ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်လွင်ႈတၢင်းၵူၼ်းသိုၵ်းၶဝ် တီႈၵဵၵ်ႉ/ လၢၼ်ႇလွႆၶႂၢင် ၼႂ်းၵႄႈ လၢႆးၶႃႈ – မိူင်းၵိုင် လၵ်ႉပၢႆႈ ၼၼ်ႉသေ ၶဝ်ႈသွၵ်ႈ ၼႂ်းဢိူင်ႇထုင်ႉယိူင်း ဝဵင်းလၢႆးၶႃႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ တူၵ်းၸႂ် ၵူဝ်ႁႄ ဝႃႈၼႆ။
တႄႇဢဝ် ဝၼ်းတီႈ 4/9/2021 မႃးတေႃႇထိုင် ဝၼ်းတီႈ 6/9/2021 ယၢမ်းၵၢင်ၼႂ်ၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဵၼ် ႁႅင်း မွၵ်ႈ 70 ၶဝ်ႈသွၵ်ႈတဝ် ၼႂ်းဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼႄဝႃႈ ၵူၼ်း သိုၵ်းၶဝ်ႁၢႆၼႆသေ ၶဝ်ႈသွၵ်ႈတဝ် ၸွမ်းၼႂ်းမူႇဝၢၼ်ႈ ၼႆယဝ်ႉ။
ၵူၼ်း ထုင်ႉယိူင်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “သိုၵ်းၶဝ်ၼႆႉ ပဵၼ်တပ်ႉသင်တႄႉ ဢမ်ႇလႆႈႁူႉၶႃႈ မႃး ယူႇၸွမ်းၼႂ်းမူႇဝၢၼ်ႈ ၸွမ်းႁူင်းႁဵၼ်းၸိူဝ်ႉၸၢတ်ႈၸိူဝ်းၼႆႉၶႃႈဢေႃႈ။ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ် ၵူဝ်ၵၼ်ၶႃႈ။ မိူဝ်ႈဝႃး ဝၼ်းသိလ် ၵူၼ်းထဝ်ႈဢမ်ႇႁတ်းၶိုၼ်ႈၵျွင်းလွင်းမွၵ်ႇၵၼ်။ ၵၢင်ၶမ်ႈၵေႃႈ ဢမ်ႇႁတ်းပိုတ်ႇၾႆး တႆႈၾႆး ဢမ်ႇႁတ်း ဢွၵ်ႇ ႁိူၼ်းယေးၵၼ် ယၢမ်းၵၢင်ၶမ်ႈ 6 မူင်းၵူၺ်း ယဵၼ်သီႇမူတ်း ၶႃႈဢေႃႈ”- ဝႃႈၼႆ။
ၶွင်ႇသီႇသိုၵ်းမၢၼ်ႈ ဢဵၼ်ႁႅင်းမွၵ်ႈ 70 ၼၼ်ႉ ၼႄလွင်ႈတၢင်းဝႃႈ မႃးသွၵ်ႈ တဝ်ၵူၼ်းသိုၵ်းၶဝ်ႁၢႆ တီႈၵဵၵ်ႉလွႆ ၶႂၢင် ၼႂ်းၵႄႈ လၢႆးၶႃႈ – မိူင်းၵိုင် မိူဝ်ႈဝၼ်းတီႈ 29/8/2021 ပူၼ်ႉမႃးၼၼ်ႉ လၵ်ႉပၢႆႈၵေႃႉၼိုင်ႈ ယဝ်ႉၵေႃႈ ဢဝ်ပႃးၵွင်ႈၵႂႃႇ 4 လဝ်း ရူတ်ႉၶိူင်ႈလမ်းၼိုင်ႈ လိူဝ်ၼၼ်ႉ ငိုၼ်းၵမ်ႈၽွင်ႈ ၼႆယဝ်ႉ။
“သိုၵ်းၶဝ် မႃးသွၵ်ႈတဝ်ၼႂ်းမူႇဝၢၼ်ႈ ၼႂ်းထုင်ႉယိူင်းၼႆႉ ပႃးၵွင်ႈၸေးမိုဝ်းၵူႈၵေႃႉ။ လွင်ႈၶဝ်မႃးသွၵ်ႈတဝ် ယူႇၸိူင်ႉၼႆ ႁဵတ်း ႁႂ်ႈၵူၼ်းဝၢၼ်ႈ ၵႂႃႇမႃးပႆယၢပ်ႇထႅင်ႈ။ ၶဝ်ဝႃႈတႄႉ တေဢၢၼ်းမႃးသွင်ဝၼ်းၵူၺ်း။ မိူဝ်ႈၼႆႉ ၵၢင်ၼႂ် ၶဝ်ဢွၵ်ႇမိူဝ်းယဝ်ႉ ၵူၺ်း ၵႃႈ ႁဝ်းၶႃႈ ၵူၼ်းဝၢၼ်ႈတႄႉ တိုၵ်ႉလႆႈၾၢင်ႉသတိၵၼ်ယူႇၶႃႈ”- ၵူၼ်းပိုၼ်ႉတီႈထုင်ႉယိူင်း သိုပ်ႇလၢတ်ႈၼႄၼင်ႇၼႆ။
မိူဝ်ႈၼႆႉ ဝၼ်းတီႈ 6/9/2021 ယၢမ်းၵၢင်ၼႂ် ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်မႃးသွၵ်ႈတဝ် ထင်ယူႇၼႂ်းဢိူင်ႇထုင်ႉယိူင်း ၼၼ်ႉ ၶိုၼ်းဢွၼ်ၵၼ် ထွႆဢွၵ်ႇၼႂ်း ဢိူင်ႇထုင်းယိူင်းၵႂႃႇယဝ်ႉ ဝႃႈၼႆ။
