ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝဵင်းသီႇပေႃႉ ႁူဝ်ၵူၼ်း 1,300 ပၢႆၼၼ်ႉ ၵမ်ႈၼမ် ပဵၼ်ၼၢင်းယိင်းလႄႈ ယၢမ်းလဵဝ် လူဝ်ႇတၢင်းၸွႆႈထႅမ် ၶိူင်ႈၸႂ်ႉသွႆ ၼၢင်းယိင်း ဝႃႈၼႆ။

တႄႇဢဝ် ဝၼ်းတီႈ 5/4/2021 မႃး တေႃႇထိုင်ယၢမ်းလဵဝ် မီးၶၢဝ်းတၢင်းလိူၼ်ပၢႆယဝ်ႉ ၵူၼ်းပၢႆႈၽေးသိုၵ်း ဢၼ်ပၢႆႈမႃး သွၼ်ႈဝႆႉတီႈဝတ်ႉႁေႃၼမ်ႉ၊ ႁွင်ႈၵဵပ်းၶွင်သႃးတူင်းတူႇ (ၵူဝ်ႇတွင်ႇ)၊ ဝတ်ႉပၢင်ႇၼိူဝ်၊ ဝတ်ႉမၢၼ်ႈၵွင်း၊ မၢၼ်ႈလီႈ လႄႈ ႁွင်ႈ ၵဵပ်းၶွင် ဝၢၼ်ႈပၢင်ႇၼိူဝ် ႁူဝ်ၵူၼ်း မီး 1,300 ပၢႆ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ယၢမ်းလဵဝ် ပႆႇၸၢင်ႈ ပွၵ်ႈႁိူၼ်းယေးၵၼ် လူဝ်ႇတၢင်းၸွႆႈထႅမ် ႁၢဝ်ႈႁႅင်း ပဵၼ်ၶိူင်ႈၸႂ်ႉသွႆၼၢင်းယိင်း ၼႆယဝ်ႉ။

ၼၢင်းမွၼ်းပဝ်း ၽူႈတႅၼ်းသၽႃးၸႄႈမိူင်း ဢၼ်ဢွင်ႇပေႉ မိူဝ်ႈဝၼ်းတီႈ 2020 ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်း လဵဝ် ဢၼ်လူဝ်ႇႁႅင်းသုတ်းတႄႉ ပဵၼ်ၶိူင်ႈၸႂ်ႉၼၢင်းယိင်းၶႃႈဢေႃႈ။ ၵမ်ႈၼမ် ပိူၼ်ႈတေဢမ်ႇၶဝ်ႈၸႂ်ၵၼ်သေ သိုဝ်ႉမႃး။ မၢင်ၵေႃႉသမ်ႉ လွင်ႈၵိၼ်ယႅမ်ႉလမ်ႇလွင်ႈဢိူဝ်ႈၼႆ သိုဝ်ႉၶွင်ၵိၼ်ယႅမ်ႉၵၼ်မႃးၼၼ်ႉၶႃႈၼႃႇ။ ၵူၺ်းၵႃႈ ၶိူင်ႈၸႂ်ႉသွႆ တႃႇ ၼၢင်းယိင်းၵေႃႈ ႁူႉယူႇၼၼ်ႉၶႃႇၼႃႇ လူဝ်ႇၸႂ်ႉၶႃႈဢေႃႈ”- ဝႃႈၼႆ၊

ၵမ်ႈၼမ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၸႄႈဝဵင်းသီႇပေႃႉၼႆႉ ပဵၼ်ၵူၼ်းမိူင်း တၢင်းၼမ်ႉတူႈ။ လိူဝ်ၼၼ်ႉ တၢင်းဢိူင်ႇတႃႈတေႈ လႄႈ ၶၢႆးမွၼ် သီႇပေႃႉ ၸိူဝ်းၼႆႉ။

“ၼႂ်းဝၼ်းသွင်ဝၼ်း တၢင်းမၢၼ်ႈလီႈ ၼမ်ႉလၼ်ႈၼႆႉ သဵင်ၵွင်ႈတိုၵ်ႉတႅၵ်ႇထႅင်ႈယူႇ ပႆႇယဵၼ် ယွၼ်ႉၼၼ်လႄႈ ၼႂ်းပိုၼ်ႉ တီႈ ပႆႇမီးလွင်ႈၼိမ်သဝ်း ပႆႇလႆႈတမ်းၸႂ်လႄႈ ႁဝ်းၶႃႈ ပႆႇႁတ်းပွၵ်ႈႁိူၼ်းယေးၵၼ်ၶႃႈ။ ၵူၺ်းၵႃႈ ၸိူဝ်းပဵၼ် ၽူႈၸၢႆး ၵူၼ်း ၼုမ်ႇတႄႉ ဢွၼ်ၵၼ်ပွၵ်ႈမိူဝ်းတူၺ်းႁိူၼ်းယေးၵၼ်ယူႇ ပေႃးယဝ်ႉၵေႃႈ ပွၵ်ႈမႃးၼွၼ်းတီႈဝတ်ႉ ၸိူင်ႉၼႆ မႆႈၸႂ် ႁိူၼ်း ယေး သူၼ်ႁႆႈၼႃးၵၼ်ၼၼ်ႉၶႃႈယဝ်ႉ”- ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈၽႅဝ်တီႈသီႇပေႃႉ ၵေႃႉၼိုင်ႈ လၢတ်ႈၼႄၼင်ႇ ၼႆ။

ဝၢႆး ၶွင်ႇသီႇသိုၵ်း မၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းမႃး တင်ႈဢဝ်မွၵ်ႈၵၢင်လိူၼ်ၾႅပ်ႊၿိဝ်ႊရီႊၼႆႉမႃး RCSS တင်း TNLA, SSPP ပဵၼ်ပၢင်တိုၵ်းၵၼ် ပွတ်းၼမ်ႉတူႈ၊ ၵျွၵ်ႉမႄး၊ သီႇပေႃႉ မႃးႁၢဝ်ႈႁႅင်း ။ ႁိူၼ်းယေး ၵူၼ်းဝၢၼ်ႈ ၺႃးၾႆးၽဝ်ပႅတ်ႈ မွၵ်ႈ 100 ပၢႆ။ ၵမ်ႈၼမ် ပဵၼ်ႁိူၼ်း ၵူၼ်းပၢႆႈၽေးသိုၵ်း ပွတ်း ဝၢၼ်ႈပၢင်လူင်၊ ယေႇဢူဝ်း၊ ၵုင်းသႃႇလႄႈ မၢၼ်ႈလီႈ ၸိူဝ်းၼႆႉ။ ပဵၼ်ၸုမ်းလႂ်ႁဵတ်းႁင်းၵူၼ်းဝၢၼ်ႈတႄႉဢမ်ႇႁူႉ၊ ယွၼ်ႉပိူဝ်ႈပဵၼ်ၽွင်းၵူၼ်းဝၢၼ်ႈပၢႆႈၽေးသိုၵ်းလႄႈဢမ်ႇမီးၽႂ်ႁၼ် ဝႃႈၼႆ။