ယူႇတီႈတိူင်းသိုၵ်းသၢမ်ၸဵင်ႇၵဵင်းတုင် ယွၼ်းႁႅင်းသိုၵ်းပျီႇတူႉၸိတ်ႉ ဢၼ်တေမႃးၸွႆႈၵၢၼ်ၼႂ်းတိူင်းသိုၵ်းလႆႈ ဝႃႈၼႆ။
ဝၼ်းတီႈ 19/9/2021 တိူင်းသိုၵ်း သၢမ်ၸဵင်ႇ ၵဵင်းတုင် သိုၵ်းမၢၼ်ႈၵဵပ်းသဵၼ်ႈမၢႆ ႁႅင်းသိုၵ်း သိုၵ်းၵူၼ်းမိူင်း ပျီႇတူႉၸိတ်ႉ လႆႈႁူႉဝႃႈ ႁႅင်းသိုၵ်းပျီႇတူႉၸိတ်ႉ တီႈတႃႈၶီႈလဵၵ်း ၼမ်လိူဝ်ႁႅင်းပလိၵ်ႈမၢၼ်ႈ 2 ပုၼ်ႈ ၵူၼ်းၸမ်ၸႂ်တပ်ႉတိူင်းသိုၵ်းၵဵင်းတုင် ၵေႃႉၼိုင်ႈလၢတ်ႈ။
ၵွပ်ႈၼႆလႄႈ ယူႇတီႈတိူင်းသိုၵ်းၵဵင်းတုင် လႆႈယွၼ်းႁႅင်းပျီႇတူႉၸိတ်ႉ တႃႈၶီႈလဵၵ်း ၸုမ်း 10-20 ၵေႃႉ ၽူႈမီးၸၼ်ႉၼႂ်းတပ်ႉပျီႇတူႉၸိတ်ႉ တႃႈၶီႈလဵၵ်းၵေႃႉၼိုင်ႈၵေႃႈလၢတ်ႈၽူႈတွႆႇႁွၵ်ႈၼင်ႇၼႆ။
“တီႈတႃႈၶီႈလဵၵ်းၼႆႉ ႁႅင်းပျီႇတူႉၸိတ်ႉ ၼမ်ဢေႃႈ။ မိူဝ်ႈဝႃးဝၼ်းသိုၼ်း လႆႈငိၼ်းဝႃႈ သိုၵ်းမၢၼ်ႈ ယွၼ်းမႃး တေသူင်ႇၽႂ်ပၼ်ၶဝ်လႆႈ ၼႆဢေႃႈ။ ၵူၺ်းၵႃႈတေႃႇထိုင်တလဵဝ် ၸုမ်းႁဝ်းၶႃႈတႄႉ ပႆႇလႆႈတၢင်ႇသဵၼ်ႈမၢႆမၼ်းၼေပၼ်ၶဝ်”- ဝႃႈၼႆ။
ၼႂ်းဝဵင်းတႃႈၶီႈလဵၵ်းၼႆႉ လႆႈႁူႉဝႃႈ မီးၸုမ်းပျီႇတူႉၸိတ်ႉပိုၼ်ႉတီႈ၊ ပျီႇတူႉၸိတ်ႉဢၼ်တူင်ႉၼိုင်ၸွမ်းသၢပ်ႇၼမ်ႉၶွင်၊ ပျီႇတူႉၸိတ်ႉဢၼ်ဢဝ်ႁူမ်ႇလူမ်ႈဝၢၼ်ႈဢိူင်ႇ၊ ၵူၼ်းဝၢၼ်ႈ ဢၼ်ယိပ်းၵွင်ႈၶဝ်ႈႁူမ်ႈၸုမ်းပျီႇတူႉၸိတ်ႉဝႆႉ ၸိူဝ်းၼႆႉဢဵၼ်ႁႅင်းမီးမွၵ်ႈ 1500 လႆႈႁူႉၼင်ႇၼႆ။
ၵူၼ်းတူင်ႉၼိုင်ၵၢၼ်မိူင်းၼႂ်းဝဵင်းတႃႈၶီႈလဵၵ်းၵေႃႉၼိုင်ႈၵေႃႈလၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၼႆႉတႄႉ မၼ်းတိုၼ်းၸႂ်ႉလၢႆးၵူတ်ႉ လၢႆးလႅတ်းလိူဝ်ပိူၼ်ႈယူႇယဝ်ႉ။ ပေႃးတေမီးၽွၼ်းလီတႃႇတပ်ႉသိုၵ်းမၢၼ်ႈတႄႉ မၼ်းႁဵတ်းၵူႈမဵဝ်း”- ဝႃႈၼႆ။
မၼ်းၸၢႆးယင်းလၢတ်ႈထႅင်ႈဝႃႈ ၽူႈၼမ်းၸုမ်းၸၢဝ်းၶိူဝ်း ၽူႈၼမ်းၸုမ်းယိပ်းၵွင်ႈၵၢင်ႇ ဢမ်ႇထုၵ်ႇလီတူၵ်းလွၵ်းသိုၵ်းမၢၼ်ႈပၼ်ႇႁူဝ် ၊ ၶႂ်ႈႁႂ်ႈတူၺ်းပုၼ်ႈၸၢဝ်းၶိူဝ်းၶိုၼ်းလီလီ ဝႃႈၼႆ။
ဝၼ်းတီႈ 19/9/2021 ၼၼ်ႉၸွမ်သိုၵ်းမဵဝ်းမိၼ်းထုၼ်း ၽူႈၵွၼ်းတိူင်း တိူင်းသိုၵ်းသၢမ်ၸဵင်ႇၵဵင်းတုင် မွပ်ႈယိုၼ်ႈၶဝ်ႈၼမ်ႉတၢင်းၵိၼ် လွင်ႈၵမ်ႉၸွႆႈပၼ်ၸုမ်းပျီႇတူႉၸိတ်ႉ ဢၼ်မီးၼႂ်းဝဵင်းတႃႈၶီႈလဵၵ်းတင်းမူတ်းၼႆလႄႈ ဢူးလေႃးတႃႇ ဢၼ်ပဵၼ် ၸုမ်းပျီႇတူႉၸိတ်ႉလွႆတေႃႇၶမ်းဝဵင်းတႃႈၶီႈလဵၵ်း တႅၼ်းတၢင်ၸုမ်းပျီႇတူႉၸိတ်ႉတင်းမူတ်းသေၵႂႃႇႁပ်ႉ။
ၼႂ်းၸႄႈဝဵင်းတႃႈၶီႈလဵၵ်း တင်ႈဢဝ်လႅၼ်လိၼ် တႃႈၶီႈလဵၵ်း- မိူင်းသၢတ်ႇ တေႃႇထိုင်ဝဵင်းတႃႈလိူဝ်ႇ ပျီႇတူႉၸိတ်ႉတင်းမူတ်းမီး 35 ၸုမ်း။ ဢၼ်ဢမ်ႇၶဝ်ႈသဵၼ်ႈမၢႆသေ ယူႇၸွမ်းဢိူင်ႇ ၸွမ်းဝၢၼ်ႈ တၢင်းၼွၵ်ႈၵေႃႈမီးထႅင်ႈတင်းၼမ် လႆႈႁူႉၼင်ႇၼႆ။
