ဝၼ်းတီႈ 19/3/2021 မိူဝ်ႈၼႆႉယၢမ်းၵၢင်ၼႂ် ၵူၼ်းမိူင်းဢွင်ႇပၢၼ်း ဢွၵ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈယိုတ်းမိူင်း ၺႃးပလိၵ်ႈဢဵၼ်ႁႅင်း 70 လႄႈသိုၵ်း 150 ၶဝ်ႈပိုတ်းယိုဝ်း ယႃႉႁၢမ်ႈႁၢဝ်ႈႁႅင်း။
ပလိၵ်ႈလႄႈသိုၵ်း ဢဝ်မၢၵ်ႇယၢင်ရႃႊပႃႊယိုဝ်း၊ ဢဝ်ၵႅတ်ႉသ်ၼမ်ႉတႃပွႆႇသႂ်ႇလႄႈ ၵူၼ်းၼႄၵၢင်ၸႂ်တၢႆ 2 ၵေႃႉ။
ၵူၼ်းမိူင်းဢွင်ႇပၢၼ်း ဢၼ်ၶဝ်ႈႁူမ်ႈပႃးၼႄၵၢင်ၸႂ်လၢတ်ႈတီႈၽူႈတွႆႇႁွၵ်ႈဝႃႈ – ၶဝ်ပိုတ်းယိုဝ်းႁၢဝ်ႈႁႅင်းဢေႃႈမိူဝ်ႈၼႆႉ ။ ၵူၼ်းႁဝ်းမၢတ်ႇၸဵပ်း ၼမ်ဢေႃႈ။ မၢတ်ႇၸဵပ်းလိူဝ်ႁႅင်း 3 ၵေႃႉ၊ ၼႂ်းၼၼ်ႉဢၼ်ၶႃႈႁူႉတႄႉလူႉတၢႆ 2 ၵေႃႉယဝ်ႉၶႃႈ။မၢၵ်ႇၵွင်ႈတိူဝ်ႉတီႈ ႁူင်းယဵဝ်ႈၵေႃႉၼိုင်ႈလႄႈ တိူဝ်ႉတီႈ ၵၢၼ်ႈၶေႃး ၵေႃႉၼိုင်ႈ – ဝႃႈၼႆ။
တီႈပၢင်ၼႄၵၢင်ၸႂ် တီႈဢွင်ႇပၢၼ်းမိူဝ်ႈၼႆႉၼႆႉ ဢၼ်ၺႃးပလိၵ်ႈတီႉၺွပ်းဢဝ်ၵႂႃႇ 7 ၵေႃႉ။ တေႃႇထိုင်ၵၢင်ဝၼ်းတဵင်ႈ ရူတ်ႉၸွႆႈထႅမ်ၵူၼ်းပဵၼ် ဢမ်ႇၸၢင်ႈ ၶဝ်ႈၵဵပ်းၵူၼ်းမၢတ်ႇၸဵပ်း။
ၵူၼ်းဢွင်ႇပၢၼ်းၵမ်ႈၽွင်ႈ လၢတ်ႈဝႃႈ တၢႆထိုင် 7 ၵေႃႉ ၼႆသေတႃႉ လွင်ႈၼႆႉၽူႈတွႆႇႁွၵ်ႈပႆႇၸၢင်ႈယိုၼ်ယၼ်လႆႈ။
