ဝၼ်းလုၵ်ႉၽိုၼ်ႉ ၵွပ်ႇၵူႈဢဝ်ၶိုၼ်းမိူင်း ၶွပ်ႈၶူပ်ႇ 63 ပီ RCSS/SSA တေၸတ်းႁဵတ်း ပၢင် ၶုၵ်းထူပ်း တီႈငဝ်ႈၸိုင်ႈလွႆတႆးလႅင်း ၸွမ်းၼင်ႇ ငဝ်းလၢႆး တၢင်းပဵၼ် ၶူဝ်ႊဝိတ်ႉ 19 ။
ဝၼ်းတီႈ 21/5/2021 ပဵၼ်ဝၼ်း လုၵ်ႉၽိုၼ်ႉၵွပ်ႇၵူႈၸိူဝ်ႉၸၢတ်ႈၶွပ်ႈတဵမ် 63 ပီ ၊ ယူႇတီႈ ၶွင်ႇသီႇဢဝ် ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်ၵႅဝ်ႈၶုၵ်းထူပ်း ယုၵ်ႉယွင်ႈၵုင်ႇမုၼ် ၽူႈပိုၼ်ႉပွႆႇပုၼ်ႈလီသုၼ်ႇတူဝ် တႃႇၸိူဝ်ႉၸၢတ်ႈ ၼႂ်း တိုဝ်ႉတၢင်းဝၼ်းလုၵ်ႉၽိုၼ်ႉ၊ ယွၼ်ႉတၢင်းပဵၼ် ၶူဝ်ႊဝိတ်ႉ – 19 တိုၵ်ႉ လၢမ်းၽႄႈႁၢဝ်ႈႁႅင်းယူႇလႄႈ ပီၼႆႉတေဢမ်ႇၸတ်းပၢင်ၶိုၵ်ႉ ယႂ်ႇလူင်လၢင် မိူၼ်ၵူႈပီ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ႁဝ်းၶႃႈ တေမီးၶပ်ႉမၢႆ ဝၢင်းတူင်ႇမွၵ်ႇမွင်ၸႂ်လႄႈ လူႉတၢၼ်းယၢတ်ႇၼမ်ႉပၼ် ၵေႃႉသိုၵ်းၵေႃႉႁၢၼ် ၸိူဝ်းလူႇၼိူဝ်ႉလိူတ်ႈသၢႆၸႂ်ၵႂႃႇ ၸိူင်ႉၼၼ်ၵူၺ်းၶႃႈ”- ဝႃႈၼႆ။
တႃႇႁႄႉၵင်ႈၼင်ႇႁိုဝ်တၢင်းပဵၼ်ၶူဝ်ႊဝိတ်ႉ 19 တေဢမ်ႇလၢမ်းၽႄႈၼႆသေ ယူႇတီႈ RCSS/SSA လႆႈၶပ်းၶိုင်တႃႇၸတ်းပၢင် ႁႂ်ႈပဵၼ်လၢႆးၵူၼ်းဢေႇ ၼင်ႇႁိုဝ် ၵူၼ်းပေႃးတေ ဢမ်ႇၶွၼ်ႇတုမ်ၵၼ် ၽူႈၶၢၼ်ပၢၵ်ႇလၢတ်ႈၼင်ႇၼႆ။
ၵူႈပီတႄႉ မၢႆတွင်းဝၼ်းၵွပ်ႇၵူႈဢဝ်ၶိုၼ်းမိူင်းၼႆႉ RCSS ၸတ်းႁဵတ်းၶိုၵ်ႉယႂ်ႇလူင်၊ မွၵ်ႇၶႅၵ်ႇၶိုၵ်ႉတွၼ်း၊ ၽွင်းတၢင်လူင် လၢႆ လၢႆ မိူင်း၊ တူဝ်တႅၼ်းတပ်ႉသိုၵ်းတၢင်ႇၸၢဝ်းၶိူဝ်း၊ ပႃႇတီႇၵၢၼ်မိူင်းလၢႆလၢႆဢၼ်၊ တူဝ်တႅၼ်း ၵူၼ်းမိူင်း လႄႈ ၵူၼ်း ၼွၵ်ႈမိူင်းၼႂ်းမိူင်းၶဝ်ႈႁူမ်ႈၼပ်ႉႁဵင်၊ မီးၶပ်ႉမၢႆ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS/SSA မွၵ်ႇလၢတ်ႈၶေႃႈၵႂၢမ်း ၊ ပီၼႆႉတႄႉ ၸတ်းၸွမ်းငဝ်းလၢႆး တၢင်း ပဵၼ်ၶူဝ်ႊဝိတ်ႉ 19 ၵူၺ်းယဝ်ႉ – ဝႃႈၼႆ။
ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈသေ မိူဝ်ႈပီၵၢႆၵေႃႈ ပၢင်ၵႅဝ်ႈမၢႆတွင်းဝၼ်းလုၵ်ႉၽိုၼ်ႉ ဢဝ်ၶိုၼ်းမိူင်းၼႆႉ RCSS/SSA ဢမ်ႇလႆႈၸတ်းၵႂၢင်ႈၶႂၢင် တီႈငဝ်ႈၸိုင်ႈလွႆတႆးလႅင်း ။
