တႆးၵႂႃႇႁဵတ်းၵၢၼ် ဝဵင်းၵဵင်းမႆႇ ၺႃးလူတ်ႉၽႃႇတၢႆ

ၼၢင်းယိင်းတႆး သႅၼ်းဢႃယု 45 ၵေႃႉၼိုင်ႈ ယူႇထုင်ႉၵေးသီး ၵႂႃႇႁဵတ်းၵၢၼ် တီႈဝဵင်းၵဵင်းမႆႇ မိူင်းထႆး တွၼ်ႈၼိူဝ် ၵေႃႉၼိုင်ႈၼၼ်ႉ ၺႃးၵႃးလူင် ၽႃႇသႂ်ႇ လူႉတၢႆထင်တီႈ။

ဝၼ်းတီႈ 25/02/2018 ယၢမ်းဝၢႆးဝၼ်း မွၵ်ႈ 3 မူင်း ၼၢင်းပုၺ်ႉ ဢႃယု 45 ပီ ၽွင်းတိုၵ်ႉၵႂႃႇၸၢႆႇၵၢတ်ႇယဝ်ႉသေ တေပွၵ်ႈၶိုၼ်းတီႈႁွင်ႈယူႇသဝ်းၼၼ်ႉ ၺႃးလူတ်ႉၵႃးၽႃႇသႂ်ႇမၼ်းၼၢင်း ထုၵ်ႇမၢၵ်ႇၵႃးႁိပ်ႇသႂ်ႇ တီႈတူဝ်မၼ်းၼၢင်း ၵမ်းလဵဝ်။ ၵႃးၽႃႇမၼ်းၼၢင်း တီႈႁိမ်းၵၢတ်ႇရူမ်းၶျူၵ်ႉ – မႄႈၸူဝ်ႉ ဝဵင်းၵဵင်းမႆႇ ။

ၸၢႆးတူၼ်ႉ ၵေႃႉပဵၼ်ၼွင်ႉၸၢႆး ၼၢင်းပုၺ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၶဝ်ၶီႇၵႂႃႇၸွမ်းၵၼ် 3 ၵေႃႉ လုၵ်ႈၶႃႈၵေႃႉၼိုင်ႈ မေးၶႃႈ ပဵၼ်ၵူၼ်းၵေႃႉႁေႃႈလူတ်ႉၶိူင်ႈ၊ ပီႈၼၢင်းၶႃႈသမ်ႉ ပဵၼ်ၵူၼ်းသွၼ်ႉတၢင်းၾၢႆႇလင်။ ၵမ်းၼႆႉၶဝ်သမ်ႉ ဢွၵ်ႇတီႈၵၢတ်ႇ ရူမ်းၶျူၵ်ႉသေ တေပွၵ်ႈႁိူၼ်း မေးၶႃႈသမ်ႉ ႁေႃႈလူတ်ႉၶိူင်ႈမႃးၸမ် လူတ်ႉၵႃး ဢၼ်တိုၵ်ႉလႅၼ်ႈမႃးဝႆးၼၼ်ႉသေ လႆႈဢဝ်လူတ်ႉၶိူင်ႈၶဝ် လူမ်ႉၵႂႃႇလႄႈ တူဝ်ပီႈၼၢင်းၶႃႈ ႁဵတ်းႁိုဝ်ၵေႃႈဢမ်ႇႁူႉ၊ ဝူင်တူၵ်းၵႂႃႇတႂ်ႈၵႃးလူင်လမ်းၼၼ်ႉ မၢၵ်ႇလူတ်ႉၼၼ်ႉၵေႃႈၶိုတ်ႈသႂ်ႇ။ မေးၶႃႈသမ်ႉ ဢမ်ႇတၼ်းပဵၼ်သင် ၶႃမၼ်းၵူၺ်းလွၵ်ႈၵႂႃႇဢိတ်းၼိုင်ႈ” ဝႃႈၼႆ။

သိုပ်ႇလၢတ်ႈဝႃႈ လွင်ႈၼႆႉ ယူႇတီႈၾၢႆႇၸဝ်ႈၼႃႈတီႈပလိၵ်ႈၶဝ် မႃးၵူတ်ႇထတ်းတူၺ်းသေ လၢတ်ႈဝႃႈ တင်းၾၢႆႇႁဝ်းၽိတ်းဝႃႈၼႆ။ ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈၶဝ်ၵေႃႈ လၢတ်ႈတီႈၵူၼ်းႁေႃႈလူတ်ႉၵႃးၼၼ်ႉဝႃႈ ႁႂ်ႈၸွႆႈထႅမ်ပၼ် ၵႃႈလုမ်းလႃးသၢင်းၵျူဝ်ႇ ဝႃႈၼႆ ။ ၵူၺ်းၵႃႈ တေႃႇထိုင်ယၢမ်းလဵဝ် ပႆႇႁၼ်ၶဝ်မႃးၸွႆႈတူၺ်းသင် ဝႃႈၼႆ။

တေႃႈလဵဝ် ၶၢပ်ႈတူဝ်ၼၢင်းပုၺ်ႉၼႆႉ လႆႈလုမ်းလႃးဝႆႉတီႈဝတ်ႉၻွၼ်းၸၼ်ႇ။ ပေႃးထိုင်မႃး ဝၼ်းတီႈ 02/03/2018 ၸိူဝ်းပဵၼ်ပီႈၼွင်ႉၸိူဝ်ႉၶိူဝ်း ၼၢင်းပုၺ်ႉ တေဢွၼ်ၵၼ်လုမ်းလႃးသၢင်းၵျူဝ်ႉ/ ပူၼ်ႉၶၢပ်ႈတူဝ်ၵႂႃႇ ဝႃႈၼႆ။

ၼၢင်းပုၺ်ႉၼႆႉ ပဵၼ်လုၵ်ႈယိင်း လုင်းလႃႉ ပႃႈထွၼ်းသႃႇ ၸႃတိ ဝၢၼ်ႈၵျွင်း ၸႄႈဝဵင်းၵေးသီး ၸိုင်ႈတႆး ပွတ်းၸၢၼ်း။ ၶဝ်ႈႁဵတ်းၵၢၼ်ၼႂ်းမိူင်းထႆး မီး 10 ပီပၢႆယဝ်ႉ။ မၼ်းၼၢင်း မီးလုၵ်ႈလၢင်း 3 ၵေႃႉ ဝႃႈၼႆ။

ၸၢႆးတူၼ်ႉ သိုပ်ႇလၢတ်ႈဝႃႈ ၶႂ်ႈယွၼ်းပၼ်ၾၢင်ႉထိုင် ပၼ်ပီႈၼွင်ႉႁႅင်းၵၢၼ်တႆးႁဝ်းၶႃႈ ၵူႈၵေႃႉ သင်ဝႃႈ ႁေႃႈလူတ်ႉ ၵႃး/ လူတ်ႉၶိူင်ႈၼႆ ယႃႇပေဝႆႉမဝ်မၢင်လႃးလႃး၊ ပေႃးပဵၼ်လူတ်ႉၶိူင်ႈၵေႃႈ ႁႂ်ႈတိုဝ်းမၢၵ်ႇႁူဝ်လူတ်ႉၶိူင်ႈ(မၢၵ်ႇႁူဝ်ႁႄႉၽေး)၊ ႁႂ်ႈႁေႃႈလွႆးလွႆး၊ ပေႃးႁဝ်းၶႃႈ ဢမ်ႇဝႆႉလွင်ႈယႂ်ႇၸိုင် ပေႃးပဵၼ်မႃးၼႆ ၵမ်းၼိုင်ႈၵူၺ်း” ဝႃႈၼႆ။