Friday, March 29, 2024

ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉလႄႈ ၽႃႈယၢင်/ မူဝ်းၵႃႇ

Must read

 ၵူၼ်းပၢႆႈၽေးသိုၵ်း ဢၼ်လုၵ်ႉတီႈဢိူင်ႇႁူးသူၼ် ၶၢႆႉပၢႆႈမႃး ၼႂ်းဝဵင်းၵျွၵ်ႉမႄး ႁူဝ်ၵူၼ်း ႁဵင်ပၢႆ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်း ၵိၼ်လႄႈ ၽႃႈယၢင်/ မူဝ်းၵႃႇ  ။

Image CJ- ၵူၼ်းပၢႆႈၽေးသိုၵ်း တီႈၵျွၵ်ႉမႄး

သဵင်ၵွင်ႈတႅၵ်ႇထႅင်ႈလႄႈ ၵူၼ်းပၢႆႈၽေးသိုၵ်း ၼႂ်းဢိူင်ႇႁူးသူၼ် သိုပ်ႇၶၢႆႉပၢႆႈမႃး ၼႂ်းဝဵင်းၵျွၵ်ႉမႄး မိူဝ်ႈဝႃးဝၼ်းတီႈ 4/11/2021 ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈ ၼမ်ႉတၢင်းၵိၼ်ႁၢဝ်ႈႁႅင်းလႄႈ ၽႃႈယၢင်/ မူဝ်းၵႃႇ တႃႇႁဵတ်းသုမ်ႉသွင်း ယူႇသဝ်း  ။  

- Subscription -

လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ ယၢမ်းလဵဝ်ၼႆႉ ၵျွင်းမုၼ်ၸဝ်ႈ မၢင်တီႈၵေႃႈ ဢမ်ႇႁတ်းႁပ်ႉၶဝ်ၶႃႈၼေႈ။ ၵွပ်ႈတၢင်းပဵၼ်ၶူဝ်ႊဝိတ်ႉၼႆႉၵေႃႈႁင်းမၼ်း။ ထႅင်ႈလွင်ႈၼိုင်ႈ ၵေႃလိၵ်ႈလၢႆးႁဝ်း သမ်ႉ မီးတီႈလိၼ်ၵူၺ်း ပႆႇမီးတီႈယူႇသဝ်းတဵမ်ထူၼ်ႈ ၼႆႉၵေႃႈယၢပ်ႇၶႃႈၼႄႈ။ ဢၼ်လူဝ်ႇတၢင်းၸွႆႈထႅမ်ႁႅင်းတီႈသုတ်းယၢမ်းလဵဝ်တႄႉ ၶဝ်ႈၼမ်ႉတၢင်းၵိၼ်ၶႃႈဢေႃႈ ယဝ်ႉၵေႃႈ မူဝ်းၵႃႇ တႃႇတေႁဵတ်းသုမ်ႉသွင်းယူႇၵၼ် ၸိူဝ်းၼႆၶႃႈ”- ဝႃႈၼႆ။

ၼႂ်းဢိူင်ႇႁူးသူၼ်ၼႆႉ မီးၵူၼ်းပၢႆႈၽေးသိုၵ်းမႃးသွၼ်ႈယူႇဝႆႉ ႁိုင်မွၵ်ႈ 2 လိူၼ်ယဝ်ႉ ပႆႇလႆႈပွၵ်ႈၶိုၼ်းႁိူၼ်းယေး  ႁူဝ်ၵူၼ်းတေမီးမွၵ်ႈ 1,500 ၼႆႉ။ ယွၼ်ႉဝႃႈ ပၢင်တိုၵ်းၼႂ်းၵႄႈ ၸုမ်းဢူၺ်းလီပွတ်းႁွင်ႇ လႄႈ RCSS ပဵၼ်ပၢင်တိုၵ်းၵၼ် ၸွမ်းႁိမ်းဢိူင်ႇႁူးသူၼ်ႁၢဝ်ႈႁႅင်းထႅင်ႈသေ ၵူၼ်းပၢႆႈ ၽေးသိုၵ်း ၼႂ်းဢိူင်ႇႁူးသူၼ် ၸင်ႇဢွၼ်ၵၼ်ၶၢႆႉပၢႆႈၶဝ်ႈမႃး ၼႂ်းဝဵင်းၵျွၵ်ႉမႄးထႅင်ႈ ၼႆယဝ်ႉ။

ယၢမ်းလဵဝ် သဵၼ်ႈမၢႆၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈမႃးထိုင်ဝႆႉ တီႈၼႂ်းဝဵင်ၵျွၵ်ႉမႄးၼႆႉ တင်းမူတ်းမီးၵႂႃႇယဝ်ႉ 1,147 ၵေႃႉ ဝႃႈၼႆ။

ၽွင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼႆႉ ၼႂ်းဝဵင်းၵျွၵ်ႉမႄးၵေႃႈ မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၼပ်ႉႁူဝ်ပၢၵ်ႇဝႆႉလႄႈ ယၢမ်းလဵဝ် တႃႇၵူၼ်း ပၢႆႈၽေးသိုၵ်းၶဝ် ပေႃးတေလွတ်ႈၽေးတၢင်းပဵၼ်ၼၼ်ႉ ပဵၼ်ဢၼ်လႆႈမႆႈၸႂ်ဝႆႉ ထႅင်ႈဢၼ်ၼိုင်ႈ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း