်ႈ 7:30 မူင်းပၢႆ သဵင်ၵွင်ႈတႅၵ်ႇၼႂ်းၵႄႈဝၢၼ်ႈၵွင်း – ဝၢၼ်ႈၵုၼ်ပၢၼ်ႇ ၸဵင်ႇႁွင်ႇဝၼ်းဢွၵ်ႇဝဵင်း ယၢၼ်ဝဵင်း မွၵ်ႈ 1 လၵ်း ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်း တူၵ်းၸႂ် တိုၼ်ႇသၢၼ်ႈ။
ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၶမ်ႈဝႃးၼႆႉ ပၢင်တိုၵ်းပဵၼ်ၵၼ် ၸမ်ဝဵင်းႁႅင်းၼႃႇ။ ၵူၼ်းဝၢၼ်ႈမၢင်ၵေႃႉ ႁၢင်ႈႁႅၼ်းၶူဝ်းၶိုင်ပၢႆႈၵွၼ်ႇဢေႃႈ။ လႆႈငိၼ်းၵွင်ႈလူင် သဵင်ၵွင်ႈၸၢၵ်ႈၶိူဝ်း ပေႇထူၼ်ႈယဝ်ႉၶႃႈ။ ပဵၼ် RCSS တင်း SSPP ယိုဝ်းၵၼ် ၼႆၶႃႈဢံႇႁိုဝ်”- ဝႃႈၼႆ။
ဢိင်ၼိူဝ်သိုၵ်းသွင်ၾၢႆႇယိုဝ်းၵၼ်သေ ၵူၼ်းဝၢၼ်ႈၵူၼ်းမိူင်းၸိူဝ်းၺႃးၸၢၵ်ႇသိုၵ်း ပၢႆႈၶဝ်ႈဝဵင်းမိူင်းၵိုင်၊ ပၢႆႈၵႂႃႇတၢင်းတူင်ႇလၢဝ်း၊ ပၢင်ႇၵေႇတု၊ ပၢႆႈၵႂႃႇထိုင်တၢင်းလၢႆးၶႃႈ ၸိူဝ်းၼႆႉၵေႃႈ မီးတၢင်းၼမ်။
“ယွၼ်ႉသဵင်ၵွင်ႈ တႅၵ်ႇမိူဝ်ႈၶမ်ႈဝႃးသေ တီႈၵွင်းမူးၼၢင်းဢူးပဵမ်ႇ ၵေႃႈ ၸဝ်ႈၶူးၶဝ်ၸဝ်ႈပွင်ႇ ၸႅင်ႈထိုင် ၵူၼ်းမိူင်းဝႃႈ ၶႅၼ်းတေႃးယႃႇႁိပ်ႈ ဢွၼ်ၵၼ်ၵႂႃႇလႄႇတီႈၼၼ်ႈ ၸူဝ်ႈၶၢဝ်း၊ ၵူဝ်ႇထၢင်ႇၽိတ်း ထၢင်ႇပိူင်ႈၵၼ်သေ ၺႃးတီႉ။ ၶမ်ႈဝႃး ၵေႃႈယိုဝ်းၵၼ် ႁိမ်းၼၼ်ႉၵွႆး” – ၵူၼ်းမိူင်းၵိုင် လၢတ်ႈၼင်ႇၼႆ။
တႄႇဢဝ်ႁူဝ်လိူၼ် ၵျၼ်ႊၼဝရီႊ ၼႆႉမႃး သိုၵ်း SSPP ထႅမ်ႁႅင်းသိုၵ်း လူင်းထိုင် ႁိမ်းပၢႆႉလူင် ဝဵင်းမိူင်းၵိုင် ၼႃႈ တၢင်းႁွင်ႇ၊ ယၢမ်းလဵဝ် ထိုင်မႃးတၢင်းတူၵ်းဝဵင်း၊ ၵူၼ်းတၢင်းထုင်ႉ သႃးတေႃး- ဢၢင်ႇတေႃး ၵေႃႈလၢတ်ႈဝႃႈ သိုၵ်း SSPP ၶႂၢင်ႈႁႅင်းသိုၵ်း ယဵပ်ႇလူင်းထိုင် ၼႂ်းၸႄႈဝဵင်းလွၵ်းၸွၵ်ႇ တွၼ်ႈတၢင်းႁွင်ႇ (တွၼ်ႈၾၢႆႇတူၵ်း ၸႄႈဝဵင်းမိူင်းၵိုင်) ၼႂ်းထုင်ႉဝဵင်းဢၢင်ႇတေႃးယဝ်ႉ ဝႃႈၼႆ။
