မီးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ပႃးၵွင်ႈၸေးမိုဝ်းသေ ပႂ်ႉၵဵပ်းၶွၼ်ႇၸွမ်း သဵၼ်ႈတၢင်းလူင်မူႇၸေႊ – ၵူတ်ႉၶၢႆ ၸိုင်ႈတႆး ပွတ်းႁွင်ႇႁၢဝ်ႈႁႅင်း ၸဝ်ႈၵႃးလူင် ဢၼ်လဵၼ်ႈတၢင်းသၢႆၼၼ်ႉ လၢတ်ႈၼႄၼင်ႇၼႆ။
ဝၼ်းတီႈ 16/3/2021 ယၢမ်းၵၢင်ၶမ်ႈ မွၵ်ႈ 6 မူင်းပၢႆ ၸုမ်းယိပ်းၵွင်ႈၵၢင်ႇ ပႂ်ႉၵဵပ်းငိုၼ်း တီႈၸဝ်ႈၵႃးလူင်၊ ၵႃးတၢင်ႇ ၵူၼ်း/ တၢင်ႇၵုၼ်ႇ တီႈၼိူဝ် သဵၼ်ႈတၢင်းလူင် မူႇၸေႊ – ၵူတ်ႇၶၢႆ၊ တီႈမၢၼ်ႈလွႆ – ၶူဝ်မုင်း ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ။
ၸဝ်ႈၵႃးလူင် ဢၼ်လႅၼ်ႈတၢင်းသဵၼ်ႈၼၼ်ႉ ၵေႃႉၼိုင်ႈ လၢတ်ႈဝႃႈ – “တူၺ်းတႄႉလႅပ်ႈပဵၼ် KIA ၵူၺ်းၶႃႈ၊ ၶဝ်ပႃးၵွင်ႈၸေးမိုဝ်း ၵူၺ်းၵႃႈ ဢမ်ႇၼုင်ႈၶူဝ်းသိုၵ်း ၼုင်ႈၶူဝ်းၵူၼ်းမိူင်းၵူၼ်း။ ၶဝ်မီးရူတ်ႉၵႃး ပႂ်ႉဝႆႉ 2 လမ်း၊ သင်ဝႃႈ ႁွင်ႉၵႃးလူင်ၵိုတ်းလႄႈ ဢမ်ႇၵိုတ်းၸိုင် ၶဝ်ဢဝ်ၵႃးၶဝ်လမ်းၸွမ်းၶႃႈဢေႃႈ။ ၼႂ်းၵႃးၶဝ်ၼၼ်ႉ မီးၵူၼ်းၶဝ် 2 ၵေႃႉ၊ ဢၼ်ပႂ်ႉႁေႉၵႃးသမ်ႉ 1 ၵေႃႉ ”- ဝႃႈၼႆ။
ၵူၺ်းၵႃႈ ယူႇတီႈၽူႈတွႆႇႁွၵ်ႈ ၵပ်းသိုပ်ႇၸူး KIA တႄႉဢမ်ႇလႆ။ ၵႃးလူင် ဢၼ်လႆႈသႂ်ႇၶွၼ်ႇပၼ်ၶဝ်သမ်ႉ ၼိုင်ႈလမ်းလႂ် ဢမ်ႇယွမ်း 6 သႅၼ်ပျႃး ၼႆယဝ်ႉ။
“ၵႃးဢွၼ်ႇတႄႉ ၶဝ်ဢမ်ႇၵဵပ်း ၶဝ်ၵဵပ်းၵႃးလူင်ၵူၺ်း ၼိုင်ႈလမ်း ဢမ်ႇယွမ်း 6 သႅၼ်ပျႃး ၵမ်ႈၼမ် ၶဝ်တေၵဵပ်းတီႈၸဝ်ႈ ၵုၼ်ႇ ဢၼ်မႃးၸွမ်းၼႂ်းၵႃးၼၼ်ႉ၊ ၶဝ်တေဢမ်ႇဢဝ်တူဝ်ငိုၼ်း ၶဝ်တေ ၸႂ်ႉဢူၼ်းငိုၼ်းပၼ် ၼႂ်း K Pay, Wave Money ၵမ်ႈၼမ်ၶႃႈယဝ်ႉ။ ဢႃယုၶဝ် တေမီး မွၵ်ႈ 20 ပၢႆ ၼႆႉၵူၺ်း။ လႅပ်ႈၶဝ် တေမီးၵူၼ်းပႂ်ႉတူၺ်းဝႆႉသေပွင်ႇၶၢဝ်ႇၸူးၵၼ် ၶႃဢေႃႈ ပႂ်ႉဢဝ်ၵႃးဢၼ်လုၵ်ႉတၢင်းး 105 လၵ်းသေပွၵ်ႈမႃးၵူၺ်းၵူၺ်း ”- ၸဝ်ႈၵႃးလူင် သိုပ်ႇလၢတ်ႈၼႄၼင်ႇၼႆ။
ၸဝ်ႈၵႃးလူင် ဢၼ်လဵၼ်ႈတၢင်း မူႇၸေႊ – ဝဵင်းလိူဝ်ႇၼႆႉ ၼႂ်း 2-3 လိူၼ်မႃးၼႆႉၵႆႉၺႃး ၸုမ်းယိပ်းၵွင်ႈၵၢင်ႇၸိူဝ်းၼႆႉပႂ်ႉၵဵပ်း ၶွၼ်ႇ ၼႂ်းၵႄႈမူႇၸေႊ – ၵူတ်ႉၶၢႆ ။ ၸဝ်ႈၵႃး ၵမ်ႈၽွင်ႈ ဢၼ်လႆႈဝႂ်တိုတ်းငိုၼ်းတႄႉတႅမ်ႈဝႆႉလိၵ်ႈၶၢင် သေတႃႉၵမ်ႈၽွင်ႈၵေႃႈ ဢမ်ႇလႆႈဝႂ်တိုတ်းငိုၼ်းလူးၵွၼ်ႇဝႃႈၼႆ။
ၼႂ်းၸိုင်ႈတႆးပွတ်းႁွင်ႇ တၢင်းပွတ်းၵူတ်ႇၶၢႆ – မူႇၸေႊ- ၼမ်ႉၶမ်းၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း သိုၵ်းမၢၼ်ႈ တူင်ႉ ၼိုင် ၵႂႃႇမႃးၼမ် ယဝ်ႉၵေႃႈ ၸုမ်းပျီႇတူႉၸိတ်ႉ ၸိူဝ်းၼႆႉၵေႃႈၼမ် ၵၢၼ်ၵဵပ်းၶွၼ်ႇ၊ လွင်ႈၶႃႈႁႅမ်ၵၼ်တၢႆ၊ လွင်ႈပိုတ်းယိုဝ်း ၵၼ် ၸိူဝ်းၼႆႉၵေႃႈ ၵႆႉမီးမႃးတႃႇသေႇ ၼႆယဝ်ႉ။
