ၼႂ်းၸိုင်ႈတႆး ပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ လၢႆလၢႆတီႈ ၸတ်းႁဵတ်းပွႆးၶိုၼ်ႈထၢတ်ႈ လွင်းသွမ်းသင်ၶၸဝ်ႈ ၼႂ်းဝၼ်းလိူၼ်သီႇမူၼ်း ဝႃႈၼႆ။
ဝၼ်းတီႈ 01/03/2018 ယၢမ်းၵၢင်ၼႂ် 8:30 – 10:30 မူင်း ၵူၼ်းမိူင်း ၸႄႈဝဵင်းၵဵင်းတုင် ၼပ်ႉႁူဝ်မိုၼ်ႇ ႁူမ်ႈၵၼ် လူႇတၢၼ်းလွင်းသွမ်းသင်ၶၸဝ်ႈ တီႈထၢတ်ႈၸွမ်သီရီ ဢိူင်ႇယၢင်းလေႃး ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။ တင်းမူတ်းသင်ၶၸဝ်ႈ ၶဝ်ႈႁူမ်ႈတုင်းသွမ်း 750 တူၼ်ပၢႆ။ ၼၢႆးၶၢဝ် 50 တူၼ်ပၢႆ ဝႃႈၼႆ။
ၸဝ်ႈၶူးၵုလိသ ၽူႈၶဝ်ႈႁူမ်ႈတုင်းသွမ်းၸဝ်ႈၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ သင်ၶၸဝ်ႈ ၼၢႆးၶၢဝ် မႃးႁပ်ႉ တုင်းသွမ်း တင်းမူတ်း တေမီး 838 တူၼ်/ ၵေႃႉ။ သင်ၶၸဝ်ႈ ၼႂ်းၸႄႈဝဵင်းၵဵင်းတုင် မွၵ်ႇပၢင်းမူတ်းမူတ်း ဢမ်ႇဝႃႈ သင်ၶတင်းၾၢႆႇတႆး၊ ၾၢႆႇမိူင်း၊ ၾၢႆႇၸၢဝ်းၶိူဝ်း၊ ၾၢႆႇမၢၼ်ႈလႄႈ ၼၢႆးၶၢဝ်။ လိူဝ်ၼၼ်ႉ ၵူၼ်းမိူင်းၵဵင်းတုင် ၵေႃႈၶဝ်ႈႁူမ်ႈလူႇတၢၼ်းတင်းၼမ်လၢႆ။ တေလႆႈဝႃႈ ပဵၼ်ဢၼ်ၶႅမ်ႉလႅပ်ႈလီငၢမ်းၵႂႃႇယဝ်ႉ” ဝႃႈၼႆ။
ပၢင်ပွႆးလွင်းသွမ်း တီႈထၢတ်ႈၸွမ်သီရီ ၸႄႈဝဵင်းၵဵင်းတုင်ၼႆႉ ၸတ်းႁဵတ်းမႃး ၶွပ်ႈၶူပ်ႇပီလႂ်ၼိုင်ႈပွၵ်ႈ ဝႃႈၼႆ။
ၼွၵ်ႈလိူဝ်ၼၼ်ႉ ထၢတ်ႈတီႈဢၼ်ၸိုဝ်ႈသဵင်လိုဝ်းလင် ဢၼ်ၵိုၵ်းပိုၼ်းၼႂ်းမိူင်းတႆး မိူၼ် ထၢတ်ႈမူၺ်ႇတေႃႇႁူဝ်လိုင်း၊ မူၺ်ႇတေႃႇမိူင်းၵိုင်၊ ပင်းတရႃႉ ဢိၵ်ႇထႅင်ႈလၢႆလၢႆတီႈၵေႃႈ ၸတ်းႁဵတ်းပွႆးၶိုၼ်ႈထၢတ်ႈလႄႈ ပၢင်လွင်းသွမ်းသင်ၶၸဝ်ႈ မိူၼ်ၵၼ် -ၼႆယဝ်ႉ။
လႅင်ႇၶၢဝ်ႇ လႅတ်ႇၼုမ်ႇ မင်းရၢႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ