သိုၵ်း RCSS တင်း SSPP ယိုဝ်းၵၼ်လႄႈ ၵူၼ်းထုင်ႉၼမ်ႉလၼ်ႈ ဢိူင်ႇဝၢၼ်ႈၸိင်း ၸႄႈဝဵင်းသီႇပေႃႉ ပၢႆႈထိုင် ၼႂ်းၸႄႈဝဵင်းမိူင်းၵိုင် ယၢမ်းလဵဝ် ႁူဝ်ၵူၼ်းမီးၵႂႃႇ 200 ပၢႆ ။
သိုၵ်း RCSS တင်း SSPP တိုၵ်းၵၼ်၊ တေႃးၵၼ် လႄႈ မိူဝ်ႈၼႆႉ ဝၼ်းတီႈ 26/8/2021 ၵူၼ်းဝၢၼ်ႈလွႆလူင် ဢိူင်ႇဝၢၼ်ႈၸိင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႈ ပၢႆႈဢွၵ်ႇမႃးတီႈဝတ်ႉပၢင်လၢင်ႈ ဝၢၼ်ႈၽၵ်းႁိ ဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ထႅင်ႈ 55 ၵေႃႉ၊ ယၢမ်းလဵဝ် ၵူၼ်းပၢႆႈၽေး မီး 207 ၵေႃႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵူၼ်းတၢင်း ၼမ်ႉလၼ်ႈ ပၢႆႈၽေး ထႅင်ႈၶႃႈ။ ယၢမ်းလဵဝ် တီႈဢိူင်ႇတူင်ႇလၢဝ်းႁဝ်း ၶႃႈတႄႉ လူဝ်ႇၶဝ်ႈၼမ်ႉ တၢင်းၵိၼ် ယႃႈယႃ ၶိူင်ႈၵႅတ်ႇၵင်ႈ တၢင်းပဵၼ် ၵူဝ်ႊဝိတ်ႉၸိူဝ်းၼႆႉ ဢေႃႈ”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တင်းမူတ်း 207 ၵေႃႉ လင်ႁိူၼ်း 65 လင် မႃးမီးဝႆႉ တီႈဝတ်ႉပၢင်လၢင်ႈ ဝၢၼ်ႈၽၵ်းႁိ ၼႂ်းဢိူင်ႇတူင်ႇလၢဝ်းၼႆႉ ပဵၼ် ၵူၼ်းၼႂ်းထုင်ႉၼမ်ႉလၼ်ႈ ၵူၼ်းဝၢၼ်ႈၵျွင်း၊ ၼွင်ပိင်၊ လွႆလူင်၊ ၵုင်းယူမ်း၊ ၸၢမ်ၵႃးလႄႈ ၼႃးမူင်ႈ ၸိူဝ်းၼႆႉ။
ထႅင်ႈၾၢႆႇၼိုင်ႈၵေႃႈ မႆႈၸႂ်ပႃး လွင်ႈတၢင်းပဵၼ်ၶူဝ်ႊဝိတ်ႉ 19 ထႅင်ႈ ယၢမ်းလဵဝ် ၼႂ်းၸႄႈဝဵင်းမိူင်းၵိုင်သမ်ႉ မီးၵူၼ်းတိတ်း ၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်း 14 ၵေႃႉ၊ ယႃၶႅၼ်း 9 ၵေႃႉ၊ တိုၵ်ႉယူတ်းယႃဝႆႉ 5 ၵေႃႉ ။ ယၢမ်းလဵဝ် ၵူၼ်းမိူင်းမႆႈၸႂ် ၵူဝ်တၢင်းပဵၼ်ၽႄႈၸပ်းၵၼ်ယူႇသေတႃႉ ၽႅၼ်ႇပူၵ်ႉသူပ်း၊ ၶူႈလင်၊ ယႃႈယႃလၢင်ႉမိုဝ်း ၸိူဝ်းၼႆႉ သမ်ႉဢမ်ႇၵုမ်ႇထူၼ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ