ယေးငိုၼ်း သုၼ်ႇတူဝ် တီႈတူၼ်ႈတီး ၵမ်ႈၽွင်ႈ ၶိုၼ်းပိုတ်ႇပၼ် ၵူၼ်းမိူင်းၸႂ်ႉၸွမ်းၼင်ႇ ၶၢဝ်း ယၢမ်းတၢင်းဝၢင်းဝႆႉ ဝႃႈၼႆ။
မိူဝ်ႈၼႆႉ ဝၼ်းတီႈ 16/3/2021 တႄႇဢဝ် ယၢမ်းၵၢင်ၼႂ် 9 မူင်း ထိုင် 12 မူင်း ယေးငိုၼ်း ၵမ်ႇပေႃးၸႃႉပၢၼ်ႇ တီႈ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ပိုတ်ႇပၼ် ၵူၼ်းမိူင်း ၸႂ်ႉတိုဝ်းထွၼ်ငိုၼ်းၵၼ်လႆႈယဝ်ႉ ဝႃႈၼႆ။
ၽူႈယိင်း ၵေႃႉၼိုင်ႈ ဢၼ်ၵႂႃႇထွၼ်ငိုၼ်း တီႈၵမ်ႇပေႃးၸႃႉပၢၼ်ႇ လၢတ်ႈဝႃႈ – “ၸႂ်ႈၶႃႈဢေႃႈ ၶဝ်ပိုတ်ႇပၼ် ယၢမ်းၵၢင်ၼႂ် ၵူၺ်း။ မိူဝ်ႈၼႆႉ ၶဝ်ထွၼ်ပၼ် ၼိုင်ႈၵေႃႉလႂ် 5 သႅၼ်ပျႃး။ ၵူၼ်းမႃးထွၼ်ငိုၼ်းၵေႃႈမီးယူႇ။ ၵူၺ်းၵႃႈ ၵူၼ်းႁဵတ်းၵၢၼ်ပၢၼ်ႇ တႄႉ ဢမ်ႇမီးၼမ်ၶႃႈ”- ဝႃႈၼႆ။
ပေႃးထိုင်မႃး ဝၼ်းတီႈ 17/3/2021 မိူဝ်ႈၽုၵ်ႈ ၵိင်ႇၽႄယေးငိုၼ်း ၵမ်ႇပေႃးၸႃႉပၢၼ်ႇ မိူၼ်ၼင်ႇ တၢင်းႁၢႆးဝူဝ်း၊ ဢေႊ တႃႇယႃႇ၊ ယွင်ႁူၺ်ႈ၊ သူၺ်ႇၺွင်ႇ၊ ႁူဝ်ပူင်း၊ ၵၢတ်ႇလေႃႉလႄႈ ဢွင်ႇပၢၼ်း ၸိူဝ်းယူႇ မီးၼႂ်းၸႄႈတွၼ်ႈတူၼ်ႈတီး ၸိူဝ်းၼႆႉ တေပိုတ်ႇၵႂႃႇ လႆႈႁူႉၸွမ်းၼင်ႇၼႆ။
ဝၼ်းတီႈ 9/3/2021 ပူၼ်ႉမႃးၼႆႉ ယူႇတီႈၶွင်ႇသီႇသိုၵ်းမၢၼ်ႈ သူင်ႇလိၵ်ႈ တဵၵ်းႁႂ်ႈ ယေးငိုၼ်းသုၼ်ႇတူဝ် ဢၼ်ပိၵ်ႉ ဢိုတ်းဝႆႉ ၸိူဝ်းၼၼ်ႉ ၶိုၼ်းပိုတ်ႇပၼ်ၶိုၼ်းဝႆးဝႆး။ သင်ဝႃႈ ဢမ်ႇပဵၼ်ပိုတ်ႇၼႆၸိုင် ငိုၼ်းဢၼ်မီးၼႂ်းယေးငိုၼ်းၸိူဝ်းၼၼ်ႉ ႁႂ်ႈဢူၼ်း ပၼ် တၢင်းယေးငိုၼ်း မျၢၼ်ႇမႃႉၸီးပႂႃးယေး၊ ဢိၼ်းဝႃႉလႄႈ မျႃႉဝတီႇ ပၢၼ်ႇ ဢၼ်ပဵၼ်ၶွင်သိုၵ်းၶဝ်ႈပႃးလူင်းထုၼ်းဝႆႉၸိူဝ်းၼၼ်ႉ ဝႃႈၼႆ။
မိူဝ်ႈဝၼ်းတီႈ 12 ပူၼ်ႉမႃးၼႆႉ ၽူႈႁၢပ်ႇၵၢၼ် ၼႂ်းယေးငိုၼ်း ငဝ်ႈငုၼ်းမိူင်းႁူမ်ႈတုမ် 212 ၵေႃႉ ႁဵတ်း CDM (သၢၼ်ၶတ်းၸဝ်ႈဢႃႇၼႃႇသိုၵ်း)လႄႈ ၶွင်ႇသီႇသိုၵ်းမၢၼ်ႈ ပူတ်းၼႃႈတီႈပုၼ်ႈၽွၼ်းၶဝ်ပႅတ်ႈသေ ပိုၼ်ၽၢဝ်ႇ ၵိုတ်းယင်ႉဝႆႉဝႆႉၸူဝ်ႈၶၢဝ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ