ၵူၼ်းမိူင်းႁူမ်ႈတုမ် လၵ်ႉၶဝ်ႈမိူင်းထႆး ဢမ်ႇၸွမ်းမၢႆမီႈ ထုၵ်ႇၸဝ်ႈၼႃႈတီႈထႆး တီႉၺွပ်း သူင်ႇပွၵ်ႈၶိုၼ်း တၢင်းတႃႈၶီႈလဵၵ်း 100 ပၢႆ။
မိူဝ်ႈၼႆႉ ဝၼ်းတီႈ 17/5/2021 ယၢမ်းၵၢင်ၼႂ် 8 မူင်း ၸဝ်ႈၼႃႈတီႈပလိၵ်ႈထႆး သူင်ႇတူဝ်ႁႅင်းၵၢၼ် မိူင်းႁူမ်ႈတုမ် ၽိတ်းမၢႆမီႈ လၵ်ႉၶဝ်ႈမိူင်းထႆး မွပ်ႈပၼ် ပလိၵ်ႈၽူႈမီးပုၼ်ႈၽွၼ်းတၢင်းတႃႈၶီႈလဵၵ်း တီႈၶူဝ်မိုတ်ႈၵိုဝ်းမၢႆ 2 ၸႄႈဝဵင်းတႃႈၶီႈလဵၵ်း ၸိုင်ႈ တႆးပွတ်း ဢွၵ်ႇၶူင်း တင်းမူတ်း 101 ၵေႃႉ ၼႆယဝ်ႉ။
ၽူႈၸွႆႈထႅမ် ႁႅင်းၵၢၼ် တီႈတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈတၢင်းမိူင်းထႆး မွပ်ႈဢၢပ်ႈမႃး ၵူၼ်း မိူင်းႁူမ်ႈတုမ်ႁဝ်း ဢၼ်လၵ်ႉၶဝ်ႈၵႂႃႇ ၼႂ်းမိူင်းတႆး 100 ပၢႆ ။ ၸဝ်ႈၼႃႈတီႈမိူင်းႁူမ်ႈတုမ် ၶိုၼ်းႁပ်ႉ ဢဝ်သေ သူင်ႇပွၵ်ႈမိူဝ်းၶိုၼ်း ဢွင်ႈတီႈၽႂ်မၼ်းယဝ်ႉ။ ၵူၺ်းၵႃႈ လွင်ႈၵိၼ်ယႅမ်ႉလႄႈ ၵႃႈတၢင်းတႄႉ ယူႇတီႈႁႅင်းၵၢၼ် ဢွၵ်ႇႁင်းၵူၺ်းၶႃႈ”- ဝႃႈၼႆ။
ႁႅင်းၵၢၼ် ဢၼ်ထုၵ်ႇသူင်ႇပွၵ်ႈမႃး 101 ၵေႃႉၼၼ်ႉပဵၼ် ၽူႈၸၢႆး 51 ၵေႃႉလႄႈ ၽူႈယိင်း 50 ၵေႃႉ။ ယၢမ်းလဵဝ်တၢင်း လူင်ပွင်ၸိုင်ႈထႆး ၶဵင်ႈၶႅင်လွင်ႈႁူမ်ႇလူမ်ႈၸွမ်းလႅၼ်လိၼ်တႆး – ထႆး ႁၢဝ်ႈႁႅင်း ၼႆယဝ်ႉ။
“ယၢမ်းလဵဝ် တင်းၾင်ႇမိူင်းထႆးၼၼ်ႉ ၶဝ်ၶဵင်ႈၶႅင်လွင်ႈႁူမ်ႇလူမ်ႈႁၢဝ်ႈႁႅင်း ၸွမ်းလႅၼ်လိၼ်ၼႆႉ ၶဝ်ဢဝ်ၸိူၵ်ႈလဵၵ်း ႁႄႉ ဝႆႉမူတ်း ယဝ်ႉၵေႃႈ ၸႂ်ႉႁႅင်းၵူၼ်းပႂ်ႉတူၺ်းဢဝ်ႁူမ်ႇလူမ်ႈဝႆႉယူႇတႃႇသေႇ”- ၵူၼ်း တႃႈၶီႈလဵၵ်း ၵေႃႉၼိုင်ႈလၢတ်ႈ။
ႁႅင်းၵၢၼ် 101 ၵေႃႉ ဢၼ်ထုၵ်ႇသူင်ႇတူဝ်ပွၵ်ႈၶဝ်ႈမႃး တၢင်းတႃႈၶီႈလဵၵ်းၼႆႉ ယူႇတီႈၽူႈမီးပုၼ်ႈၽွၼ်း တင်းၾင်ႇတႃႈၶီႈ လဵၵ်း လႆႈၵူတ်ႇထတ်းတၢင်းပဵၼ်ၶူဝ်ႊဝိတ်ႊ 19 သေ ထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် 4 ၵေႃႉ ၼႆယဝ်ႉ။
ၼႂ်းၵူၼ်းၸပ်းၸိူဝ်ႉမႅင်းတၢင်းပဵၼ် 4 ၵေႃႉၼၼ်ႉ ပဵၼ်ၽူႈၸၢႆး 2 ၵေႃႉ ၽူႈယိင်း 2 ၵေႃႉ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃတႃႈၶီႈလဵၵ်း ဝႃႈၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းမိူင်း မိူဝ်ႈဝၼ်းတီႈ 1/2/2021 ၼၼ်ႉမႃး ၵူၼ်းမိူင်း ႁူမ်ႈတုမ် ဢွၼ်ၵၼ်လၵ်ႉၶဝ်ႈ မိူင်းထႆး ၶႂ်ႈဝႃႈ မီးၵူႈဝၼ်း ။
လိူဝ်ၼၼ်ႉ ထႅင်ႈၾၢႆႇၼိုင်ႈၵေႃႈ ၼႂ်းမိူင်းထႆးၼၼ်ႉသမ်ႉ တၢင်းပဵၼ်ၶူဝ်ႊဝိတ်ႉ 19 ၼႆႉ သမ်ႉၽႄႈလၢမ်းႁၢဝ်ႈႁႅင်း ပွၵ်ႈၵမ်း 3 သေ ၸွမ်းလႅၼ်လိၼ် ၵူႈတီႈ ဢၼ်တိတ်းၸပ်း တၢင်းမိူင်းထႆး ၸိူဝ်းၼၼ်ႉ ယူႇတီႈၸဝ်ႈၼႃႈတီႈထႆး လႆႈၶဵင်ႈၶႅင်လွင်ႈ ႁူမ်ႇလူမ်ႈႁၢဝ်ႈႁႅင်းမႃး လိူဝ်ၵဝ်ႇထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ