ၵေႃလိၵ်ႈလၢႆးလႄႈၾိင်ႈငႄႈတႆးၸႄႈဝဵင်းတႃႈၶီႈလဵၵ်း ၸတ်းႁဵတ်းပၼ် ပၢင်ၾိုၵ်းၽွၼ်ႉမေႃသွၼ်လိၵ်ႈတႆး ၶၢဝ်းမႆႈ တင်းမူတ်း မေႃသွၼ်ၶဝ်ႈႁူမ်ႈလဵပ်ႈႁဵၼ်း 60 ၵေႃႉ။

ဝၼ်းတီႈ 4-6/3/2018 ပၢင်ၾိုၵ်းၽွၼ်ႉမေႃသွၼ်လိၵ်ႈတႆး ၶၢဝ်းမႆႈ ၸတ်းႁဵတ်း တီႈဝတ်ႉဝၢၼ်ႈႁွင်ႇ ႁွင်ႈလိုၵ်ႉ ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉပၼ်မေႃသွၼ် တႃႇလူင်းပိုၼ်ႉတီႈပူင်သွၼ် တီႈပၢင်သွၼ်လိၵ်ႈတႆးၶၢဝ်းမႆႈ ၼႂ်းဢိူင်ႇဝၢၼ်ႈၽႂ်မၼ်း ဝႃႈၼႆ။

ၸၢႆးၼုမ်ႇတုၺ်ႈ ၽူႈထတ်းသဵၼ်ႈမၢႆ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းတႃႈၶီႈလဵၵ်း လၢတ်ႈတီႈ ၸုမ်းၶၢဝ်ႇ ၽူႈတွႆႇႁွၵ်ႈဝႃႈ “ သင်ဝႃႈ ပၢင်ၾိုၵ်းၽွၼ်ႉမေႃသွၼ်လိၵ်ႈတႆးၼႆႉ ယဝ်ႉၵႂႃႇၸိုင် မေႃသွၼ်ဢၼ်မႃးၶဝ်ႈႁူမ်ႈၸိူဝ်းၼႆႉ တေႁပ်ႉပုၼ်ႈၽွၼ်းၽႂ်မၼ်းသေ လူင်းပိုၼ်ႉတီႈပူင်သွၼ်ၶိုၼ်းၼႂ်းဢိူင်ႇၽႂ်ဝၢၼ်ႈမၼ်း။ ၼႂ်းပီၼႆႉ ႁဝ်းၶႃႈတေပိုတ်ႇ ပၢင်သွၼ်လိၵ်ႈတႆးၶၢဝ်းမႆႈၵႂႃႇ တင်းမူတ်း 56 ပၢင်။ ၼႂ်းၸႄႈဝဵင်းတႃႈၶီႈလဵၵ်း 53 ပၢင်လႄႈ ၸႄႈဝဵင်းမိူင်းၽျၢၵ်ႈထႅင်ႈ 3 ပၢင်” ဝႃႈၼႆ။

ၶူးသွၼ် ဢၼ်မႃးပူင်သွၼ် ပၼ်ပၢင်ၾိုၵ်းၽွၼ်ႉမေႃသွၼ်လိၵ်ႈတႆးၶၢဝ်းမႆႈ ၼႂ်းၸႄႈဝဵင်းတႃႈၶီႈလဵၵ်း တႃႇၶၢဝ်း တၢင်း 3 ဝၼ်းသမ်ႉ ပဵၼ်ၶူးသွၼ်ၼႂ်းၸုမ်းၵေႃတႆး။

ပၢင်သွၼ်လိၵ်ႈတႆး ၶၢဝ်းမႆႈ ဢၼ်တေတႄႇပူင်သွၼ်ပၼ်ၵႂႃႇၼႂ်းဝၢၼ်ႈဢိူင်ႇၼႂ်းၸႄႈဝဵင်းတႃႈၶီႈလဵၵ်းသမ်ႉ ဝၼ်းတီႈ 10/03/2018 ထိုင် 06/05/2018 ဝႃႈၼႆ။

ၼႂ်းမိူင်းတႆး ပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ လၢႆလၢႆတီႈၵေႃႈ ဢဝ်တိုဝ်ႉတၢင်း ၶၢဝ်းယၢမ်း ဢိုတ်းႁူင်းႁဵၼ်း လူင်ပွင်ၸိုင်ႈမၢၼ်ႈသေ ဢွၼ်ၵၼ်ႁၢင်ႈႁႅၼ်းတႃႇပိုတ်ႇပၢင်သွၼ်လိၵ်ႈတႆးယူႇႁင်းၽႂ်မၼ်း။