သိုၵ်းမၢၼ်ႈ တီႉၵူၼ်းမိူင်း တီႈသီႇပေႃႉ 10 ၵေႃႉ ၽွင်းၵူၼ်းမိူင်းတိုၵ်ႉ ႁၢင်ႈႁႅၼ်း ၶွင်ၵိၼ် ယႅမ်ႉ တႃႇဢဝ်ၵႂႃႇၸွႆႈထႅမ် ၵူၼ်းပၢႆႈၽေးသိုၵ်း တီႈဝၢၼ်ႈပၢင်သပေႇ ဝႃႈၼႆ။
မိူဝ်ႈဝႃး ဝၼ်းတီႈ 19/5/2021 ယၢမ်းၵၢင်ၶမ်ႈ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ဝႃႈမီးလွင်ႈထၢင်ႇထိူမ်ၼႆသေ တီႉဢဝ်ၵူၼ်းမိူင်း 10 ၵေႃႉ ၵႃး 3 လမ်းလႄႈ ၶူဝ်းၶွင်/ ၶွင်ၵိၼ်ယႅမ်ႉ ဢၼ်တၢင်ႇဝႆႉၼိူဝ်ရူတ်ႉၵႃး တႃႇၸွႆႈထႅမ်ၵူၼ်းပၢႆႈၽေးသိုၵ်း ၸိူဝ်းၼၼ်ႉသေ ဢဝ်ၵႂႃႇၵုမ်းၶင်ဝႆႉ တီႈၼႂ်းတပ်ႉ မၢႆ 23 (နယ်မြေခံ ၂၃ ) ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။
ၵူၼ်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းၶဝ် မႃးတီႉၼၼ်ႉ ၶဝ်လၢတ်ႈဝႃႈ မီးလွင်ႈလူဝ်ႇ ထၢမ်ၼႆသေ ႁွင်ႉၵႂႃႇ။ ယဝ်ႉၵေႃႈ ၶူဝ်းၶွင် ဢၼ်တိုၵ်ႉတၢင်ႇဝႆႉၼိူဝ်ၵႃးၼၼ်ႉၵေႃႈ ဢဝ်ၵႂႃႇတင်းမူတ်း ၸဵမ်ၶူဝ်းတင်းၵႃး 3 လမ်း ဢဝ်ၵႂႃႇတီႈၼႂ်းတပ်ႉ 23 ၶဝ်ၼၼ်ႉ”- ဝႃႈၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ ၵူတ်ႇထတ်း ၵူၼ်းမိူင်း 10 ၵေႃႉ တီႈတပ်ႉမၢႆ 23 ၶဝ်ၼၼ်ႉယဝ်ႉ မိူဝ်ႈၼႆႉ ဝၼ်းတီႈ 20 ယၢမ်း ၵၢင်ၼႂ် တူဝ်ၵူၼ်းမိူင်း 10 ၵေႃႉၼၼ်ႉ ဢဝ်မႃးဝႆႉတီႈႁူင်းပလိၵ်ႈ သီႇပေႃႉ ဝႃႈၼႆ။
“လႆႈငိၼ်းဝႃႈ မိူဝ်ႈၼႆႉ တေပွႆႇပၼ်ၶိုၼ်း ၵူၼ်းမိူင်း 10 ၵေႃႉၼၼ်ႉ ဝၢႆးသေ သိုၵ်းမၢၼ်ႈ ဢဝ်ၵႂႃႇၸႅတ်ႈထၢမ်တီႈ တပ်ႉၶဝ် ၼၼ်ႉယဝ်ႉ ယၢမ်းလဵဝ် မႃးမီးဝႆႉတီႈ ႁူင်းပလိၵ်ႈယဝ်ႉ။ ယူႇတီႈၵူၼ်းၼႂ်းႁိူၼ်းၶွပ်ႈၶူဝ်းၽႂ်မၼ်းသေ လူဝ်ႇမႃးႁပ်ႉႁွင်း ႁွင်ႉ ပွၵ်ႈၵူၺ်း။ ၵူၺ်းၵႃႈ ၶွင်ၵိၼ်ယႅမ်ႉတႄႉ ၸွင်ႇၶဝ်တေပၼ်ၶိုၼ်း ဢမ်ႇပၼ်ၶိုၼ်းဢၼ်ဝႃႈၼၼ်ႉ လူဝ်ႇပႂ်ႉတူၺ်း ထႅင်ႈၵမ်ႈၼိုင်ႈ”- ၵူၼ်းပိုၼ်ႉတီႈ သီႇပေႃႉ သိုပ်ႇလၢတ်ႈၼႄၼင်ႇၼႆ။
တီႈဝၢၼ်ႈပၢင်သပေႇၼႆႉ ပဵၼ်ၵူၼ်းဝၢၼ်ႈပၢင်သပေႇ မၢၼ်ႈလီႈ ပၢႆႈၽေးသိုၵ်းမႃႈယူႇသဝ်းဝႆႉၸဵမ်မိူဝ်ႈႁၢင်လိူၼ်မၢတ်ႉၶျ် မွၵ်ႈ 300 ၵေႃႉ။ ယွၼ်ႉပၢင်တိုၵ်းၼႂ်းၵႄႈ သိုၵ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းၵၼ်။ တေႃႇထိုင်ယၢမ်းလဵဝ် သိုၵ်းသွင်ၾၢႆႇယင်းတိုၵ်ႉၶဵင်ႈၶႅင်ၵၼ်ယူႇလႄႈ ၵူၼ်းဝၢၼ်ႈပႆႇၸၢင်ႈပွၵ်ႈယူႇႁိူၼ်းၶိုၼ်း ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းတီႈသီႇပေႃႉလၢတ်ႈၼင်ႇၼႆ။
ယၢမ်းလဵဝ် ၼႂ်းဝဵင်းသီႇပေႃႉၼႆႉ ယူႇတီႈတူဝ်ပိဝ်ႇႁႃမူး လူင်းပိုၼ်ႉတီႈ လမ်းတီႉၺွပ်း ၵူၼ်းၼုမ်ႇဢွၵ်ႇ ၼႄၵၢင်ၸႂ် ႁၢဝ်ႈႁႅင်း ၸွမ်းလၢမ်းတီႉၵူၼ်းၼုမ်ႇ ၽႅဝ်ၼႂ်းႁိူၼ်းယေး ၵူႈဝၼ်း။
“ယၢမ်းလဵဝ် တူဝ်ပိဝ်ႇႁႃမူးၼႆႉ တေၵႂႃႇတီႈလႂ် ၺွပ်းၽႂ် ၼႆၸိူဝ်းၼႆႉဢမ်ႇပွင်ႇလၢတ်ႈၼႄတီႈပလိၵ်ႈ သိုၵ်းၼႂ်းပိုၼ်ႉတီႈ ယဝ်ႉ။ တၢမ်တူဝ်မၼ်း လူင်းပိုၼ်ႉတီႈတီႉၺွပ်းၵမ်းလဵဝ်။ ၵူၼ်းမိူင်းၵမ်ႈၼမ်တႄႉ မႆႈၸႂ် ဢမ်ႇႁူႉဝႃႈ မၼ်းတေမႃးတီႉၽႂ် ယၢမ်းလႂ် ၶၢဝ်းလႂ် ၼႆၸိူဝ်းၼႆႉ ဢွၼ်ၵၼ်မႆႈၸႂ်ယူႇ”- ၵူၼ်းၼုမ်ႇ ပိုၼ်ႉတီႈ သီႇပေႃႉလၢတ်ႈ။
ၼွၵ်ႈလိူဝ်ၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼင်ႇၵၼ်ၵေႃႈ ပိုတ်းယိုဝ်းၵၼ်ႁၢဝ်ႈႁႅင်း ၵူၼ်းမိူင်းပိုၼ်ႉတီႈ ၼမ်ႉတူႈ၊ သီႇပေႃႉ လႆႈပၢႆႈၽေးသိုၵ်းမႃးသွၼ်ႈဝႆႉတၢင်းသီႇပေႃႉ ႁူဝ်ၵူၼ်း မွၵ်ႈ 2,000 ၼႆယဝ်ႉ။
