ၵႃးတၢင်ႇၵူၼ်းလမ်းၼိုင်ႈ လုၵ်ႉတၢင်းၵဵင်းတုင် တေၵႂႃႇတၢင်းတႃႈၶီႈလဵၵ်း ၺႃးၵူၼ်းယိပ်းၵွင်ႈသွင်ၵေႃႉ ယိုဝ်းသႂ်ႇတီႈႁိမ်းဝဵင်းမိူင်းၽျၢၵ်ႈ လွင်ႈ ၵူၼ်းမၢတ်ႇၸဵပ်းလူႉတၢႆ ဢမ်ႇမီး ဝႃႈၼႆ။
ဝၼ်းတီႈ 26/02/2018 ယၢမ်းဝၢႆးဝၼ်း ၵႃးႁပ်ႉၸၢင်ႈ သႅၼ်း Hi ace ႁပ်ႉတေႃႉသူင်ႇၵူၼ်း လုၵ်ႉတၢင်းၵဵင်းတုင် ၵႂႃႇတၢင်းတႃႈၶီႈလဵၵ်းၼၼ်ႉ ၺႃးယိုဝ်းတီႈႁိမ်းၸႄႈဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၵူၺ်းၵႃႈ ၵူၼ်းၶီႇမႃးၸွမ်းၵႃးတႄႉ ဢမ်ႇမီးလွင်ႈမၢတ်ႇၸဵပ်းလူႉတၢႆသင်သေၵေႃႉ ဝႃႈၼႆ။
ၵူၼ်းမိူင်းၽျၢၵ်ႈ လၢတ်ႈဝႃႈ “ ၸႂ်ႈၶႃႈဢေႃႈ ၵႃးႁပ်ႉၸၢင်ႈတၢင်ႇၵူၼ်း လမ်းၼိုင်ႈ ဢၼ်ႁပ်ႉ ၸၢင်ႈတေႃႉသူင်ႇၵူၼ်း ၵဵင်းတုင်- တႃႈၶီႈလဵၵ်းၼၼ်ႉ ၺႃးယိုဝ်း ၼႂ်းၵႄႈဝၢၼ်ႈတႃႈၸႅဝ်ႇ တင်း မိူင်းၽျၢၵ်ႈ။ ၵူၺ်းၵႃႈ ၵူၼ်းၶီႇၵႃးတႄႉ ဢမ်ႇပဵၼ်သင် လႆႈငိၼ်းဝႃႈ ၵူၼ်ႈၵႃး ၺႃးယိုဝ်းလၢႆလၢႆၵမ်း” ဝႃႈၼႆ။
ၽွင်းလူတ်ႉၵႃးတိုၵ်ႉလႅၼ်ႈမႃးၼၼ်ႉ မီးပျီႇတူႉၸိတ်ႉ 2 ၵေႃႉ ယူႇၼိူဝ်သဵၼ်ႈတၢင်းလူင်သေ ႁႄႉၵႃးလမ်းၼႆႉ ႁႂ်ႈၵိုတ်း။ ၵူၺ်းၵႃႈ ၵႃးလမ်းၼႆႉ ဢမ်ႇၵိုင်ႉၵၢင်ႉၵိုတ်းလႄႈ ပျီႇတူႉၸိတ်ႉ 2 ၵေႃႉ ယိုဝ်းၸွမ်းလင်ၵႃး ။ လူတ်ႉၵႃးၵေႃႈဢမ်ႇၵိုတ်းသေ ႁေႃႈလႅၼ်ႈပူၼ်ႉလွတ်ႈၵႂႃႇ။ တၢင်းၵူၼ်ႈၵႃးတႄႉ မီးႁွႆးမၢၵ်ႇၵွင်ႈ လၢႆလၢႆၵမ်း။ ပျီႇတုၸိတ်ႉသွင်ၵေႃႉၼၼ်ႉတႄႉ ပဵၼ်ၽႂ်ဢမ်ႇလႆႈႁူႉၸွမ်း-ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ