ငဝ်ႈငုၼ်း တပ်ႉသိုၵ်းဝႃႉ 171 ဢၼ်ပၵ်းဝႆႉ ၼႂ်းၸိုင်ႈတႆး ပွတ်းဢွၵ်ႇၶူင်း ၸတ်းႁဵတ်းပၢင်ၵူပ်ႉၵူႈ ပၼ်ၽူႈမီးၸၼ်ႉလႄႈ ၵေႃႉသိုၵ်းႁၢၼ် တႃႇ 112 ၵူႈ တီႈငဝ်ႈငုၼ်းတပ်ႉသိုၵ်း 171 ႁူၺ်ႈဢေႃႈ ဝႃႈၼႆ။

ဝၼ်းတီႈ 08/03/2018 ငဝ်ႈငုၼ်းတပ်ႉသိုၵ်းဝႃႉ 171 ဢၼ်ပၵ်းဝႆႉ တီႈဝၢၼ်ႈႁူၺ်ႈဢေႃႈ ၵိင်ႇၸႄႈဝဵင်း ပုင်ႇပႃႇၶႅမ်ၼၼ်ႉ ၸတ်းႁဵတ်း ပၢင်ပွႆးၵူပ်ႉၵူႈပၼ် ၽူႈမီးၸၼ်ႉလႄႈ ၵေႃႉသိုၵ်းႁၢၼ် ၼႂ်းတပ်ႉသိုၵ်းဝႃႉ ၸတ်းႁဵတ်းတီႈႁူင်းႁေႃ ဝၢၼ်ႈႁူၺ်ႈ ဢေႃႈ ႁိမ်းဝဵင်းပုင်ႇပႃႇၶႅမ် ၼႂ်းၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ ဝႃႈၼႆ။

ၽူႈမီးပုၼ်ႈၽွၼ်း ၼႂ်းတပ်ႉငဝ်ႈငုၼ်း 171 လၢတ်ႈဝႃႈ “ ဢၼ်လႆႈၸတ်းႁဵတ်းပွႆးၵူပ်ႉၵူႈပၢင်ၶႅၵ်ႇ ပၼ်ၵေႃႉသိုၵ်း ႁၢၼ်ႁဝ်းၶႃႈၼႆႉ တႃႇတေပဵၼ်မႃးပွႆးပၢင်ၶႅၵ်ႇၵေႃႈဢမ်ႇငၢႆႈငၢႆႈ ယွၼ်ႉၼၼ် ၸင်ႇၸွႆႈၵမ်ႉထႅမ်သေ ၵႄႈလိတ်ႈ ပၼ်ႁႃပၼ်ၵႂႃႇလွင်ႈၼႆႉၵေႃႈၸႂ်ႈ ယွၼ်ႉဝႃႈ ၵူၼ်းႁဝ်းၼိုင်ႈၵေႃႉၼႆႉ လႆႈၶႂၢင်ႉၵူပ်ႉၵူႈပဵၼ်ႁေႃပဵၼ်ႁိူၼ်း ၼိုင်ႈပွၵ်ႈ ၵူၺ်း။ ယွၼ်ႉၼၼ် ပီၼႆႉ လႆႈၸတ်းပွႆးပၢင်ၶႅၵ်ႇပၼ် တင်းမူတ်း 112 ၵူႈ။ ယဝ်ႉၵေႃႈ လွင်ႈၸတ်းႁဵတ်းပွႆးပၢင်ၶႅၵ်ႇၼႆႉ ဢမ်ႇလႆႈလိူၵ်ႈၽႃသႃၶိူဝ်းၵူၼ်း” ဝႃႈၼႆ။

ၸၢႆးထီး ၵူၼ်းယူႇႁူၺ်ႈဢေႃႈ လၢတ်ႈဝႃႈ “ ပေႃးပဵၼ်ၵူၼ်းၸၢႆးတၵ်းလႆႈပဵၼ်ၶိူဝ်းဝႃႉ သိုၵ်းဝႃႉ ဢဝ်ၶႄႇ၊ တႆး၊ လႃးႁူႇ – ဢဝ်ၽႂ်ၵေႃႈလႆႈမူတ်း ၼၼ်ႉတႄႉၸတ်းပၼ်ပၢင်ၶႅၵ်ႇ။ ပေႃးဢမ်ႇၸႂ်ႈမိုဝ်ႉၸႂ်ႈၶၢဝ်း။ ၽူႈယိင်းဝႃႉၵႂႃႇဢဝ်ၵူၼ်း တၢင်ႇၶိူဝ်းတႄႉ ဢမ်ႇၵမ်ႉထႅမ်” ဝႃႈၼႆ။

ပၢင်ၵူပ်ႉၵူႈပၢင်ၶႅၵ်ႇ ၵေႃႉသိုၵ်းႁၢၼ် တပ်ႉသိုၵ်းဝႃႉၼႆႉ ၸတ်းႁဵတ်း 3 ပီၼိုင်ႈပွၵ်ႈ ဢၼ်ၸတ်းႁဵတ်းပႃးပွၵ်ႈၼႆႉ တေလႆႈဝႃႈ ပဵၼ်ပွၵ်ႈၵမ်းတီႈ 4 ။

မိူဝ်ႈပူၼ်ႉမႃး ပီ 2016 ၼၼ်ႉၵေႃႈ ၸတ်းႁဵတ်းမႃးယဝ်ႉၵမ်းၼိုင်ႈ မိူဝ်ႈၼၼ်ႉ 300 ၵူႈပၢႆ။ ပၢင်ၵူပ်ႉၵူႈၸိူင်ႉၼႆ ဝႃႉပွတ်းၼိူဝ်လႅၼ်လိၼ်ၶႄႇၵေႃႈ ၵႆႉၵႆႉၸတ်းပၼ်တႃႇသေႇ။ ပဵၼ်ၵူၼ်းလူင်ၽူႈမီးၸၼ်ႉၸတ်းပၼ်လႄႈၼႃႈႁိူၼ်း ၵေႃႈမၼ်ႈ။ ၽူႈၸၢႆးၼႂ်းဝႃႉတၵ်းလႆႈဢဝ်မေးၼိုင်ႈၵေႃႉၵူၺ်းဝႃႈၼႆ။

ဓါတ်ပုံ – ခွန်ဇော်ဦး