လၢၼ်ႇၵဵပ်းငိုၼ်းတၢင်းၶဝ်ႈဝဵင်းလၢႆးၶႃႈ တေပူတ်းပႅတ်ႈ လိူၼ်မၢတ်ႊၶျ်ၼႆႉသဵင်ႈ

ၸုမ်းတင်ႈလၢၼ်ႇ (ၵဵတ်ႉ) ၵဵပ်းငိုၼ်းၵူၼ်းၵႂႃႇမႃး တၢင်းၶဝ်ႈဝဵင်းလၢႆးၶႃႈ တီႈႁူဝ်ၶူဝ်ၼမ်ႉတဵင်း ၼၼ်ႉႁပ်ႉပၢၵ်ႇပၼ်ၵႂၢမ်းမၼ်ႈၼႂ်းပၢင်ၵုမ်ဝႃႈ ပေႃးလိူၼ်မၢတ်ႊၶျ် 2018 သဵင်ႈ တေယူၵ်ႉလိူၵ်ႈ /ပူတ်းပႅတ်ႈယဝ်ႉဝႃႈၼႆ ။

ဝၼ်းတီႈ 05/03/2018 လုင်းၽေႇတဵင်း ဢၼ်ၸၼ်ၵၼ်ႊထရႅၵ်ႊ တီႈၾၢႆႇလိူမ်ႈလႆႇ သေမႃးတင်ႈ လၢၼ်ႇ ၵဵပ်းငိုၼ်းတၢင်းၶဝ်ႈဢွၵ်ႇဝဵင်းလၢႆးၶႃႈၼၼ်ႉ ပၼ်ၶေႃႈမၼ်ႈၵႅၼ်ႇ တီႈပၢင်ၵုမ် ဝၢင်းၽႅၼ်ၸႂ်ႉ ၸၢႆႇငိုၼ်းတွင်း 2018 – 2019 ၼၼ်ႉဝႃႈ ပေႃးလိူၼ်မၢတ်ႊၶျ် 2018 သဵင်ႈ တေ ပူတ်းပႅတ်ႈလၢၼ်ႇ တီႈႁူဝ်ၼမ်ႉတဵင်း ဝၢၼ်ႈမၢၵ်ႇလၢင်း ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းလၢႆးၶႃႈၸူမ်းသိူဝ်းႁၢၼ်ႉၸႂ်။

ၸၢႆးလႅင်းႁိူင်း ၽူႈၵိူဝ်းၵုမ်ၵူၼ်းၼုမ်ႇလၢႆးၶႃႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၶဝ်လၢတ်ႈ ဝႃႈပေႃး လိူၼ်သဵင်ႈၼႆႉ ၶဝ်တေဢမ်ႇၵဵပ်းယဝ်ႉၼႆလႄႈ ႁဝ်းၶႃႈၵေႃႈမီးတၢင်းႁူမ်ၸူမ်းၶႃႈဢေႃႈ။ ၵူၼ်းဝၢၼ်ႈၵေႃႈ တေၸၢင်ႈၵႂႃႇမႃးလႆႈထၢင်ႇႁၢင်ႈ ” ဝႃႈၼႆ။

တီႈဝဵင်းလၢႆးၶႃႈၼႆႉ မီးလၢၼ်ႇၵဵတ်ႉ2တီႈ သဵၼ်ႈတၢင်းၾၢႆႇတူၵ်းဝဵင်းဢၼ်ၵႂႃႇၸူးပၢင်လူင် – လွႆလႅမ် တီႈၼိုင်ႈလႄႈ ၾၢႆႇဢွၵ်ႇဝဵင်းဢၼ်ၵႂႃႇၸူးတၢင်းမိူင်းၼွင် တီႈၼိုင်ႈ ။ တႃႇတေတူၵ်းလူင်း ပူတ်းပႅတ်ႈ ပၢႆႉၾၢႆႇဢွၵ်ႇဝဵင်းၼႆႉ ယူႇတီႈၽူႈတႅၼ်းဝဵင်းလၢႆးၶႃႈသေ ၶတ်းၸႂ်ၵပ်းသိုပ်ႇၵပ်းသၢၼ် မႃးလၢႆပွၵ်ႈ လၢႆၵမ်းယဝ်ႉ ဝႃႈၼႆ။