ၵူၼ်းဝၢၼ်ႈႁွင်ႇ ၸႄႈဝဵင်းတႃႈၶီႈလဵၵ်း ႁူမ်ႈၵၼ် ၵႂႃႇယႃႉပႅတ်ႈ ႁူဝ်ႉလဵၵ်း ၶွင်ၶွမ်ႊပၼီႊ ႁူင်ပင်း ဢၼ်မႃးလွမ်ႉႁူဝ်ႉ တဵၵ်းဢဝ်လၢႆ တီႈလိၼ်ၶွင်ၵူၼ်းမိူင်းဝႆႉၶၢဝ်းယၢမ်းၵၢင်ၶိုၼ်းလိုၵ်းၼၼ်ႉ ဝႃႈၼႆ။

 ဝၼ်းတီႈ 31/5/2021 ယၢမ်းၵၢင်ၼႂ် ၵူၼ်းဝၢၼ်ႈႁွင်ႇ ဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း ၽွမ်ႉႁူမ်ႈၵၼ်သေ ၵႂႃႇ ယႃႉထွၼ်ပႅတ်ႈသဝ်ႁူဝ်ႉလဵၵ်း ဢၼ်ၶွမ်ႊပၼီႊႁူင်ပင်း  မႃးလၵ်ႉလွမ်လွမ်ႉဝႆႉၽွင်းယၢမ်းၵၢင်ၶိုၼ်းလိုၵ်း ၶၢဝ်းဢၼ်သိုၵ်းမၢၼ်ႈပိုၼ်ၽၢဝ်ႇမၢႆမီႈသိုၵ်း ႁၢမ်ႈဢွၵ်ႇၼွၵ်ႈႁိူၼ်းၼၼ်ႉ။

တီႈလိၼ်ၼႆႉ ပဵၼ်ၶွင်ၵူၼ်းဝၢၼ်ႈႁွင်ႇ  ၽုၵ်ႇသွမ်ႈႁဵတ်းၵိၼ်ၼႂ်းမၼ်းမႃး ပီယၢဝ်းၶၢဝ်းႁိုင် ၸဵမ်ပၢၼ်ပူႇမွၼ်ႇၼၢႆးယႃႈပူၼ်ႉ။

ၵူၼ်းဝၢၼ်ႈႁွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ၼႂ် ႁဝ်းၶႃႈ ႁူမ်ႈၵၼ်သေ ၵႂႃႇယႃႉထွၼ်ပႅတ်ႈ သဝ်မၼ်းၶႃႈဢေႃႈ။ ၶွမ်ႊပၼီႊၼႆႉ ၶဝ်ၶႂ်ႈလႆႈၼႃႇယဝ်ႉတီႈလိၼ်ၼႆႉ။ မိူၼ်ဝႃႈၶဝ်တဵၵ်းလႆႈ တဵင်လႆႈၵေႃႈၶဝ်တေတဵၵ်းၼၼ်ႉ ၶႃႈၼႃႇ။ ပတ်းလၢႆးတိုဝ် လၢႆးၵျၢမ်း တေႃႇၵူၼ်းဝၢၼ်ႈၶႃႈလူင် ၶဝ်ၼႆႉ”- ဝႃႈၼႆ။

ဢၼ်ၵူၼ်းဝၢၼ်ႈႁွင်ႇထွၼ်ပႅတ်ႈႁူဝ်ႉၶွမ်ႊပၼီႊမႃးလၵ်ႉလွမ်ႉဢဝ်ၼႆႉ ဢမ်ႇၵႃးပွၵ်ႈၼႆႉၵူၺ်း။ ၵွၼ်ႇၼႃႈၼႆႉၵေႃႈ ၶွမ်ႊပၼီႊမႃးလၵ်ႉလွမ်ႉ ၵူၼ်းဝၢၼ်ႈမႃးထွၼ်ပႅတ်ႈၸိူင်ႉၼႆမႃးလၢႆလၢႆၵမ်းယဝ်ႉ။  မိူဝ်ႈဝၼ်းတီႈ 30/5/2021 ယၢမ်းၵၢင်ၶိုၼ်းလိုၵ်း တိုၵ်ႉမႃးလၵ်ႉလွမ်ႉ ထႅင်ႈၵမ်းၼိုင်ႈလႄႈ ၵူၼ်းဝၢၼ်ႈၸင်ႇဢွၼ်ၵၼ်ၵႂႃႇထွၼ်ပႅတ်ႈထႅင်ႈ။  

“ႁဝ်းၶႃႈၵေႃႈ ဢၢမ်းၶႃႈဢေႃႈ ႁႄႈဝႃႈ တီႈတႃႈၶီႈလဵၵ်းၼႆႉ ႁၢမ်ႈဢွၵ်ႇၵၢင်ၶမ်ႈ ၵၢင်ၶိုၼ်းဝႃႇ သိုၵ်းမၢၼ်ႈၶဝ်တဵင်မႃး။  ၶွမ်ႊပၼီႊၸိူဝ်းၼႆႉသမ်ႉမႃး လွမ်ႉႁူဝ်ႉဢဝ်ၼႆႉပဵၼ်ၶၢဝ်းယၢမ်းၵၢင်ၶမ်ႈၵၢင်ၶိုၼ်းၶႃႈလူင်။ သင်ႁဝ်းၶႃႈ ၵူၼ်းဝၢၼ်ႈၵႂႃႇယႃႉပႅတ်ႈႁူဝ်ၶဝ်ယၢမ်းၵၢင်ၶမ်ႈၵၢင်ၶိုၼ်းၼႆ ၶဝ်တေၸႂ်ႉႁႅင်းသိုၵ်းႁႅင်း ယေး မႃးတီႉႁဝ်းၶႃႈ၊ ၸွႆးတြႃးႁဝ်းၶႃႈ  ဢမ်ႇၸွမ်းမၢႆမီႈၼႆ ၵမ်းလဵဝ်ၶႃႈဢေႃႈ။ ၵွပ်ႈၼႆလႄႈ ၵူၼ်းဝၢၼ်ႈႁဝ်းၶႃႈ ၸင်ႇဢွၼ်ၵၼ်ယႃႉထွၼ်ပႅတ်ႈၵၢင်ဝၼ်းၶႃႈဢေႃႈ”- ၵူၼ်းဝၢၼ်ႈႁွင်ႇ သိုပ်ႇလၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 8/5/2021 ယၢမ်းၵၢင်ၶိုၼ်းၵေႃႈ  ၶွမ်ႊပၼီႊႁူင်ပင်း   မႃးလွမ်ႉႁူဝ်ႉ ဢဝ်တီႈလိၼ်ၵူၼ်းဝၢၼ်ႈႁွင်ႇ။ ထိုင်မႃး ဝၼ်းတီႈ 9/5/2021 ယၢမ်းၵၢင်ဝၼ်း ၵူၼ်းဝၢၼ်ႈလႄႈ ၸဝ်ႈၽူႈၵွၼ်းဝတ်ႉဝၢၼ်ႈႁွင်ႇ ဢွၼ်ၵၼ် မႃးယႃႉ ထွၼ်ႁူဝ်ႉပႅတ်ႈလႄႈ ယူႇတီႈၶွမ်ႊပၼီႊတင်း ၽူႈၵွၼ်းၸႄႈတွၼ်ႈတႃႈၶီႈလဵၵ်းႁူမ်ႈၵၼ်တၢင်ႇလိၵ်ႈဢဝ်လိူင်ႈၸဝ်ႈသြႃႇပၢၼ်းသူၺ်ႇ ၽူႈၵွၼ်း ဝတ်ႉ ။ သင်ၶၼႃယၵၸႄႈဝဵင်းႁွင်ႉၵႂႃႇဢုပ်ႇတီႈဝတ်ႉသၢႆမိူင်း ယဝ်ႉၵမ်းၼိုင်ႈ။

ၸဝ်ႈသြႃႇပၢၼ်းသူၺ်ႇ ၽူႈၵွၼ်းဝတ်ႉႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်း တီႈ 28 ၼၼ်ႉ ၶဝ်ႁွင်ႉႁဝ်းၸဝ်ႈၵႂႃႇတီႈ ဝတ်ႉသၢႆမိူင်းသေ ထၢမ်ႁဝ်းၸဝ်ႈ ၸွင်ႇလႆႈယႃႉ ႁူဝ်ႉၼၼ်ႉႁႃႉ ႁဝ်းၸဝ်ႈတွပ်ႇဝႃႈ လႆႈယႃႉဢိူဝ်ႈ ၸိူင်ႉၼၼ်ၸိူင်ႉၼႆ ၵမ်း ၼႆႉ ၶဝ်ၵေႃႈဝႃႈ တင်ႈဢဝ်ၼႆႉၵႂႃႇ ယႃႇႁႂ်ႈသင်ၶၵႂႃႇၵဵဝ်ႇၸွမ်း မၼ်းၽိတ်းဝိၼီးဢိူဝ်ႈ ၶဝ်ဝႃႈ မႃးၸိူင်ၼႆ၊ ၸွႆးတြႃးႁဝ်း ၸဝ်ႈတႄႉ ၶဝ်ဢမ်ႇၸွႆး”- ဝႃႈၼႆ။

  ဝၼ်းတီႈ 1/6/2021 ယူႇတီႈၵူၼ်းဝၢၼ်ႈႁွင်ႇ ႁူမ်ႈၵၼ်သေ  ၵႂႃႇလွမ်ႉႁူဝ်ႉဢဝ်ၶိုၼ်း တီႈလိၼ်သူၼ်ၽႂ်မၼ်းဝႆႉ ၼင်ႇႁိုဝ် ၶွမ်ႊပၼီႊ ပေႃးတေဢမ်ႇမႃးလွမ်ႉဢဝ်ထႅင်ႈ ၵူၼ်းဝၢၼ်ႈႁွင်ႇ သိုပ်ႇလၢတ်ႈၼႄၼင်ႇၼႆ။

မိူဝ်ႈပီ 1998-1999 မိူဝ်ႈပၢၼ်သိုၵ်းၽွင်းငမ်းဝၢၼ်ႈမိူင်းၼၼ်ႉ ၶဝ်ဢထမ်ႇမတဵၵ်းဢဝ်လၢႆတီႈလိၼ်ၵူၼ်းဝၢၼ်ႈ ၼႂ်းဢိူင်ႇ ႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်းၼႆႉ တႃႇ 100 ဢေႊၶိူဝ်ႊသေ ပၼ်ၶွမ်ႊပၼီႊႁူင်ပင်းၸႂ်ႉ   ဢဝ်ႁဵတ်းႁူင်းၸၢၵ်ႈ ထူင်ယၢင် တႃႇ 20 ဢေႊၶိူဝ်ႊ။ ၵမ်းၼႆႉ ၵိုတ်းထႅင်ႈ 80 ဢေႊၶိူဝ်ႊၼၼ်ႉ ၸဝ်ႈၶွင်သူၼ်ႁႆႈၼႃႈ ၶိုၼ်းၽုၵ်ႇသွမ်ႈၵိၼ်ၼႂ်းမၼ်းမႃး ၶိုၼ်း။

မိူဝ်ႈပီ 2018 ၼၼ်ႉ ယူႇတီႈၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင် မိူင်းတႆးလၢတ်ႈဝႃႈ တီႈလိၼ်သူၼ်ႁႆးၼႃး ၵူၼ်းမိူင်း ဢၼ်ထုၵ်ႇႁုပ်ႈယိုတ်းဢဝ်ၵႂႃႇၼၼ်ႉ သင်ဝႃႈ ဢမ်ႇၽုၵ်ႇသွမ်ႈသင်ၼႆ ပၼ်ၶိုၼ်းၸဝ်ႈၶွင်တီႈလိၼ်ၶိုၼ်းၼႆသေ ၵူၼ်း ဝၢၼ်ႈၶိုၼ်ႈလုမ်းတြႃး တေႃႇသူႈ ဢွင်ႇပေႉမႃးယဝ်ႉသေတႃႉ ၶွမ်ႊပၼီႊ ဢမ်ႇယွမ်းပၼ်ၶိုၼ်း။ ၵူၼ်းမိူင်းသမ်ႉတုၵ်းယွၼ်း မႃးၶိူဝ်းယႂ်းထိုင်တီႈၶွမ်ႊပၼီႊဢဝ်ႁႅင်းပလိၵ်ႈလႄႈသိုၵ်းမႃးလွမ်ႉႁူဝ်ႉဢဝ်မိူဝ်ႈႁူဝ်လိူၼ်ၼႆႉ။