ၵူၼ်းၼုမ်ႇမူႇၸေႊ ၸုတ်ႇၽဝ်ပၢႆႉလုမ်းလဝၵ တုၵ်းယွၼ်းပွႆႇပၼ်ၶိုၼ်းၵူၼ်းၸိူဝ်းသိုၵ်းမၢၼ်ႈတီႉၺွပ်းၵႂႃႇ

ၵူၼ်းၼုမ်ႇ ၼႄၵၢင်ၸႂ် တီႈမူႇၸေႊ ၼႄၵၢင်ၸႂ်သၢၼ်ၶတ်းသိုၵ်းယိုတ်းမိူင်း၊ ၵႂႃႇၽဝ်ပၢႆႉလုမ်းၾၢႆႇ ၵူတ်ႇထတ်းသဵၼ်ႈမၢႆႁူဝ်ၵူၼ်း (လဝၵ) ၸႄႈတွၼ်ႈမူႇၸေႊ တုၵ်းယွၼ်းႁႂ်ႈပွႆႇပၼ်ၶိုၼ်းၵူၼ်း ၼႄၵၢင်ၸႂ် ဢၼ်သိုၵ်းမၢၼ်တီႉၺွပ်းၵႂႃႇ 20 ပၢႆၼၼ်ႉသေ ။ 

မိူဝ်ႈၼႆႉ ဝၼ်းတီႈ 29/3/2021 သိုၵ်းမၢၼ်ႈတီႉၺွပ်းၵူၼ်းၼုမ်ႇၼႄၵၢင်ၸႂ်တီႈမူႇၸေႊၵႂႃႇ 20 ၵေႃႉ။ ယၢမ်းဝၢႆးဝၼ်း ၸုမ်းၵူၼ်းၼုမ်ႇ ၼႄၵၢင်ၸႂ် ႁူမ်ႈၵၼ် ၵႂႃႇယႃႉပၢႆႉလုမ်းၾၢႆႇၵဵပ်း သဵၼ်ႈမၢႆႁူဝ်ၵူၼ်းလႄႈ ၵူတ်ႇထတ်းၵူၼ်းၶဝ်ႈဢွၵ်ႇမိူင်း  ၸႄႈတွၼ်ႈမူႇၸေႊ တီႈပွၵ်ႉႁွင်ႇ ၸႄႈဝဵင်းမူႇၸေႊ သေ ၽဝ်ပႅတ်ႈ  ။

ၵူၼ်းၼုမ်ႇ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸုမ်းၵူၼ်းၼုမ်ႇ  ၵႂႃႇယႃႉပၢႆႉလုမ်း လဝၵ ၸႄႈ တွၼ်ႈလူင်းသေ  ၽဝ်ၾႆး၊ ယဝ်ႉၵေႃႈ ယႃႉၽၵ်းတူဝၢင်းလုမ်း၊ ၽၵ်းတူလုမ်း တုၵ်းယွၼ်းႁႂ်ႈသိုၵ်းမၢၼ်ႈ ပွႆႇပၼ်ၵူၼ်း ၼုမ်ႇ ဢၼ်ၶဝ်တီႉၺွပ်းၵႂႃႇမိူဝ်ႈၼႆႉ   20 ၵေႃႉၼႆႉၶႃႈ”-  ဝႃႈၼႆ။

ဢၼ်ၵူၼ်းၼုမ်ႇမူႇၸေႊ ၵႂႃႇယႃႉပၢႆႉလဝၵ လူင်းသေ ၽဝ်ၾႆးၼၼ်ႉ- ပဵၼ်လွင်ႈလွၵ်ႇငိုတ်ႈထိုင်ပလိၵ်ႈ ႁႂ်ႈပွႆႇပၼ်ၵူၼ်းၼုမ်ႇၶိုၼ်းၵူၺ်း။ ၶေႃႈမုၼ်းလႄႈ ၽိုၼ်လိၵ်ႈလၢႆး ၼႂ်းလုမ်းတႄႉ ဢမ်ႇလႆႈတိူဝ်ႉသေဢိတ်း ဝႃႈၼႆ။  ၵူၺ်းၵႃႈ သင်ဝႃႈ သိုၵ်းမၢၼ်ႈလႄႈပလိၵ်ႈ ဢမ်ႇပွႆႇပၼ်ၵူၼ်းၶဝ်ၶိုၼ်းၸိုင် ၵူၼ်းၼုမ်ႇတေသိုပ်ႇႁဵတ်းသၢင်ႈ ၼႄၵၢင်ၸႂ်တုၵ်းယွၼ်းၵႂႃႇထႅင်ႈ ၶိူဝ်းယၢႆး ၵူၼ်းၼုမ်ႇ မူႇၸေႊ သိုပ်ႇလၢတ်ႈၼႄၼင်ႇၼႆ။

“မိူဝ်ႈၼႆႉ ယၢမ်းၵၢင်ဝၼ်း ၵူၼ်းၼုမ်ႇ ၼႄၵၢင်ၸႂ် ထုၵ်ႇသိုၵ်းမၢၼ်ႈ တီႉၺွပ်း ၸမ် 20 ၵေႃႉ။ သိုၵ်းမၢၼ်ႈ ပိတ်ႉ ပေႃႉထုပ်ႉ ၵူၼ်းၼုမ်ႇႁၢဝ်ႈႁႅင်း လၢၵ်ႈၶိုၼ်ႈၵႃးၵႂႃႇ။ လိူဝ်ၼၼ်ႉ တီႈပွၵ်ႉၸၢၼ်းတင်းပွတ်းႁွင်ႇၼႆႉ သဵင်ၵွင်ႈတႅၵ်ႇ။ ပဵၼ်သိုၵ်းမၢၼ်ႈယိုဝ်း။ ပဵၼ်မၢၵ်ႇၵွင်ႈတႄႉ ”- ၵူၼ်းၼုမ်ႇမူႇၸေႊ သိုပ်ႇလၢတ်ႈၼႄၼင်ႇၼႆ။

မိူဝ်ႈဝၼ်းတီႈ 27/3/2021 ဢွၼ်ႇၸၢႆးၼုမ်ႇ ဢႃယု 15 ပီ ထုၵ်ႇသိုၵ်းမၢၼ်ႈ ယိုဝ်းတၢႆ  ၵေႃႉၼိုင်ႈ။ လိူဝ်ၼၼ်ႉ ၼႂ်းဝၼ်းတီႈ 27-28 ၼႆႉ သွင်ဝၼ်းၼႆႉ ၵူၼ်းၼုမ်ႇ ၼႄၵၢင် ၸႂ် တီႈမူႇၸေႊ ထုၵ်ႇသိုၵ်းမၢၼ်ႈယိုဝ်းသေ လႆႈတိူဝ်ႉမၢတ်ႇၸဵပ်းသမ်ႉ တင်း မူတ်း 9 ၵေႃႉ။ ၼႂ်းၼၼ်ႉ မၢတ်ႇၸဵပ်းႁၢဝ်ႈႁႅင်း 3 ၵေႃႉ။