လွင်ႈၽွမ်ႉႁူမ်ႈၵူၺ်း တေၸၢင်ႈတေႃႇသူႈလွင်ႈၶဵင်ႇတႃႉ ၵၢၼ်မိူင်းဝၼ်းမိူဝ်ႈၼႆႉ

ပီ 2021 လိူၼ်ၵျုၼ်ႊ 11 ဝၼ်း ပူၼ်ႉမႃးၼႆႉ လႆႈႁၼ်ၾၢႆႇၸုမ်းပလွင်ႈၶဝ် / ၸုမ်းပီႈၼွင်ႉတဢၢင်းၶဝ် ဢွၵ်ႇလိၵ်ႈမႃးၽိုၼ် ၼိုင်ႈ၊ ၼႂ်းၼၼ်ႉဝႃႈ ၸွမ်းလူၺ်ႈ ၶေႃႈၸီႉသင်ႇၶေႃႈၼႄႉၼမ်း CRPH သေယဝ်ႉ။ မိူဝ်ႈဝၼ်းတီႈ 6 လိူၼ်မၢတ်ႊၶျ် ပူၼ်ႉမႃး ၼႆႉ ၶဝ်လႆႈၶွတ်ႇၽွတ်ႈ ၸုမ်းၽွင်းငမ်းၵူၼ်းမိူင်း ၼႂ်းၵၢင်ၸူဝ်ႈၼႃႈတီႈ ပလွင်ႈၶဝ် ပေႃးတေဢဝ်တၢင်းၾၢႆႇမၢၼ်ႈ ဝႃႈၵေႃႈ (တအာန်းပလောင်ဒေသ ကြားကာလ ပြည်သူ့အုပ်ရေး အဖွဲ့)။

ၽိူဝ်ႇၽွတ်ႈယဝ်ႉ ၼႂ်းလိူၼ်ထူၼ်ႈသၢမ် ၽႅဝ်မႃးၼႂ်းလိူၼ်ထူၼ်ႈႁႃႈ ၶဝ်ၶိုၼ်းသိုပ်ႇၽွတ်ႈႁႅၼ်းထႅင်ႈ ၸုမ်းႁူမ်ႇလူမ်ႈလႄႈ ၵႅတ်ႇၶႄၵူၼ်းမိူင်း ၼႂ်းၵၢင်ၸူဝ်ႈ ၼႃႈတီႈပလွင်ႈ ဝႃႈၼႆ။

ၼႂ်းၼၼ်ႉ မၼ်းတေပႃးယူႇ 7 ၸႄႈဝဵင်း ၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉၶမ်း၊ မူႇၸေႊ၊ ၵူတ်ႉၶၢႆ၊ ၼမ်ႉတူႈ လႄႈ ၵျွၵ်ႉမႄး ၸိူဝ်းၼႆႉ။ တီႈၼႆႈ ပေႃးႁဝ်းမႃးတူၺ်း ဢၼ်ၶဝ်ၶွတ်ႇၽွတ်ႈၵႂႃႇ ၸုမ်းဢၼ်ၼၼ်ႉၼႆႉ မၼ်းပူၼ်ႉလိူဝ်ၼႃႈတီႈ ဢၼ်ႁဝ်း ၶႃႈ ႁူႉႁၼ်ထိုင်ၵၼ်ၸွမ်း ပၵ်းပိူင်လၵ်းမိူင်း 2008 ဝႃႈ ၼႃႈတီႈၽွင်းငမ်းသုၼ်ႇတူဝ် ဢမ်ႇၼၼ်ၵေႃႈ ၼႃႈတီႈၽွင်းငမ်း ႁင်းၶေႃၶေႃ ၶွင်ပီႈၼွင်ႉပလွင်ႈၼႆႉ တေမီးသွင်ၸႄႈဝဵင်းၵူၺ်း တေပဵၼ်ၼမ်ႉသၼ်ႇလႄႈ မၢၼ်ႈတူင်ႈ။

မိူဝ်ႈလဵဝ် 2008 ၼႆႉ ဢမ်ႇမီးယဝ်ႉ 2008 ၼႆႉ ယူႇတီႈ CRPH ယႃႉလူႉပႅတ်ႈယဝ်ႉဝႃႈၼၼ် ၸင်ႇတေၶွတ်ႇၽွတ်ႈပႃးၸဵမ် တင်း 5 ၸႄႈဝဵင်း ၸိူဝ်းဢမ်ႇၸႂ်ႈၼႃႈတီႈၶွင် ပီႈၼွင်ႉပလွင်ႈဢၼ်ႁဝ်းၶႃႈ ႁူႉၼၼ်ႉႁိုဝ်ၼႆၵေႃႈ တေလႆႈဝူၼ်ႉမႃးယဝ်ႉ။

ၵမ်းၼႆႉ ပေႃးမႃးတူၺ်းၼႂ်းလိၵ်ႈၼၼ်ႉၼႆ လွင်ႈတူင်ႉၼိုင်သၢၼ်ၶတ်း လၢႆးၵၢၼ် ၸဝ်ႈဢႃႇၼႃႇ CDM ၼႆႉ ပဵၼ်ၶၵ်ႉတွၼ်ႈ လမ်ႇလွင်ႈ ပိူဝ်ႈတႃႇပူၵ်းတူၵ်းပႅတ်ႈၶွင်ႇသီႇသိုၵ်းၶဝ်။ ၵွပ်ႈပိူဝ်ႈၸိူင်ႉၼႆလႄႈ ၽူႈႁၢပ်ႇၵၢၼ်ၶုၼ်တင်းသဵင်ႈ ႁႂ်ႈလႆႈႁဵတ်း CDM ၸိူဝ်းဢၼ်ၽူႈႁၢပ်ႇၵၢၼ်ၶုၼ် ဢိၵ်ႇလူၺ်ႈပႃးတင်း ၸိူဝ်းဢၼ်ႁဵတ်းၵၢၼ်ပွင်ႇၶၢဝ်ႇငၢဝ်းလႄႈ ၸိူဝ်းဢၼ်ၵမ်ႉၵႅမ် ၾၢႆႇၼၸၵၼၼ်ႉ ႁႂ်ႈၵိုတ်းယိုတ်းပႅတ်ႈၼႃႈၵၢၼ် ဢၼ်ၶဝ်သိုပ်ႇႁဵတ်း။ ယဝ်ႉၵေႃႈ ႁႂ်ႈဢွၼ်ၵၼ် ၸုၵ်းမၼ်ႈၸွမ်း ၶေႃႈၵၢင် ၸႂ် ၵူၼ်းမိူင်းသေ ပေႃးတင်းဝႃႈ ဢမ်ႇႁဵတ်းၸွမ်းၸိူင်ႉၼၼ် ယူႇတီႈၸုမ်းၼႆႉသေ လိူမ်ႈၶႃႈဢေႃႈ။

ယဝ်ႉၵေႃႈ ၾၢႆႇၼိုင်ႈ တၢင်းၼိုင်ႈ ၽူႈႁၢပ်ႇၵၢၼ်ၶုၼ်ၸိူဝ်းဢၼ်ဢမ်ႇႁဵတ်း CDM ၼၼ်ႉ ႁႂ်ႈပွၵ်ႈဝၢႆႇသၢႆႇၶိုၼ်းမိူဝ်း ဢွင်ႈတီႈ ၸႃတိ ၽႂ်မၼ်း။ သင်ၸိူဝ်း ဢမ်ႇပွၵ်ႈမိူဝ်းလႄႈ ပဵၼ်တႂ်ႈမီးၼိူဝ် ၵဵဝ်ႇလူၺ်ႈၵၢၼ်ႁူမ်ႇလူမ်ႈမႃး ၾၢႆႇၽွင်းငမ်းၵူၼ်းမိူင်းၶၢဝ်း ၵၢင်ၸူဝ်ႈၼႃႈတီႈပလွင်ႈၼႆႉ တေဢမ်ႇဢဝ်ပုၼ်ႈၽွၼ်း ဝႃႈၼၼ် မိူၼ်တင်းဝႃႈ ပၼ်ၾၢင်ႉၵေႃႈၸႂ်ႈ၊ လွၵ်ႈငိုတ်ႈၵေႃႈၸႂ်ႈ။

ပေႃးၽူႈလႂ် ၽႂ်ဢမ်ႇႁဵတ်းၸွမ်း ၶေႃႈၸီႉသင်ႇၶဝ်ၵေႃႈ မီးလွင်ႈတုမ်ႉတိူဝ်ႉဢသၢၵ်ႈ သၢႆၸႂ်မၼ်းၵေႃႈ ယူႇတီႈၸုမ်းၽွင်း ငမ်း ဢၼ်ၼႆႉ တေဢမ်ႇဢဝ်ပုၼ်ႈၽွၼ်းသင်။

ၵဵဝ်ႇလူၺ်ႈလိၵ်ႈဢၼ်ၼႆႉ ပေႃးမႃးတူၺ်း ပိူင်ယႂ်ႇသုတ်းမၼ်းတႄႉ ဢၼ်ဝႃႈ ၼႃႈတီႈၽွင်းငမ်းၵူၼ်းမိူင်း ၼႂ်းၵၢင်ၸူဝ်ႈၶွင် ပီႈၼွင်ႉပလွင်ႈၼၼ်ႉ ႁဵတ်းသင်သမ်ႉပႃး မႃးၼမ်ႉၶမ်း၊ မူႇၸေႊ၊ ၵူတ်ႉၶၢႆ၊ ၼမ်ႉတူႈ၊ ၵျွၵ်ႉမႄး ၸိူဝ်းၼႆႉ။ ဢၼ်ၼႆႉ မၼ်း ႁဵတ်းႁႂ်ႈတုမ်ႉတိူဝ်ႉလွင်ႈၶွတ်ႇလိူတ်ႈၵၼ် ၼႂ်းပီႈၼွင်ႉပလွင်ႈလႄႈ ပီႈၼွင်ႉတႆးႁိုဝ် ဢမ်ႇၼၼ် တၢင်ႇၸၢဝ်းၶိူဝ်း ၸိူဝ်း ၼၼ်ႉၵေႃႈ တေလႆႈထၢင်ႇထိူမ်မႃး ပေႃႈမႄႈပီႈၼွင်ႉၵူၼ်းမိူင်းသမ်ႉ ႁူႉၸွမ်းၸိူင်ႉႁိုဝ်သေ ၸုမ်းဢၼ်ၼႆႉသမ်ႉ လႆႈႁဵတ်း ဢွၵ်ႇမႃး မီးလွင်ႈတေလႆႈထၢမ်ထိုင်ၵၼ်မႃးယဝ်ႉ။

ၵွပ်ႈပိူဝ်ႈၸိူင်ႉၼႆ ယူႇတီႈၸုမ်းၵူၼ်းၼုမ်ႇတႆးၶဝ် ဢိၵ်ႇလူၺ်ႈပႃးတင်း ၸုမ်းသင်ၶၼုမ်ႇ ႁူမ်ႈၵၼ် မီး 9 ၸုမ်း ၸင်ႇတေ ဢွၵ်ႇလိၵ်ႈ ယိုၼ်ထိုင်တီႈၸုမ်း CRPH ၼင်ႇ ၶဝ်ၸဝ်ႈၼႄႉၼမ်းတႄႉဝႃႈ ဢၼ်ၼႆႉ မၼ်းပဵၼ်လွင်ႈမႃး ၶဝ်ႈၵႅဝ်ၸွမ်းၼႃႈ ၵၢၼ်မိူင်းတႆး။

ယဝ်ႉၵေႃႈ ယူႇတီႈ CRPH ၼႆႉ ဢမ်ႇႁဵတ်းၸွမ်း လၵ်းၸဵင် မိူင်းႁူမ်ႈတုမ် ဢၼ်ၵူႈၵေႃႉ ယုမ်ႇယမ်ၼပ်ႉထိုဝ်ဝႆႉၼၼ်ႉ။ ယဝ်ႉ ၵေႃႈ မိူၼ်တင်းဝႃႈ မႃးၶဝ်ႈၸႅၵ်ႇၼိူဝ်ႉလိူတ်ႈ ၼႂ်းၵႄႈၵၢင်ၵူၼ်းမိူင်းၸၢဝ်းၶိူဝ်း ဢၼ်ယူႇၸွမ်းၵၼ်မႃးၶၢဝ်းႁိုင်။ ၸိူင်ႉၼင်ႇ ၼႆၼႆႉ ဢမ်ႇထုၵ်ႇလီပဵၼ် မိူဝ်ႈၼႃးထႃႈပၢႆမႃးၵေႃႈ ယႃႇႁႂ်ႈလႆႈပဵၼ်ထႅင်ႈ ဢဝ်ၸဵမ်ၸိူဝ်းၼႆႉ တႅမ်ႈၵႂႃႇႁၢဝ်ႈႁၢဝ်ႈႁႅင်းႁႅင်း သၢၼ်ၶတ်းၵႂႃႇႁၢဝ်ႈႁၢဝ်ႈႁႅင်းႁႅင်း။

မိူၼ်ၸိူင်ႉၼႆၼင်ႇၵဝ်ႇ ယူႇတီႈၵေႃႁူမ်ႈသၢင်ႈၸိုင်ႈတႆး လႆႈမီးလွင်ႈထၢမ်ထိုင်ၸူး CRPH လႄႈ TNLA ၶဝ်။ တမ်ၼင်ႇ TNLA ၶဝ် တွပ်ႇမႃးတႄႉဝႃႈ လွင်ႈၶွတ်ႇၽွတ်ႈ ၸုမ်းၽွင်းငမ်းၵူၼ်းမိူင်း ၼႂ်းၵၢင်ၸူဝ်ႈ ပိူဝ်ႈတႃႇၼႃႈတီႈမိူင်းပလွင်ႈၼၼ်ႉ ယူႇတီႈ TNLA ဢမ်ႇလႆႈႁူႉၸွမ်း၊ ယဝ်ႉၵေႃႈ ယူႇတီႈ TNLA ဢမ်ႇလႆႈၶဝ်ႈပႃးၸွမ်း။ လိူဝ်ၼၼ်ႉ လွင်ႈပွင်ႇထိုင်ၵၼ် လွင်ႈ သူင်ႇၶၢဝ်ႇငၢဝ်းၸူးထိုင်ၵၼ် ဢဝ်ၸဵမ်ၸိူဝ်းၼႆႉ ဢမ်ႇမီးလွင်ႈႁႅၼ်းၸူးတီႈၶဝ်သေဢိတ်း ၶဝ်ဝႃႈၼႆ ၶႃႈၼေႃႈ။

ပေႃးပဵၼ်ၸိူင်ႉၼၼ်မႃးၼႆ ဢၼ်ႁဝ်းၶႃႈ လၢတ်ႈမႃးဝႃႈ (တအာန်းပလောင်ဒေသ ကြားကာလပြည်သူ့အုပ်ချုပ်ရေး အဖွဲ့) ၼၼ်ႉ ယူႇတီႈၽူႈလႂ်ၽႂ်ၸီႉသင်ႇသေလႄႈ ၽွတ်ႈႁႅၼ်းမႃး ယဝ်ႉၵေႃႈ ၶဝ်ႈပႃးၸိူဝ်းလႂ် ၵူၺ်းၵူၺ်း ယဝ်ႉသမ်ႉ တေႁဵတ်း ၼႃႈၵၢၼ် ပိူဝ်ႈတႃႇ ၵူၼ်းမိူင်းလႄႈ ႁူမ်ႇလူမ်ႈ ၸိူင်ႉၼင်ႇႁိုဝ် ပိူဝ်ႈတႃႇၵူၼ်းမိူင်းလႆႈ ယူႇလီၵိၼ်သၢင်ႈၵတ်းယဵၼ်ၵႂႃႇၼၼ်ႉ တေႁဵတ်းပၼ်ၸိူင်ႉႁိုဝ်။ လွင်ႈႁပ်ႉပုၼ်ႈၽွၼ်းလႄႈ လွင်ႈႁဵတ်းပုၼ်ႈၽွၼ်း မီးၸိူင်ႉႁိုဝ် တေလႆႈထၢမ်ၵၼ်မႃးယဝ်ႉ။

ၵူၺ်းၵႃႈ ၵဵဝ်ႇလူၺ်ႈလွင်ႈ ၶေႃႈထၢမ် ၵေႃပွင်ၵၢၼ်ၸိုင်ႈတႆးၼႆႉ ယူႇတီႈ CRPH တႄႉ ပႆႇႁၼ်တွပ်ႇသင်ၶိုၼ်းမႃး။ ၸိူင်ႉ ၼင်ႇၼႆၼႆႉ ႁဝ်းၶႃႈ မႃးဝူၼ်ႉတူၺ်းဝႃႈ ၽွင်းယၢမ်း ၵၢၼ်မိူင်းသုၵ်ႉသၵ်ႉဢူၼ်ဢၢၼ်ယုင်ႈယၢင်ႈၸိူင်ႉၼင်ႇၼႆၼႆႉ ၸုမ်း ဢၼ်ပွမ်ႁဵတ်းၽၢမ်း ၵဝ်းၼႂ်းၵႄႈၵၢင်မၼ်းၵေႃႈ ယူဝ်တေမီးႁိုဝ် ႁဝ်းၶႃႈ တေလႆႈဝူၼ်ႉမႃးယဝ်ႉ။

မိူဝ်ႈလိူၼ်ၵျုၼ်ႊ ဝၼ်းတီႈ 9 ၼၼ်ႉ တီႈဝဵင်းၵႃလီႉ ၼႂ်းၸႄႈဝဵင်းၵုၼ်ႁဵင် သမ်ႉမီးမႃး ၸုမ်းၼိုင်ႈ ဢၼ်ဝႃႈတပ်ႉၸုမ်း ၵႅတ်ႇၶႄၵူၼ်းမိူင်း ၸႄႈဝဵင်းၵႃလီႉ ၾၢႆႇမၢၼ်ႈၵေႃႈ တႅမ်ႈဝႆႉဝႃႈ (ကာလိမြို့နယ် ပြည်သူ့ကာကွယ်ရေးတပ်ဖွဲ့) ၼႆ ၶဝ်ၶွတ်ႇ ၽွတ်ႈၵႂႃႇယဝ်ႉ ႁၼ်ၶဝ်ပိုၼ်ၽၢဝ်ႇဢွၵ်ႇမႃး။

ၵူၺ်းၵႃႈ ၽိူဝ်ႇမႃးထၢမ်တူၺ်းတီႈၸုမ်းၸၢဝ်းဢၼ်မီးၼႂ်းပိုၼ်ႉတီႈလႄႈ ပေႃႈမႄႈ ၵူၼ်းမိူင်း။  ယူႇတီႈၵူၼ်းမိူင်းပိုၼ်ႉတီႈ တင်းမူတ်းတင်းသဵင်ႈ ၽူႈလႂ်ၽႂ်ဢမ်ႇလႆႈ ၶဝ်ႈႁူမ်ႈပႃးၸွမ်းၽူႈလႂ်ၽႂ် ဢမ်ႇလႆႈႁူႉၸွမ်း ၸိူင်ႉၼင်ႇၼႆၵေႃႈမီးၼႆ။ ၵမ်း လိုၼ်းမႃး ထိုင်တီႈၵမ်ႈၽွင်ႈလႆႈဝူၼ်ႉဝႃႈ ၸုမ်းၵႅတ်ႇၶႄၵူၼ်းမိူင်း ဢမ်ႇၼၼ်ၵေႃႈ တပ်ႉၸုမ်းၵႅတ်ႇၶႄပေႃႈမႄႈၵူၼ်းမိူင်း ဢၼ်ႁွင်ႉဝႃႈ PDF ၼၼ်ႉ ၼႃႈတီႈၸိူဝ်းဢၼ်မီးယဝ်ႉ ၸုမ်းသိုၵ်းၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉၼၼ်ႉ ဢမ်ႇထုၵ်ႇ လီမႃးၽွတ်ႈႁႅၼ်းယဝ်ႉ မီးပၢႆးဝူၼ်ႉၸိူင်ႉၼၼ်မႃးယဝ်ႉ။

မိူၼ်ၸိူင်ႉတီႈတၢင်းမိူင်းရၶႅင်ႇလႄႈ တီႈၸႄႈဝဵင်းတၢၼ်ႇတွႆးၼၼ်ႉၵေႃႈ ၵွပ်ႈပိူဝ်ႈဝႃႈ ၶဝ်ၶွတ်ႇၽွတ်ႈဢွၵ်ႇမႃး တပ်ႉသိုၵ်း ၵႅတ်ႇၶႄၵူၼ်းမိူင်းၼႆႉလႄႈ ယူႇတီႈႁူမ်ႈတုမ် ၵူၼ်းၼုမ်ႇ ၸႄႈဝဵင်းတၢၼ်ႇတွႆးၶဝ် ဢွၵ်ႇလိၵ်ႈသၢၼ်ၶတ်းမႃးဝႃႈ ၼႂ်းၼႃႈ တီႈႁဝ်းၼႆႉမီးဝႆႉ ၸုမ်း AA တပ်ႉသိုၵ်းရၶႅင်ႇယဝ်ႉလႄႈ ဢမ်ႇတပ်ႈလူဝ်ႇမႃးၽွတ်ႈႁႅၼ်းထႅင်ႈ ၸုမ်းၸၢဝ်းတႃႇ တေၵႅတ်ႇ ၶႄႁႄႉၵင်ႈၵူၼ်းမိူင်း ဢၼ်ဝႃႈၼၼ်ႉယဝ်ႉ ၸိူင်ႉၼႆၵေႃႈ မီးမႃးသၵ်းသေႇလၵ်းထၢၼ်မၼ်း။

ၵွပ်ႈပိူဝ်ႈၸိူင်ႉၼႆလႄႈ ၼႂ်းမိူင်းတႆး ၼႆၵေႃႈ ဢမ်ႇၵႃး တီႈပီႈၼွင်ႉပလွင်ႈၶဝ်ၸီႉသင်ႇ ၼႂ်းမိူင်းတႆး 7 ၸႄႈဝဵင်း ဢၼ်ႁဝ်း ၶႃႈ လၢတ်ႈမႃးၼၼ်ႉ တၢင်ႇတီႈသီႇလႅၼ် မိူၼ်ၸိူင်ႉၼင်ႇ တၢင်းထုင်ႉမိူင်းယေႃ၊ ထုင်ႉတၢင်ႉယၢၼ်း ၸိူဝ်းၼႆႉၵေႃႈ ယူႇတီႈ KIA သေယဝ်ႉ ၸီႉသင်ႇပႃး ၽူႈႁၢပ်ႇၵၢၼ်ၶုၼ်ၶဝ် ယႃႇႁႂ်ႈလႆႈၶဝ်ႈႁူမ်ႈပႃးၸွမ်း ၶိုၼ်ႈလုမ်း၊ ၶိုၼ်ႈၸႆး ႁႂ်ႈသၢၼ်ၶတ်း ႁႂ်ႈ ႁဵတ်း CDM ၸိူဝ်းၼႆႉၵေႃႈ မီးမႃး။ ၼႆႉၵေႃႈ ပဵၼ်လွင်ႈပူၼ်ႉလႅၼ် ပူၼ်ႉတီႈၵၼ်မႃး ၼႂ်းၼႃႈတီႈပီႈၼွင်ႉၸၢဝ်းတႆး ၼႂ်းၼႃႈ တီႈ ၸုမ်းသိုၵ်းတႆး ဢုပ်ႉပိူင်ႇၽွင်းငမ်း မီးယူႇၼၼ်ႉ ယူႇတီႈတၢင်ႇမူႇ တၢင်ႇၸုမ်း ပေႃးလႆႈမႃးၸီႉသင်ႇ ဢဝ်ႁဵတ်းပဵၼ် ၵၢၼ်ငၢၼ်းၶဝ်ၵႂႃႇ ၸိူဝ်းၼၼ်ႉၵေႃႈ မၼ်းဢမ်ႇထုၵ်ႇလီပဵၼ်။

သင်ဝႃႈ ပေႃးႁဝ်းၶႃႈ မႃးႁုပ်ႈသေ ထတ်းသၢင်တႄႉ ယူႇတီႈ CRPH သေ ႁႂ်ႈၽွတ်ႈႁႅၼ်း ၸုမ်း PDF ၸုမ်းၵႅတ်ႇၶႄၵူၼ်း မိူင်း ၸုမ်းၽွင်းငမ်းၵူၼ်းမိူင်း ဢၼ်ဝႃႈၸိူဝ်းၼၼ်ႉၼႆႉ မၼ်းဢမ်ႇတႅၵ်ႈတေႃး (ကြားကာလ ပြည်သူ့အုပ်ချုပ်ရေးအဖွဲ့) ၸုမ်းၽွင်းငမ်းၵူၼ်းမိူင်းၼၼ်ႉလႄႈသင်၊ (ပြည်သူ့လုံခြုံရေးနဲ့ကာကွယ်ရေးအဖွဲ့) ၸုမ်းၵႅတ်ႇၶႄႁႄႉၵင်ႈၵူၼ်းမိူင်းၼၼ်ႉ လႄႈသင် ၸုမ်းၸိူဝ်းၼၼ်ႉ ၶဝ်ႁဵတ်းၸွမ်းလၵ်းၸဵင်ဢၼ်လႂ် ႁဵတ်းၸွမ်းမၢႆမီႈၸိူင်ႉၼင်ႇႁိုဝ် ပိူင်မၼ်း ယႂ်ႇၵႃႈႁိုဝ်၊  ၵႂၢင်ႈ ၵႃႈႁိုဝ် ၸိူဝ်းၼႆႉ ယူႇတီႈ ပေႃႈမႄႈၵူၼ်းမိူင်းဢမ်ႇလႆႈႁူႉလူင်ႉလႅင်းၸွမ်း။

ၸင်ႇဝႃႈ CRPH ႁဵတ်းၵၢၼ်ၼႆႉ ပေႃးၵဵဝ်ႇလူၺ်ႈသွင်လွင်ႈၼႆႉမႃး မၼ်းဢမ်ႇမီးလွင်ႈ ပိုတ်ႇၽုၺ် ဢမ်ႇမီးလွင်ႈပိုတ်ႇပၢင်ႇ ၸႅင်ႈလႅင်း ယဝ်ႉၵေႃႈ ဢမ်ႇမီးလွင်ႈၼပ်ႉယမ် ႁဵတ်းၸွမ်း လၵ်းၶိုင်မိူင်းႁူမ်ႈတုမ်။

လိူဝ်ၼႆႉသမ်ႉ ဢမ်ႇဝႆႉၼၵ်းပၵ်းၸႂ်တေႃႇလွင်ႈၽွတ်ႇလိူတ်ႈ ၼႂ်းၸၢဝ်းၶိူဝ်း ၼင်ႇၵၼ်ၼၼ်ႉ ႁဝ်းၶႃႈ တေမႃး ထတ်းသၢင် လႆႈ 3 ၶေႃႈၼႆႉ။

ၵူၺ်းၵႃႈ ၾၢႆႇၼိုင်ႈတၢင်းၼိုင်ႈၵေႃႈ ႁဝ်းၶႃႈ တေလႆႈဝူၼ်ႉဝႃႈ ၸုမ်းၸၢဝ်းၶိူဝ်း ၸိူဝ်းဢၼ်ယူႇၸွမ်းပီႈၼွင်ႉတႆးမႃးလႄႈ ပဵၼ်ၵူၼ်းမိူင်းတႆးယူႇ ၸိူဝ်းၼၼ်ႉၵေႃႈ ပႅၵ်ႉသမ်ႉဝႃႈ ၸိူဝ်းႁၵ်ႉသႃပုၼ်ႈၽွၼ်း ၾၢႆႇတိုၵ်းတေႃး မိူၼ်ၸိူင်ႉၼင်ႇ ၸုမ်း TNLA ႁိုဝ် ၸိူဝ်းတင်ႈပဵၼ်တပ်ႉဝႆႉၼၼ်ႉလႄႈသင် ပႃႇတီႇၶဝ်ၼၼ်ႉလႄႈ ဢမ်ႇႁူႉၸွမ်း ဝႃႈၼၼ်သေတႃႉၵေႃႈ။ ၾၢႆႇ ၼိုင်ႈတၢင်းၼိုင်ႈ မီးၵူၼ်းဢၼ်ႁဵတ်းယူႇၸိူဝ်းၼၼ်ႉၼႆႉ ယူဝ်ၶႄးမၼ်းပဵၼ် လွင်ႈယုၵ်ႉတင်ႈ တူၺ်းၼမ်ႉလိုၵ်ႉၶွင်တႆး ႁဝ်းၼၼ်ႉၵူၺ်းႁိုဝ်။

ပေႃးႁဝ်းႁဵတ်းသၢင်ႈၵႂႃႇၸိူင်ႉၼင်ႇၼႆ ယူႇတီႈပေႃႈမႄႈပီႈၼွင်ႉၵူၼ်းမိူင်းတႆး ယူႇတီႈၸၢဝ်းၶိူဝ်းတႆးၶဝ်သမ်ႉ တေပိၼ်ႇ ပၢႆႇတုမ်ႉတွပ်ႇမႃးၸိူင်ႉၼင်ႇႁိုဝ် ဢၼ်ဝႃႈၼၼ်ႉ မႃးတေႃႇလွင်းၵၼ်တူၺ်းၵေႃႈ တေၸၢင်ႈပဵၼ်လႆႈ။

လွင်ႈဢၼ်ၶဝ်ၶွတ်ႇၽွတ်ႈၸုမ်းဢၼ်ၼႆႉ ဢၼ်ၼၼ်ႉသေ ပိုၼ်ၽၢဝ်ႇဝႃႈလၢႆၸႄႈဝဵင်းၸိူင်ႉၼႆႉ ပႃးၼႂ်းၼႃႈတီႈႁဝ်းဢၼ် ၼၼ်ႉ ဢၼ်ၼႆႉဢိူဝ်ႈ ဢၼ်ဝႃႈၸိူင်ႉၼၼ်ႉၼႆႉ ယူႇတီႈပီႈၼွင်ႉၶၢင်ႁဵတ်းၵေႃႈလီ၊ ယူႇတီႈပီႈၼွင်ႉလွႆ ႁဵတ်းၵေႃႈလီ၊ ဢမ်ႇ ၸႂ်ႈဝႃႈ မၼ်းတေမီးၽွၼ်းလီမႃး ၼႂ်းၶၢဝ်းတၢင်းဝၼ်းသွင်ဝၼ်း ပီသွင်ပီ ဝႃႈၼႆသေတႃႉၵေႃႈ ပေႃးတင်းၼပ်ႉဝႃႈ ပဵၼ် ၽႅၼ်ၵၢၼ်လူင်ႈၼႃႈ ႁၢင်ႈႁႅၼ်း ပိူဝ်ႈတႃႇ ၶၢဝ်းၼႃႈ သၢဝ်းပီ သၢမ်သိပ်းပီၼႆၵေႃႈ သမ်ႉၸၢင်ႈပဵၼ်မႃးလႆႈ။

မိူၼ်တင်းဝႃႈ ပေႃးထႅင်ႈသၢဝ်းပီ သၢမ်သိပ်းပီမႃး မိူဝ်ႈၼၼ်ႉ မိူဝ်ႈၼႆႉ ၸုမ်းႁဝ်းဢၼ်ၼႆႉလႄႈ ဢၼ်ၼၼ်ႉ ၸုမ်း CRPH ၶဝ် ဢၼ်ယၢမ်ႈပဵၼ်လူင်ပွင်ၸိုင်ႈ ၸူဝ်ႈၶၢဝ်းမႃးၼၼ်ႉ မီးလွင်ႈတူၵ်းလူင်းၵၼ်မႃးၸိူင်ႉၼင်ႇၼႆဢိူဝ်ႈၼႆ။ တေဢမ်ႇဝႆႉ ၶိုၼ်းၵေႃႈ ၸၢင်ႈပဵၼ်လႆႈ။

ၵွပ်ႈပိူဝ်ႈၸိူင်ႉၼႆလႄႈ ယူႇတီႈႁဝ်းၶႃႈ ၸုမ်းသိုၵ်းၵေႃႈလီ၊ ၸုမ်းပႃႇတီႇပၢႆးမိူင်းၵေႃႈယဝ်ႉ၊ ၸုမ်းတူင်ႇဝူင်းၵူၼ်း၊ ၸုမ်းၵူၼ်း ၼုမ်ႇ၊ ၸုမ်းၼၢင်းယိင်း တင်းမူတ်းတင်းသဵင်ႈၼႆႉ ၶဝ်တေလႆႈမိုၼ်းတႃႇ ပိုတ်ႇႁူ ႁႂ်ႈလႆႈႁူႉႁၼ်ၸွမ်း ၵူႈလွင်ႈၵူႈလၢႆး ၵူႈ ၸွၵ်ႉၵူႈၸဵင်ႇ ၵူႈတူၼ်ၵူႈပႃးသေယဝ်ႉ  ႁႃလၢႆးတၢင်းပိူဝ်ႈတႃႇတေႁူမ်ႈၵၼ်ၵႅတ်ႇၶႄတႃႇတေႁႄႉၵင်ႈလႆႈ ႁူမ်ႈၵၼ်ယုၵ်ႉ တိုၼ်ႇပိူဝ်ႈတႃႇ ၶိုၼ်ႈၼႃႈ ႁဝ်းၸင်ႇတေလႆႈတေႃႇသူႈပိူၼ်ႈလႆႈၼႂ်းၶၢဝ်းယၢမ်း ၼႂ်းငဝ်းလၢႆးၵၢၼ်မိူင်းသုၵ်ႉယုင်ႈ လူင်ၼႆႉ ယဝ်ႉ ဢၼ်ဝႃႈၼၼ်ႉ ယွၼ်းပိုတ်ႇပၢၵ်ႈ ၶၢႆးၼႄ ပၢႆးၼႄတၢင်းႁၼ်ပွတ်းဢွၼ်ႇတွၼ်ႈၼိုင်ႈသေ ႁႂ်ႈၶွတ်ႇယွတ်ႈပၢႆၵႂၢမ်းတီႈ ၼႆႈၶႃႈ။

မႂ်ႇသုင်ၶႃႈ

ႁိုၼ်း ၵႃယၢင်း

19/6/2021