ၽွင်းၶၢဝ်းလုၵ်ႈႁဵၼ်း တွပ်ႇလိၵ်ႈၸၼ်ႉသိပ်းၼႆႉ ၾၢႆႇၽွင်းငမ်းၸႄႈဝဵင်းတူၼ်ႈတီး ၸီႉသင်ႇဢမ်ႇပၼ်ပိုတ်ႇႁၢၼ်ႉတၢင်း ၵိၼ်ၵၢင်ၶမ်ႈ/ၶိုၼ်း(ႁၢၼ်ႉပႃး Bar)၊ ႁၢၼ်ႉလဝ်ႈ၊ ႁၢၼ်ႉပီႊယိူဝ်ႊ၊ ႁၢၼ်ႉၵႃႊလႃႊဢူဝ်ႊၶေႊ  ၸိူဝ်းၼႆႉ ဝႃႈၼႆ။

ယူႇတီႈလုမ်းၽူႈၵွၼ်းၸႄႈဝဵင်းတူၼ်ႈတီး လၢတ်ႈဝႃႈ “ ၽွင်းၶၢဝ်း လုၵ်ႈႁဵၼ်းတွပ်ႇလိၵ်ႈၸၼ်ႉသိပ်းၼၼ်ႉ ၼင်ႇႁိုဝ် လုၵ်ႈႁဵၼ်းၶဝ် ပေႃးတေ ၸႂ်ၼိမ် ပေႃးတေလူလိၵ်ႈလႆႈၼၼ်ႉ တေဢမ်ႇႁႂ်ႈမီးသဵင်ဢူၼ်ဢၢၼ်မေႃးမႄး။ ၵွပ်ႈၼၼ်  မိူၼ်ၼင်ႇ ႁၢၼ်ႉလဝ်ႈ၊ ၵႃႊလႃႊဢူဝ်ႊၶေႊ၊ ပႃႊ(Bar)  ၸိူဝ်းၼႆႉ  ၸင်ႇၸႂ်ႉဢိုတ်းဝႆႉ မိူဝ်ႈၽွင်းလုၵ်ႈႁဵၼ်း ၶဝ်တွပ်ႇလိၵ်ႈ ” ဝႃႈၼႆ။

လိူဝ်ၼၼ်ႉ ၼႂ်းဝူင်ႈၼႆႉ ယူႇတီႈလုမ်းၽူႈၵွၼ်းၸႄႈဝဵင်းတူၼ်ႈတီး တေႁဵတ်းလိၵ်ႈၸီႉသင်ႇ ၸူးထိုင် တီႈလုမ်းၽူႈၵွၼ်းပွၵ်ႉ/ ဢိူင်ႇၶဝ် လွင်ႈတႃႇႁၢမ်ႈတပ်ႉႁၢၼ်ႉပိုတ်ႇၶၢႆတၢင်းၵိၼ်ၵၢင်ၶမ်ႈၵၢင်ၶိုၼ်းလႄႈ ႁၢၼ်ႉၵႃႊလႃႊ ဢူဝ်ႊၶေႊ၊ ႁၢၼ်ႉလဝ်ႈ ၸဵမ်ၸိူဝ်းၼႆႉၵႂႃႇ ဝႃႈၼႆ။

လိူဝ်ၼၼ်ႉထႅင်ႈ မိူၼ်ၼင်ႇ ႁၢၼ်ႉလဵၼ်ၵဵမ်ႊ ဢိၼ်ႊထိူဝ်ႊၼႅတ်ႊ၊ ႁၢၼ်ႉပိလိယႅတ်ႉ(သၼုၵ်ႊၵိူဝ်ႊ)လႄႈ ႁၢၼ်ႉႁွင်ႉၽဵင်းၵႂၢမ်း ၸိူဝ်းၼၼ်ႉၵေႃႈ တေႁႂ်ႈဢိုတ်းယင်ႉဝႆႉ  ဝႃႈၼႆ။

သင်ဝႃႈ ႁၢၼ်ႉလႂ်၊ ၽႂ်လႂ် ဢမ်ႇၸွမ်းပၵ်းပိူင်မၢႆမီႈၸိုင် တေပၼ်တူတ်ႈတၢမ်ႇၼင်ႇ တမ်းဝၢင်းမၢႆမီႈဝႆႉၼၼ်ႉ ဝႃႈၼႆ။ ပၢင်တွပ်ႇလိၵ်ႈၸၼ်ႉသိပ်း ၼႂ်းမိူင်းႁူမ်ႈတုမ်မၢၼ်ႈၼႆႉ တႄႇဝၼ်းတီႈ 07–16/03/2018  ။ လုၵ်ႈႁဵၼ်း ဢၼ်တေတွပ်ႇၸၼ်ႉသိပ်း ၼႂ်းပီ 2017-2018 ၼႆႉတင်းမူတ်း မီး 844,292 ၵေႃႉ ႁွင်ႈၵၢၼ်ၽွင်းလူင်ၾၢႆႇပွင်ႇၶၢဝ်ႇ ဢွၵ်ႇဝႆႉဝႃႈၼႆ။

ၶေႃႈမုလ်း – ရွှေတြိဂံဒေသသတင်းလွှာ