ပၢင်သဝ်းၸုမ်းပျီႇတူႉၸိတ်ႉ သႅင်ၵႅဝ်ႈ (ဆိုင်ကျော့ပြည်သူ့စစ်စခန်း) ဢၼ်မီးဝႆႉတီႈ ၼႂ်းဢိူင်ႇၸေႊလၢၼ်ႉ ၸႄႈဝဵင်းမူႇ ၸေႊၼၼ်ႉ ထုၵ်ႇၽဝ် ဝႃႈၼႆ။

မိူဝ်ႈၼႆႉ ဝၼ်းတီႈ 9/9/2021 ယၢမ်းၵၢင်ၼႂ် မွၵ်ႈ 8 မူင်း မီးၸုမ်းယိပ်းၵွင်ႈၵၢင်ႇ ၶဝ်ႈၸုတ်ႇၽဝ် ပၢင်သဝ်းၸုမ်းပျီႇတူႉၸိတ်ႉ သႅင်ၵႅဝ်ႈ မိူင်းမႂ်ႇ ၼႂ်းဢိူင်ႇၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ  ။

ၵူၼ်းပိုၼ်ႉတီႈ ၸေႊလၢၼ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႇထိုင်ယၢမ်းလဵဝ် ၾႆးတိုၵ်ႉမႆႈယူႇၶႃႈ။ တီႈႁိမ်း ၼၼ်ႉ ဢမ်ႇမီးၽႂ်ႁတ်းၵႂႃႇၸမ်။ ပဵၼ်ၸုမ်းလႂ်ၸုတ်ႇၽဝ်ဢၼ်ဝႃႈၼၼ်ႉ ႁဝ်းၶႃႈ ဢမ်ႇႁတ်းလၢတ်ႈၶႃႈ။ ၵူၼ်းႁိမ်းႁွမ်း တီႈၼၼ်ႈတႄႉ လၢတ်ႈဝႃႈ မီးသိုၵ်း TNLA ဝႆႉ”- ဝႃႈၼႆ။

ဢွင်ႈတီႈပၢင်သဝ်း ၸုမ်းပျီႇတူႉၸိတ်ႉ သႅင်ၵႅဝ်ႈ  ၼၼ်ႉ ပဵၼ်ၼမ်ႉမိုဝ်းၸုမ်းလႂ် ၵေႃႉလႂ် ၽဝ်ၼႆ ပႆႇလႆႈႁူႉၶေႃႈမုလ်းတႅတ်ႈတေႃးလီ ၵူၼ်းပိုၼ်ႉတီႈၸေႊလၢၼ်ႉလၢတ်ႈ။  

ၸဝ်ႈႁၢၼ် မႂ်းဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈၵေႃႈ တိုၵ်ႉတွင်ႈထၢမ် ၵႂႃႇၼႂ်းပိုၼ်ႉတီႈ ၼၼ်ႉယူႇၶႃႈ။ ပဵၼ်ၸုမ်းလႂ်ႁဵတ်းဢၼ်ဝႃႈၼၼ်ႉ။ ႁဝ်းၶႃႈ တွင်ႈထၢမ်ၵႂႃႇတီႈၸုမ်းႁဝ်းၶႃႈတႄႉ မိူဝ်ႈၼႆႉ ၵၢင်ၼႂ် ဢမ်ႇမီး ပၢင်တိုၵ်းသင်ၶႃႈ။ ၼႂ်းဢွင်ႈတီႈၼၼ်ႉ ပဵၼ်ဢွင်ႈတီႈႁဝ်းၶႃႈ တူင်ႉၼိုင်ၶႃႈဢေႃႈ။ မိူဝ်ႈၵူႈပွၵ်ႈတႄႉ ႁဝ်းၶႃႈ တူင်ႉၼိုင်ယူႇ ဝႆႉ”- ဝႃႈၼႆ။

ဢွင်ႈတီႈပၢင်သဝ်းတီႈၼၼ်ႈတႄႉ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉ သႅင်ၵႅဝ်ႈ ယူႇႁူမ်ႈၵၼ်ဝႆႉ ဝႃႈ ၼႆ။

“ၶၢဝ်းတၢင်း ၼိုင်ႈဝူင်ႈမႃးၼႆႉ တၢင်းၾၢႆႇပူၼ်ႉ ႁဝ်းၶႃႈ ဢမ်ႇႁတ်းၵႂႃႇႁဵတ်းႁႆႈၵၼ်ၶႃႈ။ ယွၼ်ႉသိုၵ်း TNLA ဢမ်ႇပၼ်ၶိုၼ်ႈ ၵႂႃႇႁဵတ်းၶႃႈ”- ၵူၼ်းပိုၼ်ႉတီႈ ၸေႊလၢၼ်ႉ သိုပ်ႇလၢတ်ႈၼႄၼင်ႇၼႆ။

ၸုမ်းပျီႇတူႉၸိတ်ႉ သႅင်ၵႅဝ်ႈၼႆႉ မိူဝ်ႈပီ 1989 ၼၼ်ႉ လႆႈၵိုတ်းတိုၵ်းၵၼ်တၢင်း တပ်ႉသိုၵ်းမၢၼ်ႈသေ ႁူဝ်ပဝ်ႈပဵၼ် ၸွမ် ႁၢၼ် လွႆမၢဝ်း။ ထိုင်မႃးမိူဝ်ႈပီ 2009 ၼၼ်ႉ ၸင်ႇလႅၵ်ႈလၢႆႈႁဵတ်းပဵၼ် ၸုမ်းပျီႇတူႉၸိတ်ႉ ယူႇပႃႈတႂ်ႈတပ်ႉသိုၵ်းမၢၼ်ႈၵႂႃႇ ၼႆယဝ်ႉ။