ၵူၼ်းပၢႆႈၽေးသိုၵ်း ၼမ်ႉတူႈ ဢၼ်ပၢႆႈမႃးသွၼ်ႈဝႆႉတီႈ သီႇပေႃႉၶၢဝ်းတၢင်း သွင်လိူၼ်ပၢႆၼႆႉ ၶိုၼ်းဢွၼ်ၵၼ်ပွၵ်ႈမိူဝ်း ၶိုၼ်းႁိူၼ်းယေး ၽႂ်မၼ်း ႁူဝ်ၵူၼ်း 250 ပၢႆ ဝႃႈၼႆ။
ဝၼ်းတီႈ 2/6/2021 ၵူၼ်းမၢၼ်ႈလီႈ၊ ပၢင်လူင် လႄႈ တႃႈၽႃလၢႆး ဢၼ်ပၢႆႈ မႃးသွၼ်ႈဝႆႉတီႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၶိုၼ်းဢွၼ်ၵၼ်ပွၵ်ႈႁိူၼ်းၽႂ်မၼ်းၶိုၼ်းယဝ်ႉ ယွၼ်ႉၼႂ်းပိုၼ်ႉတီႈ ၼိမ်ယဵၼ်မႃးၽွင်ႈ ဝႃႈၼႆ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမၢၼ်ႈလီႈႁဝ်းၶႃႈ လင်ႁိူၼ်း 44 လင် ဢၼ်ၺႃးၾႆးမႆႈၵႂႃႇတႄႉ ပႆႇပွၵ်ႈၶိုၼ်းၶႃႈ။ ပွၵ်ႈမိူဝ်းၵေႃႈ ပႆႇမီးတီႈယူႇလႄႈ ယၢမ်းလဵဝ်တႄႉ တိုၵ်ႉသိုပ်ႇယူႇဝႆႉတီႈသီႇ ပေႃႉယူႇၶႃႈ။ ပၢင်တိုၵ်း ဢမ်ႇပဵၼ်ထႅင်ႈဢၼ်ဝႃႈၼၼ်ႉတႄႉ ၵေႃႈဢမ်ႇၸၢင်ႈဝႃႈလႆႈၶႃႈ။ ယၢမ်းလဵဝ် ယွၼ်ႉဝႃႈ ၼိမ်ယဵၼ် ဝႆႉလႄႈ ဢွၼ်ၵၼ်ပွၵ်ႈမိူဝ်းၵၼ်ၵမ်ႈၽွင်ႈယဝ်ႉ”- ဝႃႈၼႆ။
မိူဝ်ႈဝၼ်းတီႈ 2/5/2021 ၾႆးမႆႈ ႁိူၼ်းယေး ၵူၼ်းဝၢၼ်ႈ မၢၼ်ႈလီႈ 44 လင်ၶႃးႁိူၼ်း ။ တေႃႇထိုင် ယၢမ်းလဵဝ် ၵူၼ်းမၢၼ်ႈလီႈ ၼၼ်ႉတႄႉပႆႇၸၢင်ႈပွၵ်ႈႁိူၼ်းယေး တိုၵ်ႉသိုပ်ႇယူႇဝႆႉတီႈ သီႇပေႃႉ ၼႆယဝ်ႉ။
“ၵူၼ်းပၢႆႈၽေး ဢၼ်ပွၵ်ႈမိူဝ်းၼႆႉ မွင်းပိုၼ်ႉတီႈယဵၼ်ၵူၺ်း ၼႅတ်ႈဢွၼ်ၵၼ်မိူဝ်းၵႂႃႇၶႃႈဢေႃႈ။ မႆႈၸႂ်လွင်ႈၽုၵ်ႇ သွမ်ႈၶဝ်ၶႃႈဢေႃႈ။ ၵူဝ်ပီၼႃႈမႃး ဢမ်ႇမီးသင်ၵိၼ်ၼၼ်ႉၶႃႈၼႃႇ။ ယွၼ်ႉပဵၼ်ၶၢဝ်းၽုၵ်ႇသွမ်ႈၵေႃႈပိူင်ႈၼိုင်ႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈၼႄၼင်ႇၼႆ။
ယၢမ်းလဵဝ် ပၢင်တိုၵ်း ၼႂ်းပိုၼ်ႉတီႈ ၼိမ်ယဵၼ်ယဝ်ႉ ဝႃႈၼႆသေတႃႉ ငဝ်းလၢႆးပၢင်တိုၵ်းသမ်ႉၸၢင်ႈပဵၼ်ၶိုၼ်းလႆႈ ၵူႈၶၢဝ်းလႄႈ ၵူၼ်းပၢႆႈၽေးသိုၵ်း တီႈၼမ်ႉတူႈ ဢၼ်ပၢႆႈသွၼ်ႈဝႆႉတီႈလႃႈသဵဝ်ႈ ႁူဝ်ၵူၼ်း 70 ပၢႆ ၼၼ်ႉ ပႆႇႁတ်းပွၵ်ႈႁိူၼ်း။ ပႂ်ႉတူၺ်းငဝ်းလၢႆးထႅင်ႈဢိတ်းၼိုင်ႈ ၼႆယဝ်ႉ။
“ယၢမ်းလဵဝ်တႄႉ ပၢင်တိုၵ်းယဵၼ်ယဝ်ႉ ဝႃႈၼႆသေတႃႉ ႁဝ်းၶႃႈ ပႆႇႁတ်းပွၵ်ႈၶႃႈ။ ပႂ်ႉတူၺ်းငဝ်း လၢႆးမၼ်းထႅင်ႈ ဢိတ်းၼိုင်ႈၵွၼ်ႇ။ ယွၼ်ႉဝႃႈ ၼႂ်းဝၢၼ်ႈတိုၵ်ႉမီးသိုၵ်းတပ်ႉပွင်းၸူႉယူႇသဝ်းဝႆႉယူႇလႄႈ ဢမ်ႇႁူႉဝႃႈ သဵင်ၵွင်ႈ တေတႅၵ်ႇၶိုၼ်း မိူဝ်ႈလႂ်ထႅင်ႈ”- ၵူၼ်းပၢႆႈၽေးသိုၵ်း ႁွတ်ႈၽႅဝ်တီႈလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် တီႈၸႄႈဝဵင်းသီႇပေႃႉၼႆ ၵူၼ်းပၢႆႈၽေးသိုၵ်း တိုၵ်ႉၵိုတ်းဝႆႉထႅင်ႈ မွၵ်ႈ 3 ႁဵင်ပၢႆ ဝႃႈၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ယူႇတီႈ သိုၵ်း RCSS တင်း TNLA,SSPP ပဵၼ်ပၢင် တိုၵ်းၵၼ်မႃး ၼႂ်းၸႄႈဝဵင်းၵျွၵ်ႉမႄး၊ ၼမ်ႉတူႈ၊ သီႇပေႃႉ ႁၢဝ်ႈႁႅင်း ၵူၼ်းမိူင်း ၼပ်ႉႁူဝ်ႁဵင်လႆႈပၢႆႈၽေးသိုၵ်း ၊ ယၢပ်ႇၽိုတ်ႇတႃႇယူႇသဝ်းၵိၼ်သၢင်ႈ။ တီႈမီးသိုၵ်းတူင်ႉၼိုင်ယူႇသဝ်းၼၼ်ႉၵူၼ်းမိူင်းၵေႃႈ ၺႃးပူၼ်ႉပႅၼ်သုၼ်ႇလႆႈ၊ ၺႃးတဵၵ်းတဵင်ၶႃႈႁႅမ်တၢႆ။ သင်ၶ၊ ၵူၼ်းမိူင်းလၢႆလၢႆၸႄႊဝဵင်းလႄႈ ၸုမ်းၸွႆႈထႅမ်တူင်ႇဝူင်းၵူၼ်း တုၵ်းယွၼ်းႁႂ်ႈသိုၵ်းၼႂ်းပိုၼ်ႉတီႈၵိုတ်းတိုၵ်းၵၼ်ယူႇသေတႃႉ တေႃႇထိုင်ဝၼ်းမိူဝ်ႈၼႆႉ ဢမ်ႇမီးလွင်ႈၵိုတ်းတိုၵ်းၵၼ်ၵူၺ်းဢမ်ႇၵႃး ပွတ်းထုင်ႉမၢဝ်းယင်းတိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်လႄႈတိုၵ်ႉမီးလွင်ႈတီႉၺွပ်းၵူၼ်းမိူင်းယူႇဢမ်ႇထၢတ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ