သင်ၶၸဝ်ႈ ဝဵင်းၵဵင်းတုင် ပိုတ်ႇပၢင်သွၼ်လိၵ်ႈထမ်း(တႆးၶိုၼ်) ပၼ်လုၵ်ႈဢွၼ်ႇ ၽွင်းၶၢဝ်းဢိုတ်းႁူင်းႁဵၼ်းလူင်ပွင် ၸိုင်ႈ တႃႇၶၢဝ်းတၢင်း 3 လိူၼ် ဝႃႈၼႆ။
ဝၼ်းတီႈ 05/03/2018 သင်ၶၸဝ်ႈ ၼႂ်းၸႄႈဝဵင်းၵဵင်းတုင် ဢွၼ်ႁူဝ်ၼမ်းၼႃႈသေ ပိုတ်ႇပၢင်သွၼ်လိၵ်ႈတႆး (လိၵ်ႈတႆးၶိုၼ်/ လိၵ်ႈထမ်း/ လိၵ်ႈယူၼ်း) ပၼ်လုၵ်ႈဢွၼ်ႇ တီႈဝတ်ႉဝိႁၢရ်လူင်ၼွင်မႃႉ ဢိူင်ႇဝတ်ႉသၢဝ်း ၸႄႈဝဵင်း ၵဵင်းတုင် ၸိုင်ႈတႆး ပွတ်းဢွၵ်ႇ။ ၼင်ႇႁိုဝ် လုၵ်ႈဢွၼ်ႇ ပေႃးတေမေႃႁၵ်ႉသႃမႅတ်ႇပႅင်း လိၵ်ႈလၢႆးၾိင်ႈႁိတ်ႈႁွႆးတူဝ် ၵဝ်ႇ၊ လုၵ်ႈႁဵၼ်းၶဝ်ႈဢဝ်လၢႆးမီး 284 ၵေႃႉ ဝႃႈၼႆ။
ၸဝ်ႈၶူးၿူဝ်း ၽူႈဢွၼ်ႁူဝ်ၼမ်းၼႃႈ ပၢင်သွၼ်လိၵ်ႈတႆး(ၶိုၼ်)တီႈဝတ်ႉဝိႁၢရ်လူင်ၼွင်မႃႉ လၢတ်ႈတီႈၸုမ်းၶၢဝ်ႇ ၽူႈတွႆႇ ႁွၵ်ႈဝႃႈ “ ပီၼႆႉ လုၵ်ႈဢွၼ်ႇဢၼ်မႃးၶိုၼ်ႈႁဵၼ်း တီႈဝတ်ႉၼွင်မႃႉႁဝ်းၶႃႈၼႆႉ တင်းမူတ်း မီး ႁိမ်း 300 ၵေႃႉ။ မိူဝ်ႈပီပူၼ်ႉ ဢၼ်လုၵ်ႈဢွၼ်ႇမႃးၶိုၼ်ႈႁဵၼ်း မီး 300 ပၢႆ။ ယိူင်းဢၢၼ်း ဢၼ်လႆႈပိုတ်ႇပူင် သွၼ်လိၵ်ႈတႆးၶိုၼ်ႁဝ်း ပၼ်လုၵ်ႈဢွၼ်ႇၼႆႉ ၼင်ႇႁိုဝ် လိၵ်ႈလၢႆးပၢႆပေႇႁဝ်း ပေႃးတေၶိုၼ်ႈယႂ်ႇမႂ်ႇသုင်ၵႂႃႇဝၼ်း တႃမိူဝ်းၼႃႈ ႁႂ်ႈမေႃသိုပ်ႇ ပိုၼ်ၽႄႈၵႂႃႇထႅင်ႈတၢင်းၼႃႈ” ဝႃႈၼႆ။
ပၢင်သွၼ်လိၵ်ႈတႆး(ၶိုၼ်)တီႈဝတ်ႉဝိႁၢရ်လူင်ၼွင်မႃႉၼႆႉ ပူင်သွၼ်ပၼ်ပႃး လိၵ်ႈထႆးလႄႈ လိၵ်ႈတႆးတူဝ်မူၼ်း (မႁႃႈတူဝ်) ၸိူဝ်းၼႆႉ။ ၼႂ်းပၢင်သွၼ်ၼႆႉ ယႅၵ်ႈပဵၼ်ၸၼ်ႉဢၵ်ႉၶရ၊ ၸၼ်ႉဢၵ်ႉၶရ(သွင်)၊ ၸၼ်ႉတူၼ်ႈ၊ ၸၼ်ႉၵၢင်၊ ၸၼ်ႉပၢႆ ထိုင် ၸၼ်ႉႁူၵ်း၊ ၸၼ်ႉၸဵတ်းတင်း ၸၼ်ႉႁဵၼ်းပိုၼ်းမိူင်းၵဵင်းတုင် ၸဵမ်ၸိူဝ်းၼႆႉ။
ပၢင်သွၼ်လိၵ်ႈတႆး(ၶိုၼ်) ၼႂ်းၸႄႈဝဵင်းၵဵင်းတုင် တႄႇပိုတ်ႇပူင်သွၼ်တင်ႈတႄႇ ႁူဝ်လိူၼ်မၢတ်ႊၶျ်မႃး၊ ပိုတ်ႇသွၼ် တီႈဝတ်ႉဝႃးၽႃသိူဝ်ႇလႄႈ ၸွမ်းမူႇဝၢၼ်ႈ ၸဵမ်ၸိူဝ်းၼႆႉ ဝႃႈၼႆ။
