ၾၢႆႇၽွင်းငမ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ တေပၵ်းႁုၼ်ႇႁၢင်ႈ ၸွမ်သိုၵ်းဢွင်ႇသၢၼ်းမၢႆတွင်းဝၼ်းလွတ်ႈ လႅဝ်းလႄႈဝၼ်းမိူင်းႁူမ်ႈတုမ် ၵူၺ်းၵႃႈ ၵူၼ်းမိူင်းပိုၼ်ႉတီႈ တုၵ်းယွၼ်းႁႂ်ႈၵေႃႇသၢင်ႈပၵ်းပႃး ႁုၼ်ႇႁၢင်ႈ ၽူႈႁတ်းငၢၼ် 9 ၵေႃႉ ဝႃႈၼႆ။

ပူၼ်ႉမႃး ဝၼ်းတီႈ 26/02/2018 ၼၼ်ႉ ယူႇတီႈပႃႇတီႇၼူၵ်ႉယုင်း တင်း ၾၢႆႇၽွင်းငမ်း ၸႄႈဝဵင်းမူႇၸေႊ လႆႈၶွတ်ႇ ၽွတ်ႈၶွမ်ႊမတီႊ တႃႇသွၵ်ႈႁႃပိုၼ်ႉတီႈ-တႃႇၵေႃႇသၢင်ႈပၢင်ႇၸတ်းပွႆးဝၼ်းလွတ်ႈလႅဝ်း တႃႇတေၵေႃႇသၢင်ႈႁုၼ်ႇႁၢင်ႈ ၸွမ်သိုၵ်းဢွင်ႇသၢၼ်းလႄႈ လၵ်းသဝ်ႁိၼ်။ တေလူင်းပိုၼ်ႉတီႈထတ်းတူၺ်း ဢွင်ႈတီႈ ဝႃႈၼႆ။

ၸၢႆးလဵၵ်ႉ ၵူၼ်းၼုမ်ႇၸႄႈဝဵင်းမူႇၸေႊ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လွင်ႈတေၵေႃႇသၢင်ႈႁုၼ်ႇႁၢင်ႈၸွမ် သိုၵ်းဢွင်ႇသၢၼ်းၼၼ်ႉ ယူႇတီႈ NLD ၵေႃႉၶိုင်ပွင်။ ယူႇတီႈတၢင်းႁၼ်ထိုင်ႁဝ်းၶႃႈဝႃႈတႄႉ သင်ဝႃႈတေပၵ်းႁုၼ်ႇ ႁၢင်ႈၼႆၸိုင် ဢမ်ႇၸႂ်ႈႁုၼ်ႇႁၢင်ႈ ၸွမ်သိုၵ်းဢွင်ႇသၢၼ်း ၵေႃႉလဵဝ်။ သင်ပဵၼ်လႆႈၼႆ ႁႂ်ႈပၵ်းပႃး ႁုၼ်ႇႁၢင်ႈၽူႈ ႁတ်းငၢၼ် တင်း 9 ၵေႃႉ ၶႅၼ်းတေတဵမ်ထူၼ်ႈ။ ၸွမ်သိုၵ်း ဢွင်ႇသၢၼ်းၼႆႉ မၼ်းပဵၼ်ၽူႈဢွၼ်ႁူဝ်တၢင်းလိၼ် ထုင်ႉပဵင်း ဢၼ်ဝႃႈၼၼ်ႉ ထုၵ်ႇမႅၼ်ႈယဝ်ႉ။ တွၼ်ႈတႃႇ ၸၢဝ်းၶိူဝ်းၵေႃႈ မီးၽူႈဢွၼ်ႁူဝ်ဝႆႉႁင်း ၽႂ်မၼ်းယူႇ။ ပေႃးၶႂ်ႈလႆႈလွင်ႈၽဵင်ႇပဵင်းပဵၼ်ထမ်းၼင်ႇၸၢဝ်းၶိူဝ်းယွၼ်းဝႆႉ၊ ပေႃးၶႂ်ႈပဵၼ်ၾႅတ်ႊၻရႄႊတီႊမူဝ်ႊၶရေႊသီႊ ၼင်ႇၸၢဝ်းၶိူဝ်းယွၼ်းဝႆႉၼၼ်ႉ ထုၵ်ႇလႆႈႁဵတ်းပၼ် ႁႂ်ႈၽဵင်ႇပဵင်းယူႇ” ဝႃႈၼႆ။

ၸၢႆးမျၢတ်ႈ ၵူၼ်းမိူင်း မူႇၸေႊလၢတ်ႈဝႃႈ “ ႁဝ်းၶႃႈ ၵူၼ်းမိူင်း တေႁူမ်ႈၵၼ်လူင်း လၢႆးမိုဝ်းသေ တၢင်ႇလိၵ်ႈထိုင် ပႃးၾၢႆႇၽွင်းငမ်းမူႇၸေႊ၊ ၵွၼ်ႇၶဝ်တေၸတ်းႁဵတ်းပၢင်ၵုမ် ၼႂ်းဝၼ်းတီႈ 7 လိူၼ်ၼႆႉ ႁႂ်ႈၶဝ်ဢဝ်ဢုပ်ႇၵၼ်ၼႂ်း ပၢင်ၵုမ်။ သင်ဝႃႈ ၶဝ်တေၵေႃႇသၢင်ႈႁုၼ်ႇႁၢင်ႈ ၽူႈႁတ်းငၢၼ် တင်း 9 ၵေႃႉယူႇၸိုင် ႁဝ်းၶႃႈတေယွမ်းႁပ်ႉယူႇ။ သင်ဝႃႈ ၵေႃႇသၢင်ႈႁဵတ်းႁုၼ်ႇႁၢင်ႈ ၸွမ်သိုၵ်းဢွင်ႇသၢၼ်းၵေႃႉလဵဝ်ၵူၺ်းတႄႉ ႁဝ်းၶႃႈ တေသိုပ်ႇသၢၼ်ၶတ်းၵႂႃႇ ႁၢဝ်ႈႁႅင်း” ဝႃႈၼႆ။
တေႃႈလဵဝ် ယူႇတီႈၶွမ်ႊမတီႊၾၢႆႇၸတ်းပွင်ၵၢၼ် တိုၵ်ႉလူင်းၵူတ်ႇထတ်းတူၺ်းတီႈလိၼ် ဢၼ်တေၵေႃႇသၢင်ႈ ဢွင်ႈတီႈယူႇ။ သင်ဝႃႈ ထိုင်မႃး ဝၼ်းတီႈ 13 လိူၼ်မၢတ်ႊၶျ်ၸိုင် တေႁဵတ်းပၢင်ၵုမ်သေ မၵ်းမၼ်ႈ ဢွင်ႈတီႈမၼ်းၵႂႃႇ ဝႃႈၼႆ။