လုၵ်ႈဢွၼ်ႇယိင်းဢႃယု 1 ၶူပ်ႇပၢႆ ႁၢႆလႆႈ 2 ဝၼ်း ၵူၼ်းႁူႉၸၵ်းလၵ်ႉဢဝ်ၵႂႃႇပွႆႇၼႃႈထမ်ႈၼိူဝ်လွႆ

လုၵ်ႈဢွၼ်ႇယိင်း ဢႃယု 1 ၶူပ်ႇ 8 လိူၼ် ယူႇဝၢၼ်ႈႁူၺ်ႈၽၵ်ႇၻၢပ်ႇ ၸႄႈဝဵင်းမႄႈတႅင် ၸႄႈတွၼ်ႈၵဵင်းမႆႇ ၸိုင်ႈထႆး ႁၢႆၵႂႃႇလႆႈ 3 ဝၼ်းမိူဝ်ႈၼႆႉ ၽူႈၸၢႆး ၵူၼ်းႁူႉၸၵ်းမိုတ်ႈၵိုဝ်းတင်းပေႃႈလုၵ်ႈဢွၼ်ႇ ပိုတ်ႇပၢၵ်ႇလၢတ်ႈတီႈ ပလိၵ်ႈဝႃႈ လႆႈႁွပ်ႇဢုမ်ႈလုၵ်ႈဢွၼ်ႇၵႂႃႇပႅတ်ႈပၢၵ်ႇထမ်ႈ ၼိူဝ်လွႆ ။

လုၵ်ႈဢွၼ်ႇယိင်း ၸိုဝ်ႈႁွင်ႉၼွင်ႉၵျီးၼႃႉ ၸိုဝ်ႈတႄႉ ၼွင်ႉၽွၼ်းသီႇရီႇ ဝူင်းသီလႃးရုင်ႉ ဢႃယု 1 ၶူပ်ႇ 8 လိူၼ် ႁၢႆၵႂႃႇမိူဝ်ႈဝၼ်းတီႈ 5 ယၢမ်းႁူဝ်ၶမ်ႈမွၵ်ႈ 6 မူင်းပၢႆ။

ပလိၵ်ႈၸႂ်ႉႁႅင်းၵူၼ်း 300 ပၢႆ ၊ ၸႂ်ႉၶိူင်ႈမိၼ်ႁႄႊလီႊၶွပ်ႊတိူဝ်ႊ လႄႈ ၻရူၼ်ႊ သွၵ်ႈႁႃၼွင်ႉၵျီးၼႃႉ ၼႂ်းဝၢၼ်ႈၼွၵ်ႈဝၢၼ်ႈလႄႈၼႂ်းထိူၼ်ႇ ထပ်းၵၼ်မႃး 2 -3 ဝၼ်း။ ထိုင်မႃးမိူဝ်ႈဝႃး ၵူတ်ႇထတ်းထူပ်းႁၼ်ၵူၼ်းၼႂ်းဝၢၼ်ႈၵေႃႉၼိုင်ႈ  ၸိုဝ်ႈၸၢႆးသဵဝ်ႈ ဢႃယု 45 ပီ ပဵၼ်ၵူၼ်းႁူႉၸၵ်း /ဢူၺ်းၵေႃႉပေႃႈၼွင်ႉၵျီးၼႃႉ ၊ ပလိၵ်ႈဝႃႈပဵၼ်ၽူႈဢၼ်လီထၢင်ႇထိူမ် ၼႆသေႁွင်ႉၵႂႃႇၵူတ်ႇထတ်းထဵတ်ႈထၢမ်တင်းၶိုၼ်း ။

ထိုင်ၼႂ်ၼႆႉဝၼ်းတီႈ 8/9/2021 မၼ်းၸၢႆးလၢတ်ႈတီႈပလိၵ်ႈထႆးဝႃႈ – “ၸွမ်းၼင်ႇၽီႁူၺ်ႈၽီလွႆ တုၵ်းယွၼ်းမႃးလႄႈ မၼ်းၸင်ႇလႆႈဢဝ်ၼွင်ႉၵျီးၼႃႉ ၵႂႃႇပွႆႇဝႆႉပၼ်ၼႃႈထမ်ႈ ၼိူဝ်လွႆ”- ဝႃႈၼႆ။

ႁွင်ႈၵၢၼ်ၶၢဝ်ႇထႆး မၢင်ဢၼ်လၢတ်ႈဝႃႈ ၸၢႆးသဵဝ်ႈပဵၼ်ၵူၼ်းမိူင်းမၢၼ်ႈ ဝႃႈၼႆသေတႃႉ ပလိၵ်ႈယင်းပႆႇပိုၼ်ၽၢဝ်ႇပဵၼ်တၢင်းၵၢၼ်။

ယၢမ်းလဵဝ် ပလိၵ်ႈလႄႈၵူၼ်းဝၢၼ်ႈ တိုၵ်ႉၶိုၼ်ႈၵႂႃႇတူၺ်းၼႃႈပၢၵ်ႇထမ်ႈ ဢၼ်ယၢၼ်ၵႆၵၼ်တင်းဝၢၼ်ႈၽၵ်းၶႅပ်ႉ မွၵ်ႈ 3 ၵီႊလူဝ်ႊမီႊတိူဝ်ႊ တီႈၸၢႆးသဵဝ်ႈလၢတ်ႈၼၼ်ႉယူႇ ၶၢဝ်ႇထႆး ၵူၼ်းလၢၼ်ႉၼႃး ပိုၼ်ၽၢဝ်ႇဝႆႉၼင်ႇၼႆ။

ၸၢႆးသဵဝ်ႈတႄႉလၢတ်ႈဝႃႈ မၼ်းဢမ်ႇလႆႈႁဵတ်းႁၢႆႉ ၊ ဢမ်ႇလႆႈၶႃႈႁႅမ်ၼွင်ႉၵျီးၼႃႉ ။ ၵႂႃႇပွႆႇဝႆႉ ယဝ်ႉ ဝႆႈၽီပႃႇထိူၼ်ႇသေလူင်းမႃးၶိုၼ်းၵူၺ်း ဝႃႈၼႆလႄႈ ပလိၵ်ႈလၢမ်းၶၢတ်ႈဝႃႈ လႅပ်ႈၼွင်ႉၵျီးၼႃႉ  လႅပ်ႈပႆႇတၢႆ ၸၢင်ႈႁႃႁၼ်တူဝ်ဢၼ်မီးဢသၢၵ်ႈသၢႆၸႂ်ၶိုၼ်းယူႇ ဝႃႈၼႆ။ 

ဝၢၼ်ႈႁူၺ်ႈၽၵ်ႇၻၢပ်ႇၼႆႉ မီးၼႂ်းဢိူင်ႇ ဢိၼ်းတၶိၼ် ၸႄႈဝဵင်းမႄႈတႅင် ၸႄႈတွၼ်ႈၵဵင်းမႆႇ ၸိုင်ႈထႆး။ လင်ႁိူၼ်းတေမီးမွၵ်ႈ 100 လင် လႆႈႁူႉၸွမ်းႁွင်ႈၵၢၼ်ၶၢဝ်ႇထႆး ႁၢႆးငၢၼ်းဝႆႉၼင်ႇၼႆ။