ၵူၼ်းၼုမ်ႇတႆး ဝဵင်းလႃႈသဵဝ်ႈ ဢဵၼ်ႁႅင်း 70 ပၢႆ ႁူမ်ႈၵၼ်ၵႂႃႇလုမ်းလႃး တူၼ်ႈမွၵ်ႇၵွၼ် ဢၼ်ၽုၵ်ႇဝႆႉ မိူဝ်ႈပူၼ်ႉမႃးၸိူဝ်းၼၼ်ႉ ။ ၼင်ႇႁိုဝ် တေပဵၼ်တီႈမၢႆတွင်း ဝၼ်းၵူၼ်းၼုမ်ႇတႆး (Tai Youth Day) ဝႃႈၼႆ။
လိူၼ်မၢတ်ႊၶျ် ဝၼ်းတီႈ 1 ပဵၼ်ဝၼ်းၵူၼ်းၼုမ်ႇတႆး (Tai Youth Day) ၸွမ်းၼင်ႇၶေႃႈတႅပ်းတတ်းတီႈ ပၢင်ၵုမ်ၶွၼ်ႊၾရႅၼ်ႊၵူၼ်းၼုမ်ႇတႆး ။ ဝၼ်းတီႈ 01/03/2018 ယၢမ်းၵၢင်ၼႂ် 9 မူင်း ၵူၼ်းၼုမ်ႇတႆး ၸႄႈဝဵင်း လႃႈသဵဝ်ႈ ႁူမ်ႈၵၼ်ၵႂႃႇလုမ်းလႃး တူၼ်ႈမွၵ်ႇၵွၼ် ဢၼ်လႆႈၽုၵ်ႇသွမ်ႈဝႆႉ မိူဝ်ႈပူၼ်ႉမႃးၸိူဝ်းၼၼ်ႉ ။ မိူၼ်ၼင်ႇ တင်းထုင်ႉ မိူင်းယေႃ၊ တႃႈယၢဝ်၊ ဝၢၼ်ႈၵုင်းသႃႇ၊ တႃႈပုင်ႇလႄႈ ဝတ်ႉမၢၼ်ႈသူႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸိူဝ်းၼႆႉ။
ၸၢႆးႁၢၼ် ၽူႈဢွၼ်ႁူဝ်ၵူၼ်းၼုမ်ႇ ၸႄႈဝဵင်းလႃႈသဵဝ်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈၼႆႉ ပဵၼ်ဝၼ်း ၵူၼ်းၼုမ်ႇတႆး ယူႇတီႈၵူၼ်းၼုမ်ႇတႆးႁဝ်းဝဵင်းလႃႈသဵဝ်ႈ ဢဵၼ်ႁႅင်း 70 ပၢႆ ၵႂႃႇလုမ်းလႃး တူၼ်ႈမွၵ်ႇၵွၼ် ဢၼ် ၸုမ်းၸဵင်ၼုမ်ႇၶဝ် ၽုၵ်ႇဝႆႉၸိူဝ်းၼၼ်ႉ။ ၵႂႃႇမႄးထူမ်ငဝ်ႈမၼ်း၊ မႄးတီႇၽဵဝ်ႈ ဢၼ်ႁူၵ်ႉႁၢမ်းမၼ်း၊ မႄးလွမ်ႉႁူဝ်ႉမၼ်း ၸဵမ်ၸိူဝ်းၼႆႉ။ ထႅင်ႈပိူင်ၼိုင်ႈ ႁႂ်ႈလႆႈပဵၼ်လွင်ႈတူင်ႉၼိုင်ၵူၼ်းၼုမ်ႇတႆးႁဝ်းၵေႃႈပႃးသေ ႁႂ်ႈလႆႈမိုတ်ႈၵိုဝ်းၵၼ်မႃး လိူဝ်ၵဝ်ႇ၊ ႁႂ်ႈလႆႈတူင်ႉၼိုင် ၼႂ်းတူင်ႇဝူင်းၵူၼ်းမႃးလိူဝ်ၵဝ်ႇသေဢမ်ႇၵႃး ႁႂ်ႈမီးလွင်ႈၽွမ်ႉႁူမ်ႈ မေႃၸွႆႈထႅမ်ၵၼ်” ဝႃႈၼႆ။
ၼွၵ်ႈလိူဝ်ၼၼ်ႉ ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network (TYN) ၵေႃႈ ဢွၼ်ႁူဝ်ၼမ်းၼႃႈ ၵူၼ်းၼုမ်ႇ ၼႂ်းပိုၼ်ႉတီႈ လၢႆလၢႆၸႄႈဝဵင်း မိူၼ်ၼင်ႇ သီႇပေႃႉ၊ ၵျွၵ်ႉမႄး၊ ၼမ်ႉလၼ်ႈ၊ သႅၼ်ဝီလႄႈ လႃႈသဵဝ်ႈ ႁူမ်ႈၵၼ်သေ ၵႂႃႇလုမ်းလႃးတီႇၽဵဝ်ႈ သၢင်းၶႅင်း ၶုမ်ၵုတ်းၻွၵ်ႊတိူဝ်ႊ လုင်းပႃႉၺၢၼ်ႇတင်း ၶုမ်ၸဝ်ႈၾႃႉ ၼၢင်းၾႃႉလႄႈလုၵ်ႈလၢၼ်တီႈပွၵ်ႉ သၶၢၼ်းသႃႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
လိူဝ်ၼၼ်ႉ ၼႂ်းဝၼ်းလဵဝ်ၵၼ် ၵူၼ်းၼုမ်ႇၼႂ်းၸုမ်းၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network တီႈဝၢၼ်ႈႁူၺ်ႈ ၸႄႈဝဵင်းလွၵ်ႉၸွၵ်ႇၵေႃႈ ဢွၼ်ၵၼ်ၸတ်းႁဵတ်း ပၢင်ဢုပ်ႇၶႆႈ ပိုၼ်ႉႁူႉပၢႆးႁၼ် တႃႇပဵၼ်တီႈမၢႆတွင်း ဝၼ်းၵူၼ်းၼုမ်ႇတႆး ဝႃႈၼႆ။
ဝၼ်းၵိူတ်ႇ ၻွၵ်ႊတိူဝ်ႊ လုင်းပႃႉၺၢၼ်ႇ ဝၼ်းတီႈ 1 လိူၼ်မၢတ်ႊၶျ်ၼႆႉ ပဵၼ်လၵ်းသေ ၵူၼ်းၼုမ်ႇတႆး ၼႂ်းမိူင်းတႆးလႄႈ မိူင်းႁူမ်ႈတုမ်ပတ်းပိုၼ်ႉ ဢုပ်ႇၵုမ်ၵၼ်တႅပ်းတတ်းမၵ်းမၼ်ႈႁူမ်ႈၵၼ်လႆႈၸႂ်ဝႃႈ ဝၼ်းတီႈ 1 လိူၼ်မၢတ်ႊၶျ်ၼႆႉပဵၼ် Tai Youth Day ဝၼ်းၵူၼ်းၼုမ်ႇတႆး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ