သိုၵ်းပျီႇတူႉၸိတ်ႉမၢၼ်ႈပၢင်ႇ ႁွင်ႉၽူႈၵွၼ်းပွၵ်ႉ 6 ၼႂ်းၸႄႈဝဵင်းတၢင်ႉယၢၼ်း ႁဵတ်းပၢင်ၵုမ်သေ ၸီႉသင်ႇႁႂ်ႈၵဵပ်း ပၼ်ၵူၼ်း မႂ်ႇတႃႇ 14 ၵေႃႉ ဝႃႈၼႆ။
မိူဝ်ႈဝၼ်းတီႈ 11/6/2021 ပူၼ်ႉမႃးၼႆႉ ယူႇတီႈၸုမ်းပျီႇတူႉၸိတ်ႉမၢၼ်ႈပၢင်ႇ ႁွင်ႉၽူႈၵွၼ်းပွၵ်ႉ ၼႂ်းပွၵ်ႉ 6 ၸႄႈဝဵင်းတၢင်ႉ ယၢၼ်း ၸိုင်ႈတႆးပွတ်းႁွင်ႇ ၸတ်းႁဵတ်းပၢင်ၵုမ်သေ ၸီႉသင်ႇႁႂ်ႈၵဵပ်းပၼ်ၵူၼ်းမႂ်ႇ တႃႇ 14 ၵေႃႉ ႁႂ်ႈမိူဝ်းၽိုၵ်းသိုၵ်း ၼႆယဝ်ႉ။
ၵူၼ်းပိုၼ်ႉတီႈ တၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈပွၵ်ႉ 6 ၶႃႈဢေႃႈ တူဝ်ၵူၼ်းတႄႉ ၽူႈၵွၼ်း ပွၵ်ႉ ဝႃႈဢမ်ႇသူင်ႇၼႆၶႃႈ မၼ်းတေဢဝ်ငိုၼ်းပၼ်ၵူၺ်းၼႆဢေႃႈ။ ၼႂ်းပွၵ်ႉ 6 ၶႃႈၶဝ်ၼႆႉ တေတူၵ်း 14 ၵေႃႉၶႃႈ။ ပိူၼ်ႈတႄႉ ၼိုင်ႈၵေႃႉၵႃႈႁိုဝ်ၼႆ ပိူၼ်ႈဢမ်ႇဝႃႈၼႄၶႃႈ။ မၼ်းယူႇတီႈၽူႈၵွၼ်းပွၵ်ႉႁဝ်းၶႃႈၼႆႉသေ ၵႂႃႇမၵ်းမၼ်ႈႁင်းၵူၺ်းမၼ်း ၵူၺ်း ၶႃႈ ၼိုင်ႈၵေႃႈ 20 သႅၼ်ၼႆႉ။ ၵမ်းၼႆႉ မႃးၵဵပ်းတီႈၵူၼ်းဝၢၼ်ႈ ၼိုင်ႈႁိူၼ်း 5 မိုၼ်ႇၶႃႈဢေႃႈ ၵူၼ်းဝၢၼ်ႈတႄႉ ၶၢင်းၵၼ်ၶႃႈ ဢေႃႈ။ ၽူႈၵွၼ်းပွၵ်ႉၵႂႃႇဢုပ်ႇတၢင်းၸုမ်းၼၼ်ႉမႃးသေ မႃးလၢတ်ႈပူႇၵေႇ ၸႂ်ႉပူႇၵေႇလူင်းၵဵပ်းငိုၼ်း ၵမ်းသိုဝ်ႈ ၸိူင်ႉၼႆ ၶႃႈဢေႃႈၼႆႉ လွင်ႈၼႆႉ ၵူၼ်းဝၢၼ်ႈတႄႉ ဢမ်ႇမီးသုၼ်ႇလႆႈဢုပ်ႇၸွမ်းသင် ငိၼ်းဝႃႈၼႆၶႃႈဢေႃႈ”- ဝႃႈၼႆ။
ၼႂ်းပွၵ်ႉ 6 ၼႆႉ မီးပူႇၵေႇပၢၵ်ႇႁိူၼ်း 12 ၵေႃႉ။ ၼိုင်ႈယွမ်ႇၼႆႉ တေလႆႈသူင်ႇၵူၼ်းမႂ်ႇ 1 ၵေႃႉ တီႈဝၢၼ်ႈလွႆလႄႈ ဝဵင်းလဝ်း တႄႉ လႆႈသူင်ႇပၼ် ၼိုင်ႈဝၼ်းလႂ် 2 ၵေႃႉ ဝႃႈၼႆ။ ၾၢႆႇၸုမ်းပျီႇတူႉၸိတ်ႉလၢတ်ႈဝႃႈ တေဢဝ်မိူဝ်းၾိုၵ်းၵၢၼ်သိုၵ်းသေယဝ်ႉ တေသူင်ႇမႃးဢဝ်ႁူမ်ႇလူမ်ႈ ၼႂ်းပွၵ်ႉယွမ်ႇၸဝ်ႈ ၵဝ်ႇ ၶိုၼ်းဝႃႈၼႆ။
ၽူႈၵွၼ်းပွၵ်ႉ 6 ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လွင်ႈတၢင်းမၼ်းတႄႉ တႃႇတေၶိုၼ်းႁဵတ်း ၾၢႆႇႁူမ်ႇလူမ်ႈပၼ် တီႈၼႂ်းပွၵ်ႉၶိုၼ်းၵူၺ်း။ ယွၼ်ႉဝႃႈတီႈၼႂ်းပွၵ်ႉ 6 ၼႆႉ ပႃးၼႂ်းမၢၼ်ႈပၢင်ႇလႄႈ သင်ဝႃႈ ၶဝ်ႁွင်ႉၵႂႃႇ ၼႂ်း ပွၵ်ႉ 6 ၵေႃႈ ၶဝ်တေၶိုၼ်းႁႂ်ႈမႃးဢဝ်ႁူမ်ႇလူမ်ႈၼႂ်းပွၵ်ႉ ၶိုၼ်းၵူၺ်းၶႃႈ ဢမ်ႇႁွင်ႇၵႂႃႇတၢင်ႇတီႈ။ ၼႂ်းပွၵ်ႉ 6 ၼႆႉသမ်ႉ မီး ဢွၼ်ႇၸၢႆး ဢၼ်ဢမ်ႇထွမ်ႇၵႂၢမ်းပေႃႈမႄႈ ဢၼ်ပဵၼ်ၶီႈယႃႈၽူႈလၵ်ႉၵူၼ်းၸူၼ်ၵေႃႈမီးလႄႈ ၶဝ်ၵေႃႈၶႂ်ႈႁႂ်ႈ ပျီႇတူႉၸိတ်ႉ ၶဝ်ၶိုၼ်းထိင်းပၼ်ၸိူင်ႉၼၼ်ၵူၺ်း။ လွင်ႈၼႆႉ သင်ဝႃႈ ၵူၼ်းမိူင်း ၽွမ်ႉၸႂ်ၼႆၸိုင် သူင်ႇမႃးၽိုၵ်းသိုၵ်းသေ ၶိုၼ်းမိူဝ်းႁဵတ်း ပၼ်ၾၢႆႇႁူမ်ႇလူမ်ႈ တီႈၼႂ်းပွၵ်ႉၶိုၼ်းၵေႃႈလႆႈ သင်ဝႃႈ ဢမ်ႇၶႂ်ႈပွႆႇမႃးၵေႃႈ ဢမ်ႇပဵၼ်သင် ယူႇတီႈၵူၼ်းမိူင်းၵူၺ်း ဢဝ်ၵၢင် ၸႂ်ၵူၼ်းမိူင်းတႅပ်းတတ်း”- ဝႃႈၼႆ။
ၵဵဝ်ၵပ်းလွင်ႈ ၸုမ်းပျီႇတူႉၸိတ်ႉမၢၼ်ႈပၢင် မႃးလၢတ်ႈၽူႈၵွၼ်းပွၵ်ႉ ႁႂ်ႈသူင်ႇပၼ်ၵူၼ်း သင်ဝႃႈဢမ်ႇသူင်ႇၵူၼ်းလႆႈႁႂ်ႈဢဝ် ငိုၼ်းသူင်ႇပၼ် ၼိုင်ႈၵေႃႉလႂ် 20 သႅၼ် ဢၼ်ဝႃႈၼၼ်ႉ ၼႂ်းဝၼ်းတီႈ 15/6/2021 မိူဝ်ႈၼႆႉ ႁႂ်ႈပဵၼ်ဝၼ်းလိုၼ်းသုတ်း ဝႃႈ ၼႆ။
ၸုမ်းပျီႇတူႉၸိတ်ႉမၢၼ်ႈပၢင်ႇၼႆႉ ပဵၼ်ပူဝ်ႇမူၼ်း ဢွၼ်ႁူဝ်ဝႆႉ မိူဝ်ႈပၢင်လိူၵ်ႈတင်ႈ 2020 ၼၼ်ႉပူဝ်ႇမူၼ်း ယူႇၼႂ်းပႃႇတီႇ သၢင်ႇသီႈသေ ၶဝ်ႈၶေႉၶဵင်ႇပၢင်လိူၵ်ႈတင်ႈ တီႈၼင်ႉသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 သေဢွင်ႇပေႉဝႆႉ ဝႃႈၼႆ။
တီႈတၢင်ႉယၢၼ်းၼႆႉ ၸုမ်းသိုၵ်း SSPP ၊ ၸုမ်းသိုၵ်းလွႆ TNLA ၊ ၸုမ်းသိုၵ်းၵဝ်ႈၵၢင်ႉ MNDAA လႄႈ ၸုမ်းသိုၵ်းပျီႇတူႉ ၸိတ်ႉမၢၼ်ႈပၢင်ႇ ၸိူဝ်းၼႆႉ တူင်ႉၼိုင်ယူႇသဝ်းဝႆႉ။
