ၵႃး10 လေႃႉ တေႃႉတၢင်ႇမႆႉသၵ်း ယၢမ်းၵၢင်ၶိုၼ်း ႁေႃးၽႃႇၺႃး ၽၵ်းတူၶဝ်ႈဝဵင်းလႄႈ ပၢႆႉဝတ်ႉ လူင်ၵေႃႇမိူင်း ဝဵင်းၼမ်ႉၶမ်း ၽႃႇသွင်တီႈႁၢင်ႇၵၼ်ၼိုင်ႈၸူဝ်ႈမူင်းၵူၺ်း – ၵူၼ်းမိူင်းဢမ်ႇလႆႈၸႂ်။
ဝၼ်းတီႈ 03/03/2018 ၶၢဝ်းယၢမ်းၵၢင်ၼႂ် 3:45 မူင်း ၵႃးလူင် 10 လေႃႉ တေႃႉတၢင်ႇမႆႉသၵ်းလမ်း ၼိုင်ႈ လုၵ်ႉမိူင်းဝီး လတ်းၼမ်ႉၶမ်း သူင်ႇၶဝ်ႈမိူင်းၶႄႇ ၽႃႇသႂ်ႇၽၵ်းတူၶဝ်ႈဝဵင်း – ၶၢဝ်းယၢမ်း 4 မူင်း ပၢႆထႅင်ႈလမ်းၼိုင်ႈ ၵႂႃႇၽႃႇသႂ်ႇပၢႆႉၶဝ်ႈဝတ်ႉလူင်ၵေႃႇမိူင်းၵၢင်ဝဵင်းၼမ်ႉၶမ်း ။ ၽၵ်းတူဝဵင်းလူမ်ႉလႅဝ် မူတ်း၊ ပၢႆႉၵၢင်ဝဵင်းၼၼ်ႉၵေႃႈတႅၵ်ႇၵွႆ။
ၸၢႆးသႅင် ၵူၼ်းၼမ်ႉၶမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵႃးတၢင်ႇမႆႉၸိူဝ်းၼႆႉ ပေႃးဢမ်ႇမီး ပၢင်တိုၵ်းၼႆ တေႃႇတၢင်ႇမႆႉမိူင်းတႆး သူင်ႇၶဝ်ႈမိူင်းၶႄႇ ၵူႈၶိုၼ်း။ ၵူၼ်းမိူင်းဢၼ်ယူႇၸွမ်းသွင်ၾင်ႇ သဵၼ်ႈတၢင်းဢမ်ႇၸၢင်ႈၼွၼ်းလပ်းလီလီႁေႃႈဝႆးၼႃႇ- သဵၼ်ႈတၢင်းၵေႃႈလူႉၵွႆ ၊ မၢင်ပွၵ်ႈၵေႃႈ ၽႃႇသႂ်ႇပၢႆႉ ၊ ႁူဝ်ႉၵူၼ်းဝၢၼ်ႈၸိူဝ်းၼႆႉ ၵႃးၸိူဝ်းၼႆ့ၸဝ်ႈၶွင်ပဵၼ်ၶႄႇ၊ ႁူမ်ႈမိုဝ်းၵၼ်တင်းၸဝ်ႈဢႃႇၼႃႇ ၼႂ်းပိုၼ်ႉတီႈသေ တၢင်ႇမႆ့သၵ်း၊ မႆ့ၸိင်ၵူႈသႅၼ်းသႅၼ်း ၾၢႆႇမိူင်းတႆးဢဝ်ၶဝ်ႈမိူင်းၶႄႇ မႃးပီယၢဝ်း ၶၢဝ်းႁိုဝ်ယဝ်ႉ ” ဝႃႈၼႆ ။
ၵူၼ်းႁေႃႈၵႃး 10 လေႃႉ ဢၼ်ႁေႃႈတုမ်ႉၽႃႇၺႃး ၽၵ်းတူၶဝ်ႈဝဵင်းလႄႈ ပၢႆႉဝတ်ႉၼႆႉ ယၢမ်းလဵဝ် ၽူႈမီးပုၼ်ႈၽွၼ်း ပလိၵ်ႈၸႄႈဝဵင်းၼမ်ႉၶမ်း လႆႈၵူတ်ႇထတ်း တီႉၺွပ်းၵုမ်းၶင်ဝႆႉ တီႈႁူင်းပလိၵ်ႈ ၸႄႈဝဵင်းၼမ်ႉၶမ်း ဝႆႉယဝ်ႉ ဝႃႈၼႆ။
ၸၢႆးပီး ၵူၼ်းၼမ်ႉၶမ်းၵေႃႈလၢတ်ႈဝႃႈ- “ မိူဝ်ႈၵူႈပွၵ်ႈၵေႃႈရူတ်ႉၵႃးတၢင်ႇမႆႉၼႆႉ ၵႆႉၽႃႇၺႃး ၶူဝ်းၶွင် ၵူၼ်းမိူင်းလူႉၵွႆ။ ၵူၺ်းၵႃႈဢမ်ႇတွၼ်ႉလႆႈၵႃႈသၢႆႈတႅၼ်းၶိုၼ်းသေဢမ်ႇၵႃး ဢမ်ႇႁၼ်ၸဝ်ႈၼႃႈ တီႈဢဝ်လိူင်ႈပၼ်တူတ်ႈတၢမ်ႇသင် ” – ဝႃႈၼႆ။
ၵႃးတၢင်ႇမႆ့ၸိူဝ်းၼႆ့မၢင်ပွၵ်ႈၵေႃႈ တေႃ့တၢင်ႇ ပႃးၶၢဝ်းယၢမ်းၵၢင်ဝၼ်းၵေႃႈမီး၊ ၵမ်ႈၼမ်တႄ့လၵ်ႉ တေႃ့ဢွၵ်ႇယၢမ်းၵၢင်ၶမ်ႈၵၢင်ၶိုၼ်း။ မႆ့သၵ်းၶဝ်တႅပ်းတေႃ့တၢင်ႇ ၶဝ်ႈမိူင်းၶႄႇတႄ့ ပဵၼ်မႆ့ဢၼ် ဢွၵ်ႇၸွမ်းသၢပ်ႇၼမ်ႉမၢဝ်း၊ ၼႂ်းၸႄႈဝဵင်းမိူင်းမိတ်ႈ၊ ၼမ်ႉၶမ်း၊ မၢၼ်ႈပဵင်း၊ ထုင်ႉလွႆႁူဝ်သိူဝ်၊ မၢၼ်ႈမေႃႇ၊ မိူင်းဝီး – ၸိူဝ်းၼႆ့။
