ႁိူၼ်းၵူၼ်းဝၢၼ်ႈ မၢၼ်ႈသႃႇ ၼႂ်းမိူင်းမၢဝ်း 2 လင်၊ မိူဝ်ႈၼႆႉ ၵၢင်ၼႂ်ၺႃးၾႆးမႆႈ။
ဝၼ်းတီႈ 10/11/2017 ယၢမ်းၵၢင်ၼႂ် 9 မူင်း (ယၢမ်းမိူင်းၶႄႇ) ၾႆးမႆႈႁိူၼ်း ပီႈၼွင်ႉတႆး ၼႂ်းဝၢၼ်ႈမၢၼ်ႈသႃႇ ၸႄႈမိူင်းမၢဝ်း ၸိုင်ႈမိူင်းၶႄႇ၊ သိုပ်ႇလၢမ်းမႆႈထႅင်ႈလင်ၼိုင်ႈ ဢမ်ႇတၼ်းမႆႈမူတ်း ဝႃႈၼႆ။
ၵူၼ်းၼႂ်းပိုၼ်ႉတီႈ မၢၼ်ႈသႃႇလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်းၶႃႈလႆႈႁူႉတႄႉ ၵေႃႉပဵၼ်ၽူႈၸၢႆး ပေႃႈ ၸဝ်ႈႁိူၼ်းၵိၼ်ယႃႈမႃႉ ယွင်ႇသေ ဢဝ်ၾႆးၽဝ်ႇၶိုၼ်းႁိူၼ်း။ ၵူၺ်းၵႃႈ ၾႆးတႄႉ တႄႇမႆႈ ယၢမ်း ၵၢင်ၼႂ် 9 မူင်းၶႃႈဢေႃႈ။ မႆႈပႃးၶၢင်ႈႁိူၼ်းထႅင်ႈ၊ ဢမ်ႇတၼ်းမႆႈမူတ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၵူၼ်းၼႂ်းဝၢၼ်ႈႁိမ်းႁွမ်းသေ ႁူမ်ႈပႃး ၸဝ်ႈၼႃႈတီႈၾၢႆႇၶႄၾႆး လႆႈၸွႆႈၵၼ် ၶႄၾႆးမွတ်ႇ ၸဝ်ႈႁိူၼ်းၵေႃႈၺႃးၸဝ်ႈၼႃႈတီႈၶႄႇႁွင်ႉၵႂႃႇယဝ်ႉ ဝႃႈၼႆ။
