ၸၢႆးလူင် တင်း ၸၢႆးသိူဝ်လူင် ၵူၼ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA သွင်ၵေႃႉ ဢၼ်ၺႃးသိုၵ်းမၢၼ်ႈ တီႉၺွပ်း ၵုမ်းၶင်တူဝ်ဝႆႉတီႈ ၶွၵ်ႈၵဵင်းတုင် ၶၢဝ်းတၢင်း 7 လိူၼ်ၼၼ်ႉ တေႃႈလဵဝ် ထုၵ်ႇပွႆႇတူဝ်ဢွၵ်ႇမႃးၶိုၼ်းယဝ်ႉ ဝႃႈၼႆ။
ဝၼ်းတီႈ 05/03/2018 ယၢမ်းၵၢင်ၼႂ် မွၵ်ႈ 10:30 မူင်း ယူႇတီႈၾၢႆႇၸွပ်ႇၶၢဝ်ႇတင်း ၾၢႆႇၽူႈၵွၼ်းၸႄႈဝဵင်းၵဵင်းတုင် လႆႈမွပ်ႈတူဝ် ၵူၼ်းသိုၵ်း RCSS 2 ၵေႃႉ ၸၢႆးလူင် တင်း ၸၢႆးသိူဝ်လူင်ၼၼ်ႉပၼ် တီႈၼႂ်းမိုဝ်း ၽူႈမီးပုၼ်ႈၽွၼ်း လုမ်းၵပ်း သၢၼ်ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆးၶိုၼ်း။
ၽူႈမီးပုၼ်ႈၽွၼ်း လုမ်းၵပ်းသၢၼ် RCSS/SSA ၸႄႈဝဵင်းၵဵင်းတုင် လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈဝႃး ဝၼ်းတီႈ 5 ႁဝ်းၶႃႈ လႆႈဢွၼ်ၵၼ်ၵႂႃႇႁပ်ႉ ၵူၼ်းသိုၵ်း ႁဝ်း 2 ၵေႃႉ တီႈၶွၵ်ႈဝဵင်းၵဵင်းတုင်၊ တေႃႈလဵဝ် ဢွၵ်ႇမႃးယဝ်ႉ တူဝ်ႈလီငၢမ်းယဝ်ႉ” ဝႃႈၼႆ။
ၵူၼ်းသိုၵ်းRCSS/SSA 2 ၵေႃႉၼႆႉလႆႈ တူၵ်းၶွၵ်ႈ တီႈၵဵင်းတုင်မႃး ၶၢဝ်းတၢင်း 7 လိူၼ်။ ၶၢဝ်းတၢင်း 7 လိူၼ်ၼႆႉ လႆႈၶိုၼ်ႈလုမ်းတြႃး ၺႃးထဵတ်ႈထၢမ် ဢမ်ႇယွမ်း 6 ပွၵ်ႈ ဝႃႈၼႆ။
ၵူၼ်းသိုၵ်း RCSS/SSA သွင်ၵေႃႉ ၸၢႆးသိူဝ်လူင် တင်း ၸၢႆးလူင် ၼႆႉတူင်ႉၼိုင်တၢင်းပွတ်းတွၼ်ႈဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။ သိုၵ်းလူင်ပွင်ၸိုင်ႈမၢၼ်ႈ ၸီႉၼႄးဝႃႈ ၵူၼ်းသိုၵ်း 2 ၵေႃႉၼႆႉ ပႃးၶိူင်ႈၵွင်ႈၵၢင်ႇ၊ ၸၢၵ်ႈလၢတ်ႈလႄႈ ၵဵပ်းၶွၼ်ႇ ၵူၼ်းမိူင်း ၸိူဝ်းၼႆႉသေ တီႉၺွပ်း မိူဝ်ႈဝၼ်းတီႈ 25/07/2017 သူင်ႇတူဝ် ၵုမ်းၶင်ဝႆႉတီႈ ၶွၵ်ႈၸႄႈဝဵင်းၵဵင်းတုင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ